venequip ta otorga beka “think big” kompletamente gratis pa studia

Djasabra 23 Òktober 2010
24
VENEQUIP TA OTORGA BEKA “THINK BIG”
KOMPLETAMENTE GRATIS PA STUDIA NA ECUADOR
WILLEMSTAD.- Si tin un notisia ku ta
realmente bale la pena kompartí den EXTRA
Djasabra ta esun di beka kompletamente
grátis pa studia na Ecuador ku Venequip
Curaçao ta otorgá. Esaki ta un bon oportunidat
pa kualke studiante ku a bin ta anhelá e
posibilidat di por avansá akadémikamente
sin tin ku paga sumanan astronómiko na
final. Hustamente teniendo na kuenta ku e
aspekto aki, Venequip Curaçao ta buskando
hóbennan, ku tin bon kalifikashon i ku
ta deseá di kontinuá ku nan estudio
universitario. Promé ku wòrdu selekshoná e
hóbennan lo mester práktikamente kompetí,
atraves di nan kualifikashonnan, motivashon
den bida i mas ku tur kos demostrá ku tin un
bon kondukta.
Esun ku finalmente ta kumpli ku e
rekerimentunan lo risibí un beka di estudio
den eksterior, ku ta spesífikamente den e
suidat Guayaquil, Ecuador, na e Instituto
Universitario “Benjamin Rosales Pareja”
(BRP) ku ta respaldá dor di Caterpillar.
Esnan ku risibí e beka por ta
kompletamente enfoká riba nan estudio
durante di e periodo na e instituto BRP, ya
komo ku Venequip ta garantisá e pago di
e estudio kompleto; gastunan di bida ku ta
enserá alohamentu, transporte, kuminda,
150 dòler tur luna durante periodo di estudio
pa artíkulonan personal; hèrmènt di estudio;
material didáktiko; un lèptòp i tres (3) biahe
pa aña (yüni, sèptèmber, desèmber) pa e pais
di orígen, ku den e kaso aki ta Kòrsou, pa
pasa tempu ku famia. E estudio universitario
tin un durashon di 2 aña i mei (2.5) i 6 luna
pa realisá un proyekto di graduashon (tésis). E
próksimo aña eskolar ta kuminsá mart 2011,
i lo kulminá den mart 2013. Naturalmente e
pregunta ku ainda falta pa kontestá ta: kua
titulo e hóben ku finalisá ku éksito lo risibí.
Tékniko Superior Universitario den Mekánika
‘automotive’, Motor i Ekipo Industrial. Pues
un titulo di Bachelor, ku manera a wòrdu
menshoná anteriormente ta respaldá dor di e
lider mundial pa loke ta mashin i motornan
pisá ku ta Caterpillar, loke ta hasi ku e tin un
rekonosementu mundial. EXTRA a kombersá
ku vários di e studiantenan ku a finalisá e
estudio, ku awor ta bahia tantu pa nan pais
di orígen pero tambe den eksterior pa resolvé
problemanan ku ta presentá sea den ámbito
Industrial, Marina, Konstrukshon etc..,
hasiendo uso di e konosementu atkerí atraves
di nan estudio na BRP.
En bista ku e teknologia automotive tambe
ta avansá, e studiantenan ta sera konosé ku
hèrmènt i métodonan komputarisá riba un
nivel ku ta wòrdu respetá dor di esnan ku tin
hopi tempu trahando riba e tereno aki.
Loke ku ta tuma un tékniko entre 8 pa 10
aña pa atkerí basá riba eksperiensha, ta wòrdu
lográ den 3 aña i na un edat di apénas 21 òf
22 aña.
E úniko kondishon ku tin mará na e beka ta
ku despues ku e studiante terminá ku éksito,
tin un kontrakt obligatorio di 2 aña komo
tékniko pa Venequip Curaçao N.V.
Huntu kuné un plan di karera ku ta enserá,
kresementu profeshonal i personal.
Anto un salario di 3500 florin ‘bruto’, djis
pa kuminsá, ku evolushon salarial segun e
kresementu.
Venequip tin ya kaba 12 hóben den nan
staf di personal ku a finalisá e estudio i
aktualmente tin 4 hóben ku ta den nan
promé i di dos aña. Mirando e formashon ku
e studiantenan ta risibí no solamente riba
nivel tékniko pero tambe e aspekto di karakter
ku ta hasi nan persona íntegro, Venequip
Curaçao N.V. ta konvensí ku e ta un tremendo
oportunidat pa studiantenan di Kòrsou.
Sigui lesa próksimo página 25
Proyekto di estudio ku un studiante a
traha.
Studiantenan dediká i komprometé pa progresá den bida
danki na e oportunidat úniko ku nan a haña.
E salanan di estudio ta konta ku tur loke ta nesesario pa
garantisá éksito di estudio.