Ahuste di eksigensha pa èksamen di havo i vwo Státus 14 di Aprel

1
Ahuste di eksigensha pa èksamen di havo i vwo
Státus 14 di Aprel 2016.
Direktiva di Skol Katóliko no ke nada otro sino traha na pas i den harmonia
ku tur hende i instansha ku tin keber ku enseñansa. Tambe riba tereno di
ahuste di eksigensha pa èksamen di havo i vwo.
E siguiente hechonan ta proba ku Direktiva di Skol Katóliko ta kumpli
debidamente ku su deber. Tambe e hechonan resumí mas abou ta mustra ku:
- No tabatin niun diskushon ni konmoshon ku a tarda e lei ku mester regla
eksigensha pa èksamen di havo i vwo. Al kontrario. Ta komo te awe (14 di
aprel 2016) e lei no ta na vigor miéntras djis èksamen ta bai kuminsá,
mayornan ta bati na porta di direktivanan di skol, i direktivanan di skol na
nan turno ta bati na porta di minister di enseñansa.
- Legalmente tambe, direktivanan di skol tin tur motibu di bati na porta di
minister pa por mira e lei i duna konseho. Artíkulo 4 di Landsverordening
voortgezet onderwijs ta fiha ku direktivanan di skol mester haña chèns pa
duna minister konseho riba vários tereno, entre otro riba areglonan di
èksamen pa skolnan sekundario. Si Direktiva di Skol a bati lunanan largu na
porta di minister, e ta den su derecho. Pero a tene direktivanan di skol for di
tur loke ta toka e lei ku mester regla e ahuste.
- Ahuste di eksigenshanan di èksamen sigur tin keber ku Hulanda. No pasobra
e diploma Hulandes ta esun mihó na mundu, sino pasobra Kòrsou mes ainda
no tin un diploma propio ku ta rekonosé na Hulanda, Merka, ni den region.
Den dokumentonan ku nos ta sita mas abou, minister(nan) di enseñansa ta
konfirmá ku balor di nos diploma ta estrechamente mará na diploma
Hulandes.
- Niun hende ni instansha no a stroba minister di enseñansa pa subi nivel di
nos alumnonan. Al kontrario. Minister Irene Dick a anunsiá 19 di yüni 2015
ku Kòrsou nó ta ahustá eksigenshanan di èksamen pa havo i vwo komo esei
lo por pone mas mucha zak pa e èksamen. Ta bou di insistensia di
mayornan, komunidat i direktivanan di skol, minister a disidí ku lo ahustá e
eksigenshanan tòg i a pidi alumnonan pa nan hasi nan máksimo esfuerto pa
alkansá e eksigenshanan mas haltu.
Hechonan resumí kronológikamente:
Aprel 2010
Ministerio di Enseñansa, kultura i siensia na Hulanda a skirbi gobièrnu di Antia pa
– en konsulta ku otro – duna kontenido nobo na e “Protocol van Samenwerking op
2
het gebied van Onderwijs”. E protokòl akí ta trata vários tema, entre otro
eksigenshanan di èksamen pa havo i vwo.
26 di sèptèmber 2012
Bou di Minister di Enseñansa, sr. Carlos Monk, Kòrsou a ahustá un parti di e
eksigenshanan di èksamen pa havo i vwo. Den un dokumento fechá 26 di
sèptèmber 2012 ministerio a fiha ku lo ahustá e eksigenhanan di èksamen sémper
ku tin un bon motibu pa hasi esei. Ministerio a splika tambe ku el a ahustá e promé
parti di e eksigenshanan di èksamen pa e diploma di Kòrsou mantené e mes balor
ku un diploma Hulandes.
