Nos mes por

Nos mes por
Mi tin kasi trinta aña bibá na Kòrsou. Banda di siudadano karibense mi ta tambe un oropeano
pashoná. Sintá kant’i kagel, mi generashon a tende nos mayornan bisa kada bes di nobo ku lokual ku
a sosodé den Di dos Guera Mundial no tin mag di sosodé nunka mas. Den añanan setenta di siglo
pasá, unifikashon di Oropa den Union Oropeo tabata e kulminashon lógiko di un deseo profundo
pa eliminá guera i bataya entre paisnan chikí i grandi. Union na lugá di divishon. Nos tin un
monumento na Kòrsou ku ta representá e deseo general pa union ku tabatin e tempu ei.
Lástimamente tur e paranan di e monumento akí a bula bai entretantu. Nan a bandoná nan
konstelashon antiano-hulandes. E konsenshi i konekshon di reino tambe ta disparsé. Reino a
kuminsá tambaliá.
Dor di Brexit, tin e menasa ku e proseso di desintegrashon lo sigui tuma lugá na Oropa tambe. Esaki
ta yenami ku horor. E horor ku mi ta sinti ta keda okashoná prinsipalmente dor di e demagogia riba
kua e prosesonan di alienashon akí ta basá. Ta manera kos ku tur kaminda na mundu e hòmber
'gewon' ta gusta pa nan tum’é hasi den un proseso ku ta keda instigá pa un kombinashon di e
sintimentu ku ta tratabo malu, ignoransia i bobedat na un banda i elitismo, hasimentu di ganashi i
arogansia na otro un banda. Den paisnan hopi grandi i hopi chikí bo ta mira e instigadónan di e
proseso akí: Trump, Schotte, Wilders, Le Pen, ku nan aspirashonnan polítiko, nan tur ta saka
probecho for di e kòktelnan peligroso akí. I pueblo ta kore tras di esakinan.
Brexit tin un elemento alarmante adishonal: gran mayoria di hóben a vota pa 'Remain'. Gran mayoria
di hendenan mas grandi a vota pa 'Brexit' (NRC, 26 di yüni 2016). Asina e generashon mas bieu
saliente a horka e generashon hóben (ku mester bai biba ku Brexit) ku un herensia insigur, basá riba
nostalgia antikuá i ilushonnan di pasado.
Komo isla chikí nos por siña masha hopi akinan. Tene kuidou ku e pensamentu ku bo por tur kos
riba bo mes. T’asina ku e tentashon ei ta mas grandi ainda ora ta trata di un isla, grandi òf chikí.
Kuidou ku demagogonan i gañadónan di pueblo i prinsipalmente: no balotá nan, pasó e tera fértil pa
nan informashon falsu ta ekselente den e tempu di awor akí. Kuidou ku definishon di futuro den
término di pasado i laga hubentut na palabra ora ta trata di futuro. I ku esaki mi ta bira e kolumna
akí tòg den direkshon di corporate governance: si polítika ta sembra mas divishon ku union, sòru e
ora ei pa bo hasi lo kontrali den bo empresa. Esaki por internamente, pero eksternamente tambe
dor di drenta akuerdonan di kooperashon riba nivel nashonal i internashonal. Un ret mundial di
konekshonnan komersial ta mesun importante pa pas mundial komo konekshonnan entre paisnan. I
involví hubentut: ora ta papia di diversidat den sala di direktiva mester tin representashon hubenil
tambe. Maske ta un so.
1