1. INTRODUCIÓN 2. LA CASA TRADICIONAL a. LA COCINA b. LOS
Anuncio
1 1. INTRODUCIÓN 2. LA CASA TRADICIONAL a. LA COCINA b. LOS CUARTOS c. LA SALA d. EL CORREDOR e. LES GALERÍES f. EL DESVÁN g. EL FORNU h. LA CORRADA – L‟ANTOXANA 3. 4. LOS MATERIALES a. LA PIEDRA i. TIPOLOXÍA ii. LA CIMENTACIÓN iii. LA MAMPOSTERÍA iv. LES CUBIERTES v. LOS VANOS b. LA MADERA. c. L'ACABÁU d. LOS ELEMENTOS VEXETALES e. EL VIDRU f. EL BARRU Y EL CAL g. EL FIERRO h. LA CERÁMICA LA TIPOLOXÍA DE LES CASES a. LA CASA REDONDA b. LA CASA TERRENA c. LA CASA MARIÑANA d. LA CASA TIPU VIDÍU e. LA CASA DE TURRIA f. LA CASA DE PATÍN g. LA CASA DE BLOQUE h. AS CASÍAS i. LA CASA DE CORREDOR j. LA CASA DE PORTAL k. LA CASA DEL PASTOR l. LA CASA DEL PESCADOR/MARINERA m. LA CASA TIPU CANGAS n. LA CASA D'INDIANOS 5. PATRIMONIU ARQUITECTÓNICU AGROPECUARIU a. LES BRAÑES b. L'HORRU I. ORÍXENES Y EVOLUCIÓN II. EL SOFITU III. EL CUADRU IV. V. VI. VII. c. d. e. f. g. h. i. k l m n ñ LA COLONDRA EL CUADRU CIMERU LA CUBRICIÓN LA DECORACIÓN i. ESTILU VILLAVICIOSA. ii. ESTILU AYANDE. iii. ESTILU CARREÑO LA PANERA LOS CABAZOS LOS ZARROS, PORTIELLOS, SEBES… LOS CALECHOS LOS PALOMBARES EL TENDEYÓN LOS CORTINOS y TALAMEIROS LES CORRIPES O CORRIPOS LA CUADRA O CORTE LA CORRIPA O CUBIL LES TENAES, PAYARES O PAYEIROS LES ERES 6. PATRIMONIU ARQUITECTÓNICU CIVIL 7. PATRIMONIU ARQUITECTÓNICU RELIXOSU 8. PATRIMONIU ARQUITECTÓNICU VITIVINÍCOLA a. LOS EMPARRAOS b. LOS BANCALES Y CABANES c. LES BODEGUES 9. PATRIMONIU ARQUITECTÓNICU INDUSTRIAL i. LES FERRERÍES, MAZOS Y FRAGÜES ii. LOS MOLINOS Y BATANES iii. LES FONTES Y LLAVADEROS iv. LES PONTES v. LES INSTALACIONES MINERES 1. INTRODUCCIÓN Índiz La hestoria de les nueses construcciones populares bien pudiera entamar cola casa de formes ovalaes y redondes de los castros de la primer Edá del Fierro (sieglu VI a. C.). Nesta dómina les cases son de tamañu pequeñu (5 o 7 metros de diámetru) y tán llevantaes con una estructura de vares entetexíes cubiertes de barru, que sofita nun zócalu de piedres d'alredor de mediu metro d'altor con un teyáu o cubierta de tipu vexetal. Yá na segunda Edá del Fierro y hasta la dómina romana, estes mesmes cases construyíense con murios de piedra, ampliando en dalgún casu'l so tamañu y calteniendo la cubierta vexetal. Na Edá Media, atopamos una casa de mayor tamañu na que conviven persones, animales y collecha, y asina va evolucionando hasta'l sieglu XVIII, nel que'l modelu común y predominante en tol territoriu asturianu yera la casa de planta baxa y tamañu pequeñu, con un interior que consistía apenes nuna cocina, una sala y corte - tenada. Los datos sobre la vivienda recoyíos nel Catastru del Marqués de la Ensenada (1752) de dellos conceyos asturianos nun dexen llugar a duldes: nesa dómina alredor del 80% de les cases yeren de planta baxa y el restu yeren “casa altes”, dalgunes con solana o corredor. A partir d'esta fecha la evolución de la casa pue resumise nes característiques siguientes: • Desenvolvimientu n'altor, cola fin de llograr más espaciu y dixebrar el ganáu de les persones. • Entueyu del interior con pieces nueves. • Usu xeneralizáu del corredor, que nes acabadures del sieglu XIX y empiezos del XX pasa a convertise en galería zarrada con cristales. Finalmente, nel sieglu XIX produzse un tresformamientu fundamental del caseríu asturianu, yá que la construcción de casa con planta baxa y un pisu va ser una aspiración de tolos llabradores d'esa dómina. Aramburu Zuloaga, nel 1899, menta cómo'l dineru mandao dende América polos fíos emigraos val a los padres pa que tresformen les sos cases humildes en construcciones remocicaes con más d'un pisu y formes más elegantes y vistoses. La tresformación de les cases garró tol territoriu asturianu, pero lóxicamente nun foi idéntica en tolos sitios, nin en tolos casos. Por casu, ente los vaqueiros d'alzada, grupu social que caltién una manera de vida