Awe dia 6 di yanüari, dia ku Direktivanan di

45 aña RKCS
R.E.Colastica
06 yanuari 2015
DISKURSO NA OKASHON DI 45 AÑA DIREKTIVA DI SKOLNAN KATÓLIKO
Na enkargo di Richard Colastica – miembro Raad van Toezicht RKCS
6 yanüari 2015
Awe dia 6 di yanüari, dia ku Direktivanan di Skolnan Katóliko
tradishonalmente ta habri aña nobo, a organisa pa tur su personal, entidat i
partnernan den enseñansa un aktividat festivo apertura pa e okashon aki
Dia 29 di desember ultimo Direktiva di Skolnan Katóliko a rekordá ku 45 aña a
lanta un direktiva di skolnan katóliko. Pa e okashon aki e aña aki a kombiná e
dos akontesimentunan aki den un kual a tuma luga den kura di Maris Stella
SBO ku presensha di su ekselensha Monsigneur Luis Secco, Obispu di
Willemstad, Pader Morrison Laporte Vikaro di edukashon katoliko,. Tambe
tabata presente miembronan di raad van Toezicht di Schoolbestuur, di Raad
van Bestuur miembronan di instanshanan di sindikato den enseñansa i
edukadó i personal di Schoolbestuur.
Monsigneur Secco a habri e selebrashon ku orashon siguí pa un reflekshon di
pader Morrison. Na e okashon aki a hiba palabra tambeSra Van LamoenGarmes director di RKCS i Sr. Richard Colastica miembro di Raad van Toezicht
di Direktiva di Skolnan Katóliko.
Athunto e diskurso di Sr. Richard Colastica den representashon di Direktiva di
Skolnan Katóliko na okashon di e selebrashon aki.
Apresiabel presentenan,
Rooms Katholiek Centraal Schoolbestuur, e instituto di enseñansa katóliko ku
den boka di pueblo nos ta yama “Schoolbestur”, òf “Direktiva di skolnan
katóliko”, ta fruta di un tradishon di enseñansa Katóliko riba nos isla di kasi
dos siglo.
E ta alabes e instituto di enseñansa di mas grandi di nos pais i komo tal
semper a yuda den un forma responsabel, determiná direkshon di enseñansa
riba nos isla
1|P a ge
45 aña RKCS
R.E.Colastica
06 yanuari 2015
E tradishon ariba menshoná ta basá riba e mishon di Iglesia Universal pa
eduká pueblonan rònt mundu i logra di e forma aki ku hende por alkansá
prosperidat spiritual i material.
Mishon i influensha di Iglesia Katóliko riba enseñansa
I nos por a nota ku den tur pais kaminda Iglesia Katóliko ta presente, e a
pèrkurá lanta skol i institutonan edukashonal katóliko i otro fasilidatnan,
netamente pa garantisá formashon spiritual i intelektual di e pueblonan.
Mishon di Iglesia katóliko relashoná ku enseñansa ta, entre otro i
primeramente dirigí riba tur hende ku atenshon speshal i preferenshal pa
esnan di ménos rekurso.
Den kuadro di e mishon aki, Iglesia katóliko a lanta na Kòrsou “skol di plaka” i
“skol pòrnada”, ku a produsí den nan tempu, personanan respetá i bon formá
den nos komunidat.
Atraves di tempu a eliminá skol di plaka i skol pòrnada. Despues di esei
enseñansa Katóliko na tur nos skolnan semper tabata grátis ku eksepshon di
skolnan avansá kaminda a mantené un struktura di kontribushon di parti di
mayornan.
E influensha di Iglesia Katóliko riba enseñansa ta grandi tantu na Kòrsou komo
den otro paisnan. Direktiva di Skolnan katóliko ta e direktiva di mas grandi di
nos pais i nos ta manehá 53 skol, alrededor di 18.500 alumno i un kantidat di
alrededor di 1220 personal.
