Tim di HNO USONA ta pone man na obra den Otrobanda

 Komunikado di prensa 23 di mart 2015 Tim di HNO USONA ta pone man na obra den Otrobanda Willemstad – E tim di Hòspital Nobo Otrobanda di USONA a traha ku masha entusiasmo durante fin di siman na renobashon di un vèlt di deporte pa hóbennan den Otrobanda. Den kolaborashon ku FDDK a hinka hopi energia den e proyekto, loke a pone ku e tim a kaba asta mas trempan ku e ora planeá. E kordinadó di e tim di FDDK a duna di konosé despues, ku na komienso e tabatin su dudanan pa traha ku e tim grandi ku lo a bini. E tabatin miedu ku hendenan lo a stroba otro. Pero despues a resultá ku e kolaborashon a kana hopi efektivo i ku e hendenan hustamente a komplementá otro hopi bon. Ya pa un tempu kaba Berenschot (akshonista di USONA) ta duna un kontribushon finansiero na Curacao Cares, pero e aña aki e tim kier a duna un kontribushon físiko. Pa e tim di USONA no tabatin nodi di pensa muchu largu riba un posibel partisipashon na CuraDoet. Speshalmente no ora por a mira riba e wèpsait di CuraDoet ku mester di boluntario pa Sentro di Bario Otrobanda. Miembronan di e proyekto di HNO Paola Lievano Cruz (ingeniero di konstrukshon) i Esmeralda Wiel (konsehero di komunikashon) a skohe mesora pa e aktividat boluntario aki. E tim di HNO ta hopi konsiente di e impakto ku e hòspital nobo lo tin riba Otrobanda. Den kuadro di esaki Dito Garmers i Esmeralda Wiel-­van der Velden (USONA) algun siman pasá a tene un mainta di informashon pa Federashon Otrobanda. Próksimamente lo pone un fecha pa informá e habitantenan den bisindario tambe. E vèlt di deporte na Sentro di Bario Otrobanda, ku tabatin hopi nesesidat di un renobashon, a risibí un bèrdadero ‘facelift’. E tim a fèrf e murayanan, a pone un waya nobo i a pone un man di fèrf nobo riba e flur. Djaluna e tim di FDDK lo hala e liñanan di e vèlt di futbòl/ basket di nobo. E tim di USONA di Hòspital Nobo Otrobanda ta kontentu di por a duna un kontribushon i ta entusiasmá pa bolbe pone man na obra otro aña.