treshumante, la vivienda tamién pasó de ser terrena a cuntar con planta baxa pa corte y un pisu pa cocina y cuartu, sicasí la construcción y el tamañu d'estes cases nueves nun puen comparase coles cases de corredor que construyeron a finales del sieglu pasáu otros llabradores asturianos. Adolfo García Martínez, na so obra La Casa Asturiana tamién resalta otru rasgu fundamental de la nuesa cultura tradicional, como ye l'ayuda ente vecinos pa la construcción de les viviendes. Los vecinos y familiares ayudábense mutuamente, tresportando piedra, barru, arena y madera pa la construcción, o dexando un árbol pa la viguería, emprestando una pareya de gües pal trabayu, etc. Alredor d'estes actividaes desenvolvíase parte de la vida social de les aldees. Tamién yeren habituales los convites y comíes colectives como “la robla”, fiesta qu'ufiertaba la familia a operarios, familiares y vecinos implicaos na construcción. La fiesta repetíase al cubrir “agües y llantar el ramu”, de fresnu, de texu o de lloréu, polo xeneral, que, asitiáu no más empicorotao de la cubierta, simbolizaba la culminación del procesu constructivu. Yeren munchos los ritos que se desenvolvíen alredor d'esti procesu social tan relevante. Ente ellos tamién yera bien frecuente l'asperxadura con agua bendito, especialmente n'obres de cierta entidá. Tamién yera común que'l primeru en pasar a la nueva casa fore la persona de mayor edá de la familia, etc. Otru ritual bien estendíu consistía n‟enterrar monedes so los cimientos de la casa nueva o una botella que contenía amás de monedes, una semeya de la familia propietaria. 2. LA CASA TRADICIONAL Índiz José Luis García Grinda, nel artículu “La casa popular asturiana”, publicáu nel tomu II de la Enciclopedia de l'Asturies Popular, afirma que pue falase ensin complexos d'un conxuntu de formes constructives que se repiten a lo llargo de tola nuesa xeografía con característiques comunes que dan forma a un conxuntu de modelos de viviendes populares y tradicionales propies de la nuesa tierra. Toes estes construcciones y edificios de l'arquitectura popular destaquen por ser tremendamente funcionales y adaptase siempres a la finalidá prevista y a los materiales disponibles en cada sitiu. Son construcciones llevaes a cabu con bien pocos medios y con técniques cencielles, con un orixe que se remonta a dómines anteriores tresmitíes d'una a otra xeneración per mediu la tradición oral. Trátase d'edificaciones coles meyores condiciones d‟habitabilidá qu'ofrecíen los escasos medios disponibles, como la orientación de la casa y el tamañu de los vanos, de mayor dimensión al sur y al este en detrimentu de les fachaes al norte. D'esta miente consiguíase aisllar la casa del fríu o'l mugor y caltener el calor internu gracies a una serie de recursos, como murios “rellenaos” de gran espesura, con estancies semiescavaes nel terrén, o con construcciones pegaes al mesmu. Como ye obvio la evolución técnica foi bien lenta y varió bien poco hasta mediaos del sieglu XlX, nel qu'apaez el desenvolvimientu industrial. Hasta esi momentu les técniques básense nuna llarga esperiencia colectiva y nel secretu artesanal de los distintos gremios, como los carpinteros, los ferreros, picapedreros, ente otros. 2 Estes contrucciones constituyíen la unidá básica de la propiedá, de la producción, del consumu y de la vida social. Fueron munchos los autores qu'afondaron nel estudiu de la nuesa arquitectura. Ente ellos, José Luis García Grinda, arquiteutu y profesor de la Escuela d'Arquitectura de Madrid, que basándose nos estudios de Balbás y Flores, establez unos tipos básicos de casa asturiana según la so situación xeográfica y el tipu de cubierta, yá sía de pizarra, de teya, vexetal... Otros autores añaden otres característiques morfolóxiques, como los portales, la escalera esterior o l'hermetismu constructivu; otros centren más la so atención nes considerances