Lisette van Lamoen-Garmers 6 yanüari 2015 Na

1
Lisette van Lamoen-Garmers
6 yanüari 2015
Na okashon di 45 aña Direktiva di Skol Katóliko
Apresiado presentenan,
Awe nos ta rekordá e hecho ku 45 aña pasá, diferente direktiva di enseñansa
katóliko na Kòrsou a uni forsa i a forma ún fundashon pa enseñansa katóliko:
Stichting Rooms Katholiek Centraal Schoolbestuur, o sea: Direktiva di Skol
Katóliko.
Dor di skohe pa union, nan a reforsá e trabou, e eksperiensia, e tradishon,
pero prinsipalmente e balor spiritual di e pioneronan katóliko ku a krea
enseñansa pa nos pueblo den pasado.
Ta un honor pa forma parti di un organisashon salí di hendenan ku a bin lanta
skol kaminda no tabatin; ku a trese enseñansa pa esnan mas pober i humilde,
ku ántes nunka a pone pia den un skol. P’esei ta na su lugá pa dediká algun
palabra awe na honor di nos pioneronan.
Na promé lugá: e sùrnan di Roosendaal ku a bin Korsou na 1842, ku a lanta
nan promé skol despues na Otrobanda: e asina yamá ‘Martinus Gesticht’.
Tambe e fraternan di Tilburg ku algun tempu despues a lanta Sint Thomas
College i Sint Vincentius school na Otrobanda, i Sint Jozefschool na Pietermaai.
E tempu ayá, es decir den siglo 19, gobièrnu nó tabata pèrkurá pa skol pafó di
siudat. Ta e pioneronan katóliko a kuminsá lanta skol den kunuku, por
ehèmpel na Santa Maria, Barber, Willibrordus, Soto i Montaña i Santa Rosa.
Gradualmente mas kongregashon katóliko a bini Kòrsou, por ehèmpel sùrnan
di Schijndel i Broeders van Dongen, i kada kongregashon a lanta su mes
skolnan bou di su propio direktiva.
2
Ku e konosementu di e tempu ei, e pioneronan a krea métodonan spesial pa
enseñansa lokal, manera Nos Tera, Nos Patria, Palabras i Zonnig Nederlands.
Ta nán a kuminsá ku skolnan tékniko na nivel di LTS i MTS, enseñansa
atministrativo, huishoudschool, skol pa mucha ku limitashon físiko, i asta
G.O.G.
Pero mundu a kambia, i siglo pasá e kantidat di dosente religioso a baha
drástikamente. Edat tambe a subi, i fin di añanan sesenta mayoria dosente
religioso a bai nan tera bèk. P’esei esnan ku a keda, a uni forsa pa lanta ún solo
Direktiva di Skol Katóliko. Hopi chikitu a forma un grandi pa garantisá
kontinuashon i kalidat.
Awor nos huntu ta karga enseñansa katóliko riba nos skouru: sea komo
miémbro di direktiva, profeshonal den enseñansa, trahadónan di sosten,
lidernan spiritual, òf komo mayor. Pasobra maske kuantu mundu por a
kambia, ún kos a keda igual, i esei ta e nesesidat ku mayoria hende tin pa
buska i haña un orientashon spiritual i religioso den nan bida.
No ta tur hende gusta atmití esei. Pero e nesesidat ei a resaltá sí den entrevista
ku dosentenan, mayornan i tambe alumnonan durante preparashon di nos
plan di maneho. Esei ta mas motibu ainda pa kuida e orígen religioso di nos
skolnan. Tur aña, e Instituto Katekétido Diosesano ta ofresé skolnan un
programa pa reforsá nan identidat katóliko i formashon religioso. Tambe nos
por konta sémper ku e guia di Obispado.
Meskos ku ta konta pa otro skolnan partikular, e outoridat di nos
organisashon tambe ta ankrá den un kuadro konstitushonal. Aparte di nos
derechonan komo skol partikular, esaki ta trese un responsabilidat grandi
kuné pa manehá nos skolnan manera debe ser, kumpliendo ku tur kriterio di
corporate governance. Tambe e ta pidi pa un responsabilidat síviko i
3
profeshonal pa yuda pensa aktivamente riba asuntunan di enseñansa i traha
huntu ku tur otro aktor den e ramo akí na Kòrsou. Mi por sigurá ku esei ta
hustamente nos meta i intenshon. Pasobra final de la cuenta, ta ún interes so
ta konta, i esei ta e interes di tur alumno. Ta nán ta e motibu di eksistensia di
henter e sektor di enseñansa. P’esei tur desishon ku nos tuma komo gerensia,
komo kabes di skol òf dosente, mester kuminsá i kaba ku ún pregunta: kon
esaki ta yuda e muchanan.
Ta imposibel pa menshoná tur esnan ku durante e 45 añanan akí a forma parti
di Direktiva di Skol Katóliko. Pero mi ke yama nan danki pa tur e tempu,
energia i atenshon ku nan a invertí, pa krea un fundeshi sano pa nos
hóbennan.
Mi ke yama danki na tur dosente, direktor, i trahadónan di sosten, pa nan
trabou, sakrifisio, i amor pa hende, espesialmente pa nos muchanan. Danki
tambe na tur mayor i otronan ku ta duna un man ora nos mester di nan.
Mi ke rekordá tur esnan ku a traha pa nos skolnan den pasado, pa bon Dios
rekompensá nan rikamente. Pa esnan ku t’ei ainda, mi ta resa pa Señor yena
nan ku salú i amor pa restu du nan bida. Esnan ku ya kaba ta den brasa di
Señor, nos ta pidi pa lus eterno lusa nan.
Apresiado presentenan Komo trahadó den enseñansa, nos tur tin pasport di e
alumnonan den nos man: Nan pasport pa sigui studia, pa bira hende
responsabel, pa haña trabou, i pa un bida sano. Nan mayor a konfia nos ku nan
pasport, i ta nos deber pa e pasport aki keda ku su balor pa por duna e hoben
akseso sin problema den nos komunidat pero tambe na mundu kompleto. Nos
futuro nos ta konstruye awe. “Together as one” na bienestar di enseñansa.
Mashá danki pa e atenshon.