Un mucha felis tin auto

Articulo pa siman
di 2 november 2009
Un mucha felis tin auto-estima positivo
Tur mayor ta carga speransa cu nan yiu lo desaroya un balor propio positivo. Y hustamente esaki ta e
responsabilidad di mas grandi cu bo tin como mayor, y cu ta alabes un tremendo reto. Un persona cu ta balora
su mes positivo ta sinti cu e tin hopi pa contribui na mundo. E no tin miedo pa enfrenta mundo, e ta traha duro
pa logra su metanan y e ta wak bida cu anticipacion y placer.
For di trempan un baby su identidad propio ta cuminsa forma. E baby ta sinti con
hende ta reacciona riba dje y tambe con nan ta mir’e. Un mayor por stimula su
baby pa e sinti’e bon cu su mes, dor di reconoce e calidadnan unico cu e tin. Dor di
tene cuenta cu su temperamento bo por ahusta bo expectativa pa e cuadra mihor cu
su personalidad.
Mucha cu tin confiansa den su mes ta acepta retonan di bida y ta coopera cu otronan rond di dje. Di otro banda,
mucha cu falta confiansa den su mes ta wak solamente unda e la faya y no kico e la logra. E ta wak problema na
lugar di reto y ta wak dificultad na lugar di posibilidad. Tin diferente manera pa bo stimula e auto-estima di bo
yiu. Un di nan sigur ta bo aceptacion positivo y incondicional na tur momento y den tur situacion. E reto mas
grandi ta pa bo keda acepta bo yiu como persona, tambe ora cu bo no ta aproba su comportacion.
Reconocimento y elogio honesto
Reconocimento honesto y elogio sincero ta bin di curason y ta dirihi na algo specifico cu bo yiu
a haci. Si tur ora bo ta usa e mesun frase p.e. “Bon trabao!!” pa locual bo yiu a haci, ta yega un
momento cu e frase ta perde su significacion pa bo yiu. Ta mihor pa specifica kico bo ta
elogiando, p.e. “Bo a traha duro pa construi e toren di blokki ey.” of “Danki pa yuda Jair
recohe su co’i hunganan.” Ora bo duna bo yiu un reconocimento trata pa haci’e na un manera
cu e ta keda satisfecho cu locual cu e alogra. Esaki ta mas efectivo dor cu e ta ponr bo yiu
sinti’e competente y asina su logro ta pon’e sinti bon.
Respet
Respet ta otro componente cu ta reinforsa bo yiu su balor propio. Tin diferente forma pa mustra respet na bo
yiu. P.e. den algun caso bo por duna bo yiu diferente opcion pa e por scohe di nan y ora e tuma su decision bo
ta respeta esaki. Dor di pone confiansa den bo yiu su abilidad pa tuma decision, bo ta yud’e desaroya su autoestima. Un otro manera pa mustra respet na bo yiu ta ora bo splic’e e rasonnan tras di bo reglanan of
decisionan. Tambe bo ta mustra respet dor di evita di papia dilanti di bo yiu cu un otro persona tocante di dje, al
menos cu e mes ta participando na e combersacion.
Competente
E factor mas efectivo pa stimula bo yiu su balor propio ta dor di yud’e bira competente den algo y pa e sinti cu
e tin control y experticio riba un tereno specifico. Asina cada biaha cu bo yiu haci algo bon, e ta sinti’e
competente pa loke e la haci y no pa loke hende a bis’e. Aki ta sigi 6 manera practico pa yuda bo yiu bira mas
competente:

Duna bo yiu oportunidad pa e haci su mes un scohencia y pa e ta mas independiente posibel.

Prove’e cu diferente experencia y actividad pa asina e por experencia exito.




Crea oportunidad cu ta alabes un reto pero cu no ta demasiado dificil of frustrante pa bo yiu. Tene
cuenta cu un mucha cu ta desaroyando un abilidad nobo mester por practica y keda purba varios
biaha te ora cu e logra.
Stimula diferente abilidadan pa mucha muher y mucha homber y no reinforsa ideanan stereotipico,
esta wega basa riba su sexo.
Ofrece bo yiu diferente actividad creativo unda e por explora e proceso
di creacion y expresa su idea y sentimentonan.
Ofrece bo yiu oportunidad pa hunga y socialisa cu otro mucha y stimula
nan pa sali bon cu otro.
Fuente: “I’, Glad I’m Me: Developing self-esteem in youg children” riba www.pbs.org
Pa mas informacion por acerca nos libremente na Cumana 2 of na telefon 583-4247 / 588-0856,
fax 583-5658 of e-mail [email protected].