Resumen di e relato mensual di Banco Central di Aruba pa Januari

Resumen di e relato mensual di Banco Central di Aruba
*
pa Januari 2002
Maart 15, 2002
Den e relato mensual di Banco Central di Aruba pa Januari 2002 ta wordo menciona cu e
cantidad di placa den circulacion a subi cu AFL 29.9 miyon of 1.6 porciento te na AFL
1,870.6 miyon, door di un fluho neto di fondo for di exterior di AFL 36.6 miyon.
Consecuentemente, e reserva di divisa di e sector monetario a alcansa AFL 702.7 miyon
na final di Januari 2002, cual ta AFL 125.2 miyon of 21.7 porciento mas halto cu e aña
anterior.
E activo domestico neto a baha cu AFL 6.7 miyon, principalmente pa motibo di un bahada
di AFL 4.3 miyon (0.6 porciento) den credito na empresanan. Credito na consumidornan y
hipoteca pa construccion di cas a aumenta un poco, esta cu AFL 0.7 miyon (0.2 porciento)
y AFL 1.5 miyon (0.3 porciento), respectivamente. Per saldo, e transaccionnan financiero
domestico di gobierno tabata tin un efecto contractivo di AFL 4.4 miyon riba e cantidad di
placa den circulacion.
Datonan di Aruba Tourism Authority ta indica cu na Januari 2002, tanto e cantidad di
turistanan cu ta permanece riba e isla como e anochinan cu nan a keda a bolbe baha
notablemente, esta cu 13.4 porciento y 9.7 porciento, respectivamente, principalmente
door cu e mercado Mericano ainda ta basta afecta pa e consecuencia di e eventonan
tragico di 11 di September. Desde e momento ey, turismo cu ta permanece riba e isla, e
pilar principal di nos economia, a baha bastante cu 13 porciento compara cu e periodo
corespondiente di e aña anterior.
Na otro banda e cantidad di turistanan crucero a subi cu 13.9 porciento te na 77,102 na
Januari 2002, y e cantidad di barconan cu 3 te na 46.
Na final di e luna bow reviso, e indice di prijs di consumo tabata 2.6 porciento mas halto cu
e aña anterior. E aumento di e promedio anual di e tasa di inflacion a baha, for di 4.0
porciento e aña anterior te na 2.8 porciento.
*
E publicacionnan di Banco Central di Aruba tambe ta disponibel riba su website www.cbaruba.org.