específiques del tipu d'economía de los moradores: agricultura, ganadería, pesca... Nós vamos tratar de tresmitir un pequeñu resume de les principales conclusiones a les que llegaron toos ellos. Independientemente del autor al que garremos como referencia podemos afirmar que la manifestación constructiva popular por escelencia ye ensin dulda la casa, centru del desenvolvimientu de les actividaes familiar y social. Col términu “casa” tradicionalmente faise referencia al conxuntu de construcciones onde s'agospiaba la familia y los animales domésticos asina como los almacenes y otres edificaciones pa guardar colleches y preseos; el so núcleu principal ye la vivienda, formada pola casa, la corte y en munchos casos la tenada. L'espaciu habitáu puramente dichu, constaba principalmente d'una serie d'espacios con usu estremáu que pasamos a describir: a. LA COCINA Ensin dulda yera l'espaciu fundamental, el centru de la casa, onde se realizaba la mayoría de les xeres diaries 1 . Nella alcuéntrase'l llar (l.lariega o lareira), el sardu o secaderu y el fornu. La cocina ye la pieza más importante de la vivienda tradicional, concentrando a los componentes de la familia alredor del fueu, la comida y el descansu. Ye tamién frecuentemente la parte de la casa de mayor superficie. Alredor del fueu disponíense los escaños2, de normal dispuestos en forma de L o O. Otros elementos que configuren el llar yeren el burru o guindaste pa encolingar el calderu del pote per mediu les pregancies. A partir de la década de 1920 y en munchos pueblos yá a mediaos de sieglu apaez la cocina económica, bilbaina o de fierro y asina los fueos baxos de los llares queden relegaos a cases antigües ensin reformar o adosaes a cases nueves totalmente anovaes. Estes cocines pasen a denominase cocines vieyes o cocines d‟afumiar y son pieces bien valoraes pola comunidá, yá qu‟en cierta manera representen a la casa y siguen usándose en munches d'elles p'afumar la matanza. En dellos conceyos, principalmente nel oriente, detrás del llar, na paré hai un güecu llamáu fornica nel que se guarda'l rescaldu y la ceniza pa blanquiar la ropa. Nes cocines asturianes nun solía haber chimenea lo que provocaba que'l fumu s‟espardiera per tola estancia ennegreciendo les parés. b. LOS CUARTOS Trátase d'alcobes bien pequeñes, normalmente namás había ún en cada casa, nel qu'hai espaciu solo pa lo imprescindible pa pasar la nueche. Hasta'l sieglu XIX nun lleguen a Asturies les primeres cames de fierro, colo que se desenvolvería l'usu y la evolución d'esta parte de la casa hasta lo que son anguaño. c. LA SALA De normal asítiase nel segundu pisu de la casa y suel ser una dependencia na que pue haber dalguna cama y dalgún mueble. Trátase d'un espaciu con pocu usu y vida; la so importancia reduzse a recibir a les visites del médicu, a los velorios de difuntos o a dalguna celebración escepcional. d. EL CORREDOR Munches cases asturianes teníen un corredorín nel que se curaben dellos productos de la tierra. Ésti solía construyise voláu sobre la prollongación de les vigues del forxáu inferior, y esceicionalmente con doble viga. La situación del corredor yera tamién aprovechada pa facilitar l'accesu a la vivienda per mediu un patín3 asitiáu nun estremu. Normalmente son rectangulares anque hai dalgunos con planta en L, qu'obliguen a conformar la estructura cimera con más elementos añadíos a les vigues del forxáu. 1 Aurelio del Llano en 1920 describe asina la cocina: “les cocines de les aldees astúriques suelen ser amplies abondo; el llar ta colocáu a ras del suelu y nel centru d’él enciéndese la llume”. 2 Según l‟ALLA: “Mueble formáu por un asientu onde se puen sentar delles persones a la vez, con un tableru suxetu a los brazos qu’al baxalu fai de mesa”. 