Bèl a bati

Plenchi
Bèl a bati
Temporada di advent a yega. Awor si nos mester kuminsa limpia i habri
kaminda pa nos por risibi Hesus. Kada ana nos ta hana e chens aki a
trobe, ban use bon. Korda ku esei no kier men limpia kas, ferf kas i hasi
kabei ku uña so.Of kumpra pana pa tur yu i bo mes impreshoná tur
hende. E ta mas bien pa bo prepara bo alma i kurason pa e nasementu
di Hesus. Kiko bo por hasi pa trese kambio den bo biba? Kiko lo agrada
Hesus? Ki resolushon bo mester tuma? Ta un bon temporada pa pone
mas enfasis riba kuminda spiritual. Bai misa, resa asina bo lanta mainta.
No kome sin gradisi den orashon pa bo kuminda i esun ku a preparé pa
bo. No Sali kas sin gloria bo kurpa i tampoko sin bendishona bo yunan.
Anochi prome bo drumi, repasá bo dia of siman. Kon bo ta haña e
balansa ta? Bo a kroe tras di material mas tantu? Of bo a duna tempu
gradisi esnan rondó di bo pa tur loke bo ta haña tur dia di nan? Gradisí
bo mama, bo tata, bo kasá of ruman pa tur loke e ta hasi pa bo tur ora.
Bo a kustumbra asina tantu ku su fabor ku bo ya a lubidá ku ta
esfuerso e ta hasi pa bo. Balorá e otro pa su kontribushon pa yuda bo
hasi bo bida mas fásil. Nos tin deber komo mama of tata, pero nos tin
deber di yama danki tambe. Yama danki maske e loke nan ta hasi pa bo
ta parti di nan responsabilidat. No laga ora nan no tei mas pa bo realisá
nan balor.
Un felis djasabra i un djadomingu bendishoná pa bo. No bai leu, paso
nos ta wardabu tur siman riba nos plenchi.
Riba roster
Derechi di mucha
Siman pasa tabata un siman speshal pa nos kòrda riba derechi di nos
hóbennan i nos responsabilidat pa ku nan. Nos skolnan a partisipá tambe na
e festival derechi di mucha. Riba e potrètnan nos por mira.
J.F.Kennedyschool ku a duna bunita presentashon den e festival organisá pa
Bos di Hubentut. Despues ku skol a disidí ku nan ke partisipá na e festival
mesora trabounan a kuminsá. Di Bos di Hubentut 2 persona a bin duna
informashon riba e plan pa e festival. Skol por a partisipá ku 10 hoben. Pa
prepará e hobennan Bos di Hubentut a pone un persona disponibel. Padrino
di e skol, Raul de Windt tambe for di kuminsamentu a duna tur sosten na e
hobennen. Ora hobennan tin talento, nos mester wak ront di nan pa sa ta ken
ta stimulá nan. Awel na skol tin dosente masha kreativo ku mesora a duna
nan aporte. Yufrou Lorette i yufrou Danielle a skibi un bunita kantika pa e
hobennan kanta. Ivan Felipa di Kas di Kultura a bula aden mesora pa yuda e
muchanan ku algun paso pa un baile. Otro sorpresa agradabel tabata ku
Amos Balentien a bin duna e hobennan guia durante nan preparashon. Tur
hende na skol a bira asina entusiasma ku a buska donashon pa un uniform
simpel pa e muchanan por bisti durante e presentashon. Nice Shop mesora a
tuma aden i a regalá e muchanan kada un un t-shirt. E hobennan tabata tur
afó. Nan a duna un presentashon di kita sombre. Pabien hobennan, pabien
yufrounan. Danki na tur ku a yuda pa e e hóbennan haña un eksperensha
inolbidabel.
Hobennan di J.F. Kennedyschool den nan presentashon na festival di
derechi di mucha.
Hobennan di J.F. Kennedy a bria na festival derechi di mucha.
Not’é riba bòrchi
Siman di buki
Na Br. Rigobertus school tambe a organisá siman di lesamentu pa e
hóbennan. Tabata un siman eksitoso. Riba e foto nos por mira kon e
hóbennan ta skucha ku atenshon. Skol a haña di Roel Jungslager / Leo
Regals na bishita na skol Br. Rigobertusschool komo eskritor i outor. Tambe
Merly Bergland tabata presente pa konta di su bukinan ku el a skibi, pero
tambe di su bida. Danki na tur ku a kontribui na hasi e siman unu eksitoso.
Den Agenda
1 desèmber dia di enseñansa
Fakansi di skol: 19 desèmber te ku 4 di yanuari
Siman di buki
Bukinan ku e hobennan di Br. Rigobertus mes a traha.
Br. Rigobertus den nan aktividat pa kanta i resa pa Hesus . Hobennan di skol
a kuminsá prepará kaba pa nasementu di Hesus.
Hobennan di Br. Rigobertus den orashon.
Mi ta konta
Un angel
Bieunan ta konta ku aki bou tin masha hopi angel. Un dia ku un yu mester a
nase e tabatin un kombersashon ku Dios.
“Tata, bèrdat bo ta mandami mundu mañan? Pero kon mi por biba ei bou mi
so i sin Bo pa kuidami?”
Dios a kontestá:”Entre hopi angel mi a skohe un speshal pa abo. E ta
wardabu, e lo kuidabu i protehebu.”
E yu no a keda konvensí el a sigui bisa: “Pero hombernan na mundu ta papia
un idioma straño i aki mi ta hopi felis. Kon mi ta hasi si mi no por
komprondé e idioma ni e kosnan di mundu?”
“Bo angel eskohí lo papia palabranan masha dushi ku bo. Lo e tin pasenshi
ku bo, lo e stimá bu. E lo siñabu papia.”
“Anto kon mi ta hasi papia ku Abo Tata, paso mi no ke keda sin mirabu ?”
“E angel lo siñabu dobla bo rudia i pone bo mannan huntu pa bo resa. Lo e
siñabu kon buskami i tenemi serka di bo pa un dia nos bolbe topa aki”
“Ken lo defendemi di tur kos i hende malu ei bou?”
“Bo angel lo protehabu kontra tur kos i hende malu. Si e mester sakrifiká su
mes bida pa bo seguridat lo e hasié.”
“Pero kon su nòmber ta Tata?”
“Su nòmber no ta importante, lo bo yamé MAMA!”
Un prenchi
Piet no ta keda atras. Na Soeur Hedwigschool 2 Piet a bai skol bai
bishitá e muchanan. Nan a pasa masha dushi ku e muchanan i a
prepará pa e dia di fiesta mes. Dia ku San Nikolas lo bin skol.
Muchanan pasa un fiesta di San Nikolas dushi na skol. Pietnan su kara
ta masha kontentu. Esei kier men ku na skol tin bon ambiente.
Mucha djispou
Karin a bin skol sin trese su tareanan ku e mester a hasi na kas. E mester a traha
algun som.
Yufrou: “Karin bo a traha e sòmnan anto lubidá e sgrift òf bo no a traha mes?”
Karin: “Yufrou mi no a traha nan paso e buki ta yen di problema ku ami mester
solushoná. Mi mes ta yen di problema pa disidi unda mi ta bai hasi mi fiesta otro
siman. Ma disidí ku mihó mi solushoná mi mes problemanan prome mi bai
solushoná tur e problemanan den e buki.