Nos organisashon ta wòrdu dirigí di akuerdo ku e modèl di Corporate
Governance, den kua nos tin un Raad van Toezicht komo e órgano mas altu i
Raad van Bestür (Direktie) ku ta enkargá ku e maneho diario i operashonal.
Papa Fransisko den su promé disertashon riba enseñansa katóliko na aña
2013 a enfatisá e influensha i importansha di e esfuerso katóliko aki, i a bisa:
“ta un bon kos pa nos tin skolnan katóliko”.
P’esei nos tin ku hasi tur nos esfuerso pa mantené nos skolnan i alabes tambe
hasi nos máksimo esfuerso pa mehorá funshonamentu di nos skolnan komo
un komunidat di amor i di edukashon.
2|P a ge
45 aña RKCS
R.E.Colastica
06 yanuari 2015
Esaki nos debe nos komunidat i partikularmente e mucha i hóbennan ku ta e
pèrlanan ku nos ta karga e deber di konserva i protehá.
E protagonistanan di promé ora
Awe nos ta rekordá ku gratitut e esfuerso di e protagonistanan di promé ora,
ku a pone e fundeshi pa enseñansa Katóliko riba nos Isla.
Ta trata di institushon religioso, kual ta e Òrdu di Padernan Domíniko,
kongregashonnan di Sùrnan di Roosendaal, i Sùrnan di Schijndel, Brudernan
di Onze Lieve Vrouwen van Lourdes i Fraternan di Tilburg ku a laga pa nos un
herensha impresindibel.
Nan a enkargá nan mes ku maneho di diferente tipo di enseñansa manera,
enseñansa básiko, skolnan di fishi manera ambacht i huishoudschool, skolnan
avansá i skolnan speshal, kaminda nan a pone atenshon tantu riba enseñansa
komo riba moral di bida, étika i aspektonan spiritual-religioso.
Te den e époka aki ku ainda nos por a papia di lèsnan di katisashi i di religion
den nos skolnan Katóliko.
Lantamentu schoolbestuur i kambionan di nos kultura kontemporáneo
Tabata na aña 1969, ku e institutonan religioso aki, a bini huntu i a formá un
direktiva di skolnan Katóliko. “un Central Schoolbestuur” katóliko romano.
Tantu mundial komo lokal nos a eksperensha kambionan hopi signifikante ku
a yuda determiná e ròl i lugá di enseñansa katóliko aki tambe den nos
komunidat.
Papa Fransisko, den e mesun disertashon di 2013 a remarká ku e proseso di
kambio mundial a enserá tambe tendensha persistente ku ta menasa di redusí
e importansha i bibensha di fe i Iglesia na un “kos” priva, un “kos” di karakter
netamente personal.
Esaki a pone nos kultura di norma i balor tambe bou di hopi preshon. Nos ta
siñalá un nesesidat kresiente pa redefiní sistemanan eksistente manera entre
otro skolnan Katóliko.
E mundu materialisá indiferente, motivá pa e tendensha di kambionan, ta
entre e faktornan ku den siglo 20 a kondusí na eliminá e materia “katisashi i
religion”.
3|P a ge
45 aña RKCS
R.E.Colastica
06 yanuari 2015
Na nos opinion, konsekuentemente, esaki a habri kaminda pa deterioro,
pèrdida di norma i balor, falta di kontesta spiritual riba aspektonan di bida,
desorientashon di nos mucha , hóben i adolesentenan.
Kriminalidat ta krese espantosamente bou di nos hóbennan, ku fásilmente por
ta o tabata un alumno di un di nos skolnan katóliko.
Retonan
Tin siñalnan preokupante ta bini den nos direkshon: apesar ku tin hopi hóben
ku ta mantené na mes firme riba e kaminda korèkto, nos ta señalá ku e
kantidat di hóbennan ku ta desviá di e kaminda rekto ta kresiendo. Mas
preokupante ta ku e hóbennan ku aktitut violento ku ta violá seriamente
reglanan di bida humano i ku den sierto kaso nan ta envolví den situashonnan
tristu manera por ehemplo den kasonan di asesinato.
