Con pa logra sali fo`i cas na tempo mainta

Articulo di siman di 16 september 2012
Con pa logra sali fo’i cas na tempo mainta
Combatie e locura di tur mainta den siman...
Alarma ta zona. Bo yiu ta bula fe cama, feliz y contento. Despues cu e skeiro djente, e ta scoge su pañanan y pone nan
cla riba cama. Prome cu e bay come su cornflakes, e ta check si su huiswerk ta den su tas. Pa ora abo sali fe cas, e ta
para cla band’i auto, pura pa bay scol pero e ora….. bo a spierta.
Lastimamente esaki ta pasa solamente den soño of dia bo yiu haci aña. Mayoria bes bo mainta ta
cuminsa cu un lucha pa lanta bo yiu fo’i soño, ora bo yam’e pa come pa di 3 bes, e ta mitar bisti,
hungando riba su DCI, y e no kier e pan cu keshi cu bo a prepara p’e hiba scol. Na caminda e ta bisa bo
cu su huiswerk a keda riba mesa di comedor...
Pa mayoria mayor, e maintanan den siman ta causa bastante dolor di cabes.
Kico por haci pa baha e stress y cuminsa cada dia na un manera mas positivo?
Aki ta sigui tips cu por yuda gana tempo mainta.
1. Haci e rutina di mainta parti di bida. Mayoria bes e teimamento, discusion y negociamento ta
causa cu e mucha ta cay laat pa scol y abo pa trabou. Establece un rutina absoluto den lanta fo’i
soño, skeiro djente, baña y bisti, come y check tas. Por ehempel: si bo no lanta fo’i cama
mesora, bo ta bay drumi 15 minuut mas tempran anochi. Un rutina ta no-negociabel, e no por
ta un opcion.
2. Lanta bo yiunan apart: si bo tin mas cu un yiu, cuminsa cu esun cu tin mas dificultad pa lanta of
esun cu ta tarda mas den baño of cu ta come mas slow.
3. Prepara e anochi anterior: laga bo yiu scoge su paña, mea, keds y hasta acesorio pa cabey y
pone nan cla prome cu e bay drumi. No permiti cambio di decision ora e lanta mainta. Bo lo
gana tempo cu esaki pero mester keda consecuente.
4. Planea desayuno pa henter siman. Desayuno ta e cuminda mas importante di e dia. Hunto cu e
mucha, planea kico ta bay come tur mainta di dialuna pa diabierna. Atrobe, keda consecuente
cu esaki.
5. No duna mucha tarea extra prome cu scol: si bo kier pa bo yiu drecha su camber prome cu e bay
scol, haci esaki un regla. Laga tareanan manera duna e pushi cuminda pa despues di scol.
6. Tas y pan cla pa bay. Dependiendo di su edad, laga bo yiu carga e responsabilidad pa prepara su
tas prome e bay drumi. Si e ta un kleuter, prepara su pan cu juice e anochi anterior.
7. Permiti bo yiu drumi laat den weekend of riba dianan liber di scol. Esaki ta yuda bo yiu acepta e
rutina di scol miho y compronde cu cada hende mester un break den rutina debesencuando.
8. Stimula bo yiu pa ta responsabel: mucha por lanta nan mes fe soño cu un wekker of alarma. Si
bo yiu tin su propio wekker, pone leu fe su cama. Asina e ta obliga pa lanta fe cama pa pag’e.
Siñ’e programa su wekker pa e cantidad di tempo cu e mester pa prepara tur mainta.
9. Modela comportacion positivo: si como mayor bo ta lanta semper laat, cu mal beis y bou stress,
no por spera otro di bo yiu. Duna un bon ehempel den lanta na ora y cuminda bo yiu cu un brasa
y “bon dia”. Establece e custumber di AMP (Actitud Mental Positivo) den bo cas. E ta funciona!
Articulo tradusi y prepara pa FPNM. Fuente www.childcare.about.com di articulo “Morning madness”. Pa
pregunta y mas informacion riba educacion por acerca Fundacion Pa Nos Muchanan, Cumana 2, tel. 5834247 / 588-0856, fax. 583-5658 e-mail: [email protected] of bishita nos Website www.fpnm.aw