3 Escalera de piedra pa baxar y xubir a una casa. 3 Dende'l sieglu XVIII solíen rematase con un tramu de barrotes de madera recortáu o torniamientos, rematáu por dos tramos zarraos con tabla nos llaterales. e. LES GALERÍES Esti ye ún de los elementos más distintivos de munches de les viviendes tradicionales asturianes. Trátase d'una estancia llarga y espaciosa, con munches ventanes, sostenida por columnes o pilastres; la so apaición nun se produz nel mediu rural hasta'l sieglu XIX siguiendo'l modelu de les cases de les villes marineres asturianes. Taben fechos de madera y cristal y fueron incorporándose a gran númberu de construcciones nueves nos núcleos más urbanizaos. Paradóxicamente esti elementu tan propiu de la nuesa arquitectura supunxo'l fin de munchos corredores propios de les cases de les aldees que camudaron en galeríes siguiendo la moda del momentu, ensin perder con ello lluz nin la utilidá de los mesmos. Les galeríes solíen tar dispuestes ocupando tol frente de corredor, zarrando la fachada con ventanes y ventanales munches vegaes del tipu de guillotina, que diben ensertaes en raíles verticales. Les galeríes de les nueses cases populares presenten munchos tipos de barrotes torniaos y de tables recortaes y calaes. De normal usen motivos tradicionales, como rosetes hexapétales, discos radiales, bandes de picos y semicírculos entellazaos de motivos xeométricos y vexetales. Los modelos más tardíos usen numberosos retayos de marquetería y bayura de colores. Dende finales del sieglu XIX tamién s'emplegaron los antepechos de forxa y de fundición principalmente nes villes y capitales. f. EL DESVÁN El desván o sobráu ye una parte fundamental de la casa asitiada na zona más alta, debaxo xusto del teyáu. Nella guarden colleches y trastos y de manera ocasional pue usase como un tipu de cuartu adicional. g. EL FORNU Ye una de les partes esenciales de la vivienda y de la cocina. De normal cocíase nél pan cada diez o quince díes y nos díes de fiesta. Los fornos tradicionales tienen una bóveda de perfil semiesféricu o apuntáu realizada con piedres, cascotes de teya o lladriyu nos más actuales. Los de piedra suelen emplegar una falsa bóveda con pequeños nichos na parte inferior pa recoyer la ceniza, que darréu usábase pa la colada y otros trabayos de la casa. El fornu pue apreciase a les clares dende l'esterior, yá que suel tar adosáu a la casa. N'ocasiones puen atopase fornos asitiaos nuna segunda planta, o en turria o sobre un muriu de carga con parte de la planta del fornu desenvuelta en voladizu. Delles viviendes probes que nun teníen fornu compartíen dalgún de les viviendes vecines. El fornu de pan construyíu nun volume independiente, denomináu dacuando casa de fornu, apaez bien representáu en tol occidente asturianu y abondos pueblos d'esta contorna. Suel tratase de construcciones exentes con cubierta a agües quebraes y el fornu desenvueltu al esterior nún de los testeros; el cuartu restante úsase pa la masera, los preseos y la lleña. Puen tener otru cuartu inferior aprovechando'l desnivel del terrén. En Cangas atópense dellos exemplos nos pueblos del valle de Naviegu, emplazaos nes corraes o na redolada de les cases. Nel conceyu d‟Ibias son tamién bien numberosos, con planta rectangular y estructura al esterior. h. LA CORRADA – L’ANTOXANA L'antoxana ye un elementu bien singular de l'arquitectura tradicional asturiana con un significáu que vien de la unión de los vocablos llatinos ante (delantre) y ostium (puerta). En delles zones d‟Asturies tol espaciu ocupáu y propiu de cada casa llamábase corral y podía tar zarráu con una gran muria aportalada, denomináse entós corrada o corralada. Trátase d'una figura tradicional de gran raigón n'Asturies: la so esistencia yá se documenta dende l'Alta Edá Media. Siempres cumplió una función de gran relieve nel mundu rural, amestada inseparablemente a les construcciones d'esta naturaleza, que nun se vieno usando solo como espaciu de trabayu, depósitu de ferramientes, carga y descarga, sinón tamién como sitiu d'espardimientu, descansu, y tertulia. La so característica fundamental ye la de dar serviciu, xeneralmente a la casa, pero tamién a la construcción o construcciones que se sirven d'ella, tales como l'horru, la panera, la corte, el tendeyón, la tenada o asemeyaos. A lo llargo de la hestoria, l'antoxana amosóse como una de les figures más dinámiques del derechu consuetudinariu asturianu derivando güei día nun sitiu d'espardimientu, descansu y conxusta. 