Con pa proteha bo yiu di alcohol?

Articulo pa siman
25 januari 2010
Con pa proteha bo yiu di alcohol?
Pa preveni uso di alcohol cerca muchanan ta bon pa cuminsa discuti for di edad
jong caba di e uso y abuso di alcohol. Mester sigi papia habri pareu cu nan ta
crece.
Efecto di alcohol y abuso di substancia
Alcohol ta interveni cu percepcion di realidad y abilidad di un persona pa haci
bon decision.
Efectonan riba termino cortico di bebe alcohol ta e.o.
 bista trastorna, oido inclaro y malcoordinacion
 percepcion y emocion ta cambia
 no por husga bon, loke por ocasiona accidente, hogamento y otro
compartacion di riesgo
 rosea hole malo
Efecto riba termino largo ta e.o.:
 malesa di higra y cancer di higra
 perdida di apetit
 deficiencia serio di vitamina
 daño na curason y sistema central di nervio
 perdida di memoria.
Papia cu bo yiu tocante alcohol
Infancia ta un tempo pa siña y descubri. Pesey ta importante pa provee un
ambiente na cas cu ta permiti y encurasha bo yiu pa haci pregunta y descubri su
ambiente. Por ta bo yiu ta haci bo pregunta cu no ta facil pa contesta. Pero si bo
por crea un ambiente habri pa papia sincero cu otro for di chikito, bo por pone un
bon base pa bon comunicacion ora den futuro topiconan dificil bin dilanti.
Mucha di 3 – 4 aña
Aunke mucha di edad aki no ta cla ainda pa siña e hechonan tocante alcohol y
otro droga, e por cuminsa desaroya e abilidad pa tuma decision y soluciona
problema cu e tin mester despues. Bo por yud’e desaroya esaki na manera simpel.
Por ehempel: lag’e scohe su paña cu e ta bisti. Purba pa no worry cu e paña ta pas
cu otro of no. Pero, laga bo yiu sa cu bo ta haya cu e por haci bon decision.
Encurasha bo yiu p’e haci tareanan cu ta adecua pa su edad y lag’e sa cu e t’un
gran yudansa pa bo. Tambe ta importante pa bo dun’e bon ehempel cu bo kier pa
e sigi. Specialmente na e edad aki mucha gusta imita comportacion di adulto. E ta
un di e manera cu nan ta siña. Kier meen dor di ta activo, come saludabel, bebe
responsabel, mayornan por siña nan yiunan lesnan importante.
Mucha di 4 – 7 aña
Mucha di edad aki ta pensa y siña principalmente dor di experencia. E no ta
comprende bon ainda e cosnan cu por socede den futuro. Pesey ta bon pa mantene
combersacion riba alcohol na e situacion actual, diario y conecta na persona y
situacion cu bo yiu conoce y por comprende. Por ehempel, ora bo ta wak
television cu bo yiu, bo por papia cune tocante mensahenan di propaganda.
Puntra bo yiu tocante e propaganda y encurash’e pa puntra bo tambe.
Hopi mucha di e edad aki ta interesa den funccionamento di nan curpa. Pues esaki
ta un bon tempo pa papia di mantene bon salud y evita substancia cu por afecta
bo curpa. Bo por bisa bo yiu cu alcohol ta afecta bo abilidad pa mira, scucha y
cana riba caya sin trompica. E ta afecta bo manera di sinti y e ta haci cu bo no por
calcula profundidad di awa di lama/pool, of si tin un auto ta yegando mucho cerca.
Tambe alcohol ta duna bo mal rosea y dolor di cabes.
Mucha di 8 pa 11 aña
Den e delaster añanan di scol basico ta un tempo crucial pa por influencia bo yiu
su desicionnan encuanto uso di alcohol. Mucha di e edad aki kier sa mas di loke
ta hecho, specialmente di cosnan straño. Nan ta loco pa sa con cos ta hinca den
otro y ki fuente di informacion tin na nan disposicion.
Esaki ta e tempo mas adecua pa discuti cosnan tocante alcohol: su efectonan y
consecuencia riba termino largo y cortico. Esta, e efecto di alcohol riba varios
parti di curpa di hende y specialmente e peliger di alcohol pa curpanan den
crecemento.
Tambe amigonan di su edad por tin un influencia pisa riba dje na edad aki. Loke e
grupo di amigo ta pensa por determina e interesnan di bo yiu. Pues ta un bon
tempo pa siña bo yiu p’e bisa “no” pa presion di su pareunan. Enfatisa hopi e
importancia pa e yiu por pensa y actua riba su mes. Combersacion asina por tuma
lugar na momentonan cu normalmente boso sa sinta papia cu otro.
Siña bo yiu bisa “no”
Bo por siña bo yiu varios manera pa haci ora hende ofrece alcohol:
 siña bo yiu haci pregunta. Ora un hende ofrec’e algo pa bebe cu e no
conoce, bis’e pa puntra: “Kico esaki ta?” of “Na unda b’a hay’e?”
 siña bo yiu pa e bai di un situacion/un lugar ora e no ta sinti su mes bon
eynan. Percura cu bo yiu tin bo number di telefon of di un adulto
responsabel p’e yama pa bin busc’e.
 siña bo yiu pa nunca e bai den auto cu hende bebi. Lag’e yama bo pa bin
busc’e of puntra otro adulto conoci pa hib’e cas.
 encurasha bo yiu pa e bisa “no, danki!” ora hende ofrece alcohol.
Algun tip mas
Afortunadamente tin hopi cos cu mayornan por haci pa proteha nan yiu di uso of
abuso alcohol:
Sea un bon ehempel. Pensa cu bo uso di alcohol of medicamento por
influencia bo yiu. Bo por ofrece bebida no-alcoholico ora tin fiesta pa
mustra bo yiu cu no mester di bebe alcohol pa hende pasa pret.
Educa bo mes riba loke ta alcohol. Asina bo por ta un mihor maestro pa
bo yiu. Lesa y colecciona informacion cu bo por comparti cu bo yiu y
otro mayornan.
Sea conciente di cosnan cu bo por haci pa yuda bo yiu aumenta su amor
propio. Mucha ta sinti su mes bon ora bo enfatisa loke e ta haci bon y
ora bo reinforsa comportacion sano.
Siña bo yiu pa anda cu presion na manera sano, p.e. busca conseho di
un adulto cu e ta confia of haci su actividadnan cu e ta gusta.
Fuente: articulo “Kids and alcohol” – Kids Health
Pa mas informacion y conseho por aserca Fundacion Pa Nos Muchanan, Cumana 2,
tel. 583-4247, 588-0856, fax. 583-5658, e-mail: [email protected] , website: www.fpnm.aw