16 di desèmber 2014
Minister di enseñansa di Kòrsou, sra. Irene Dick, i su kolega Hulandes, a firma un
protokòl di koperashon nobo. Den e protokòl e ministernan a akordá ku Kòrsou lo
sigui ahustá e eksigenshanan pa havo i vwo, pa e diplomanan di Kòrsou keda ku
mes balor ku e diplomanan Hulandes. Miéntrastantu Hulanda lo garantisá ku nos
diploma di havo lo keda ekivalente na esun Hulandes te 1 yanüari 2016 i esun di
vwo te 1 yanüari 2017. Despues lo evaluá te na unda Kòrsou a ahustá e
eksigenshanan. A base di esei lo disidí si e diploma di Kòrsou lo mantené e mes
balor ku e diploma na Hulanda despues di promé di yanüari 2016 (pa havo) i 2017
(pa vwo).
19 yüni 2015:
Minister Irene Dick ta saka un karta dia 19 di yüni den kua e ta anunsiá ku Kòrsou
no ta ahustá su eksigenshanan di èksamen pa havo i vwo komo esei lo por pone
mas mucha zak pa e èksamen.
20 di yüli 2015
Despues di reakshonnan fuerte di mayornan, komunidat, i direktivanan di skol,
minister di enseñansa a bisa den un karta di 20 di yüli 2015 ku lo sigui ku ahuste di
e eksigenshanan di èksamen tòg, pa sigurá ku nos diplomanan lo mantené mes
balor ku un diploma Hulandes.
For di òktober 2015
For di òktober 2015 Direktiva di Skol katóliko a ofresé minister i su ministerio
yudansa den tur reunion struktural, tur luna di nobo, pa sigurá ku e ahuste di
èksamen ta keda reglá na tempu i korektamente. E lei ku mester regla e ahuste ta
un materia detayá i kompliká. E skolnan konserní lo por a kontribuí ku nan
eksperensia i konosementu.
3
Lei ta duna direktivanan derecho di konsehá
Artíkulo 4 di Landsverordening voortgezet onderwijs ta fiha ku direktivanan di
skol mester haña chèns pa duna minister konseho riba vários tereno, entre otro riba
areglonan di èksamen pa skolnan sekundario. E lei ta trata un materia detayá i
kompliká. Rèktornan di e skolnan konserní lo por a kontribuí ku nan eksperensia i
konosementu. Pero a tene direktivanan di skol for di tur loke ta toka e lei.
Fin di 2015
Direktiva di Skol Katóliko a kòrda ministerio di enseñansa ku e rekonosementu di
nos diploma di havo ta vense 1 yanüari 2016. Esei ta e fecha ku nos minister di
enseñansa mes a akordá den e protokòl di desèmber 2014. Ministerio a laga sa ku
entre tantu nan a palabrá ku Hulanda ku e lei ta drenta na vigor mas lat.
Aprel 2016
Dentro di algun siman nos hóben alumnonan ta pasa èksamen di havo i vwo. Tur
dia, sin eksepshon, mayornan ta yama puntra kon ta pará ku e lei ku mester sigurá
ku nan yu por sigui studia afó ku nan diploma. Asta pa sigui studia na Kòrsou, e ta
importante. University of Curaçao ta traha ku otro institutonan ku ta asumí ku e
studiantenan ta drenta ku un diploma ekivalente na esun Hulandes.
Nos t’ei pa yuda otro
Den un trayekto di lei, hopi kos por bai robes. Dos aña pasá kaba, tempu ku a
introdusí e promé ahuste di e eksigenshanan, nos a deskubrí un fout den e
kriterionan pa slag. Komo pais nos mester sirbi e interes di nos alumnonan dor di
pone nos konosementu i eksperensia huntu.
Palabra di minister
En berdat minister a bisa vários biaha ku tur kos lo keda kla. Direktiva di Skol
Katóliko no ta duda den minister su boluntat. Pero ora e momentu yega, e úniko
kos ku ta konta ta si tur kos ta bon reglá pa lei. I na e momentu aki, ku èksamen
den porta, ainda esei no ta e kaso.
----------------