4 3. LOS MATERIALES Índiz Xosé Fernández y Jesús Marcos nel llibru Aproximación a la arquitectura tradicional de los concejos de Cangas, Ibias y Degaña faen un análisis fondu de l'arquitectura popular d'esa zona d‟Asturies pero tamién describen de manera maxistral los distintos tipos de materiales usaos na nuesa arquitectura popular, que como ye lóxico vienen marcaos polos mesmos condicionantes xeolóxicos de la nuesa tierra. Nesta obra insisten nel emplegu xeneralizáu de materiales estrayíos o producíos nuna redolada más o menos inmediata y con un baxu nivel de tresformación respectu al so estáu natural; ello ye que la madera y la piedra son los materiales fundamentales. De siguío vamos describir brevemente los más usaos na nuesa tierra: a. LA PIEDRA Los tipos de piedra nes construcciones populares asturianes varien en función del so allugamientu xeolóxicu. Asina atopamos caliza na zona centro-oriental, sedimentaria nel centru o xiliza (arenisques, cayueles y cuarcites) nel occidente. La piedra úsase lo mesmo na cimentación que nos murios de carga, los vanos o güecos y les cubiertes. i. TIPOLOXÍA • Pizarra: Mui usao en mampostería yá que favorez l'emplegu de filaes bien regularizaes y precisa de bien poca argamasa. Esti tipu d'arenisca carbonífero favorez la sillería con acabaos bonos enforma y la posibilidá de realizar elementos decorativos tallaos. El so usu en cubiertes ye la más estendida nel occidente, onde se denominen l.lousas. Les lloses de pizarra estráinse d'afloramientos locales de distintes calidaes. • Cuarcita: Tamién usao en mampostería anque tállase con dificultá, polo que se procura disponer en forma de filaes homoxénees. • Arenisca y caliza: Les más habituales na zona centro-oriental. • Los regodones: Usaos nos pueblos como rellenu o pa pavimentos. Son bien abundantes nes vegues de los ríos. • Mármol o granitu: El so usu ye menor que les demás. ii. LA CIMENTACIÓN La cimentación tien por oxetu tresmitir al suelu tolos empuxes d'una edificación (muries y pilastres). Trátase normalmente de cimentaciones superficiales o directes puesto que se sofiten nes capes superficiales o poco fondes del suelu, por tener ésti abonda capacidá portante o por tratase de construcciones relativamente llixeres. Nesti tipu de cimentación, la carga repártese nun planu d‟apoyu horizontal. Solía consistir nuna zanxa que percorría tol perímetru de la construcción, formando una especie de zócalu con un anchor siempre más grande que los murios. Nel casu de terrenos más blandos solía usase un rellenu formáu por mampuestos y regodones, como asientu per debaxo de la zapata. La obra inicial consiste na escavación d'una trinchera de cimentación p‟acoyer la zapata, que sobresal ente diez y quince centímetros del restu del parámetru. En sitios con muncha rimada la zapata confórmase como un podiu y llega a constituyir banquetes y muries de contención de gran tamañu, más frecuentes dende mediaos del sieglu XIX. La roca madre tállase, dacuando n'abondu altor como pa formar parte del muriu n'alzáu, mientres que nel interior d'una casa en turria pue constituyir más de trés cuartes partes del altor interior. Los materiales de la escavación aprovechábense darréu pa la mampostería de la obra o nos mesmos rellenos. iii. LA MAMPOSTERÍA Trátase del sistema tradicional de construcción pa llevantar les parés y les muries na arquitectura popular. Tamién ye la solución más frecuente pa los