E echonan i susesonan aki mester alertá i alarmá nos komunidat seriamente, i
mas ainda nos instituto di edukashon katóliko.
Nos ta rekonosé ku e desaroyonan aki ta kompliká pa solushoná. Miéntras ku
nos ta rekonosé ku nos posibilidatnan entre otro e parti finansiero ta hopi
limitá pa por maneha un instituto di asina importansha, nos tin ku sigui buska
formanan pa mediante bon edukashon I amor pa nos muchanan, bòltu
kachaka i logra ku nos skolnan ta produsí hende ku ta kapas pa stima otro i
respetá otro i nan propiedatnan.
Komunidat ta spera di nos ku nos ta yuda formá hendenan ku no solamente ta
desaroyá pa funshoná den nan área di trabou pa satisfase nan nesesidatnan
material I korporal, pero mas bient tambe nos enseñansa tin ku desaroyá
hende ku tin amor pa bida. Ta esaki ta nos mishon Kristian.
Ta importante pues pa nos realisá ku den kurason di enseñansa Katóliko, Hesus
Kristu ta é sentro.
P’esei ta un urgensha pa reintrodusí i fortifiká balornan kristian Katóliko den
e kuríkulo edukashonal di nos skolnan.
Esaki mester ta rason pa nos komo maestro i atministradónan di enseñansa
Katóliko, ainda mas demonstrá ku pashon ku nos tei pa nos mucha i hóbennan
manera Kristu Hesus tei pa nos.
4|P a ge
45 aña RKCS
R.E.Colastica
06 yanuari 2015
Rumannan, maestro, dosente i koleganan di bestür i direktiva, klero i
religiosonan presente, nos mester urgentemente di sosten di Iglesia den su
totalidat pa yuda ku formashon i guia spiritual di e maestro, edukadó i
atministradónan den enseñansa pa nos ta kapas pa transmití e mensahe di
Kristu Hesus na esnan ku a keda konfiá na nos.
Ta nos maestro i atministradónan den enseñansa, ku ta yamá pa biba i aktuá
bou di tur sirkunstansha di akuerdo ku nos konvikshon Kristian Katóliko, ta e
aktornan prinsipal i responsabel pa edukashon di nos mucha i hóbennan. Ta
nos por hasi di enseñansa, “un berdadero enseñansa Katóliko”.
Nos mucha i hóbennan, e pèrlanan ku a keda konfia na nos ta konta riba nos.
Kolaborashon I dialogo
P’esei ta di suma importansha pa profundisá i fortifiká na prome luga e
lasonan di kolaborashon, di interkambio i dialogo entre diferente entidatnan
Katóliko, manera Sentro Katekétiko Diosesano i Skolnan Katóliko i Obispado
di Willemstad, ku ta e kustodio di enseñansa Katóliko riba nos pais.
Esaki den konsulta frekuente i estrecho i bou di guia di Obispu di Willemstad.
Alabes nos ke sigui di ta dispuesto I disponibel den dialogo ku tur otro
gremionan I organisashon ku atenshon speshal ku nos gobierno I sindikato di
maestronan pa yega na un miho enseñansa na Kòrsou.
Nos sosiedat tin mester di bon enseñansa.
Konvensí ku nos por bestür i Obispu di Willemstad ta gradisí tur nos maestro
i edukadónan, gerensia di tur skol, gerensia di schoolbestuur, nos personal ku
no ta den e funshon di duna enseñansa direkto, pa tur boso esfuerso i
dedikashon personal na enseñansa katóliko di nos yunan.
Bon aña i pabien ku 45 aña di direktiva di skolnan katóliko i alabes mi ta deseá
Enseñansa Katóliko hopi aña mas na servisio di nos muchanan, hóbennan i
nos komunidat.
Danki pa boso atenshon
========
5|P a ge