Organismo

Organismo
Por konsiderá nos pais komo un organismo, tambe dor di su grandura di eskala. Den un organismo
tur kos tin un korelashon ku otro. Fuera di esei, den un organismo tin un interakshon práktikamente
perfekto entre e diferente partinan. E korelashon ei si t’ei den nos pais, e interakshon nò. Mundu
empresarial na Kòrsou i e promé entidatnan responsabel pa e mundu empresarial akí, direktiva i
komisarionan, no por pèrmití nan mes pa pèrdè e interakshon ku komunidat fo’i bista. Nos no por
otro sino di kambia e enfoke riba lombrishi pa un enfoke riba totalidat.
Kon e korelashon ta den nos organismo nashonal? Pasó nos ta chikí, kada empresa ta keda afektá
akinan dor di echonan ku den un pais mas grandi ta ménos impaktante. Si den nos pais e airliner ku
ta práktikamente monopolístiko, duna servisio ku no ta sirbi ku konekshonnan deskuidá i insigur
entre nos islanan komo konsekuensia, e ora ei nos aorta komersial ta bira kongestioná. Si e airliner ei
bai fayit, e ora ei kada empresa mediano lo sufri daño konsiderabel. Si Banko Sentral di nos pais
haña mal nòmber, e ora ei nos tur lo sinti esaki komersialmente. Si ta sospechá lidernan di
gobièrnunan anterior di echonan seriamente kastigabel òf si asta sentensiá nan, e ora ei esaki lo tin su
reflekshon riba hinter nos mundu empresarial i sigur riba nos sektor finansiero. Tur kos ta den
korelashon ku otro.
Kiko e interakshon ta e ora ei? Esei no t’ei. Ta parse manera ku nos komo mundu empresarial, dor
di e stankamentu ekonómiko di último binti aña, a bira imun pa tur drama kolektivo rondó di nos.
Nos a siña, manera un mucha ku a keda troumatisá i ku regularmente a haña sla den su hubentut, pa
sigui dal bai, sin prekupá ku loke pasa. I esaki ta logra riba nivel mikro tambe. E empresanan mes no
ta bai malu. Esakinan un pa un ta sobrebibientenan. Loke a disparsé den e proseso di sobrebibí, ta e
interakshon, e bista riba totalidat i komunikashon tokante esaki. Rumbo di nos pais a slep sali for di
nos man.
Mi ta boga pa, entrante awe, e tópiko akí paresé riba agènda di tur reunion di direktiva i pa e bira un
punto di agènda fiho riba agènda di tur reunion di kada hunta di komisario den nos pais: kiko e
empresa por hasi pa mehorá nos pais di forma duradero? T’asina ku e organisashon interno den un
dede por ta perfekto, pero si e ardunan den nos organismo kongestioná dor di kalsifikashon, si e
sesunan bira moli i si kita e pianan, e ora ei e márgen di maniobra pa e dede ta limitá. E dede ei lo no
sobrebibí. E solushon: tuma responsabilidat kolektivo pa hinter e organismo.
1