zarramientos esteriores; los trabayos de cantería queden pa elementos singulares como encadenaos d'esquina, dinteles, antepechos. La mampostería de les muries y parés solía ser un trabayu n'equipu, asitiando los mampuestos de manera que les filaes fueren alternándose (dos piedres sobre una y una sobre dos) nivelándoles horizontalmente per mediación d‟un encamáu de barru. Cada ciertu tiempu y pa dar mayor consistencia a los murios asitiábense pieces pasantes pa llograr una mayor unión. iv. LES CUBIERTES Chocantemente la cubierta yera la parte de la casa menos dependiente del mediu natural. Los materiales emplegaos pa la construcción de los teyaos fueron munchos y bien variaos, pero n‟Asturies podemos falar principalmente de la teya curva, les lloses de pizarra, les llábanes de piedra caliar o cuarcita y mui en menor midida la 5 paya, sobre manera la de centén. Tamién s'usó la tabla de madera y la escoba, usada cuasi puramente nos conceyos de Somiedu y Teberga. Dende la Edá Moderna la teya foi imponiéndose en tol territoriu, sustituyendo a los demás materiales gracies a los teyeros de Llanes, que se constituyeron dende antiguo en trabayadores ambulantes. Treslladábense per toa Asturies y fuera d'ella fabricando les teyes nes proximidaes de los pueblos. Ye persabío también que l'occidente asturianu apaez caracterizáu pol emplegu de la pizarra, que, cola propia estructura llaminar facilita'l llogru de llábanos planos, lo que sumao a la so impermeabilidá permite'l so usu como cubrición en cubiertes. El so color y la so testura intégrense nel paisaxe perbién. Les pieces de pizarra asítiense superponiendo filaes asolapaes dende'l cantu o aleru nun faldón de la cubierta. En rimaes importantes, los llábanos de pizarra engánchense al armazón (cuasi puramente de madera) con clavos o tornos de madera na so parte cimera. En rimaes más suaves posábense sobre l'armazón evitando'l desplazamientu pol so propiu pesu. Delles veces colocábense también piedres sobre la pizarra en tol perímetru de los faldones. v. LOS VANOS Toa vivienda y construcción humana trai la necesidá d'allumar y ventilar les estancies, lo qu'implica necesariamente abrir güecos: puertes, ventanes, balcones, etc. Al abrir un vanu córtase la tresmisión de les cargues pel muriu al terrén, lo que trai una dificultá importante a la de construyir. Por esti motivu los vanos na nuesa arquitectura popular suelen ser de dimensiones pequeñes, estrenchos y de proporción vertical. Los vanos tienen cuatro pieces básiques: el cargaderu, los frontales o aguyes, los mandiles o pieces que conformen l'antepechu y la solera o piedra pasante que traviesa'l muriu y constitúi la base de sofitu del conxuntu. Nel citáu llibru Aproximación a la arquitectura tradicional de los concejos de Cangas, Ibias y Degaña descríbese refechamente la construcción de les puertes y cómo estes son un meru allongamientu vertical d'una ventana, por ello les ventanes de les plantes altes empezaron a tresformase en balcones en cuantes la mayor disponibilidá de vidru dio la oportunidá de zarrar vanos de mayores dimensiones. La conformanza de los vanos y les sos marcaciones varió muncho a lo llargo del tiempu. Les marcaciones más antigües facíense en madera y con sillería de gran despiece. Emplegábense grandes escuadres de castañal y carbayu que s‟ataben al muriu per mediu de travesaños tresversales de madera, encaxaos nes marcaciones. b. LA MADERA Ún de los materiales más abondantes n‟Asturies gracies a la so estensa superficie arbolada ye la madera. El carbayu y la castañal ye la madera usao tradicionalmente, el primeru pola so resistencia y durabilidá yera'l más afayadizu pa la vigues, pontones de forxáu, armadures del teyáu, etc. La segunda, dada la so ductilidá, resistencia y facilidá pa llabralo, emplégase tanto en vigues como en tablazón4 , pies derechos5 , suelos, corredores, carpinteríes de puertes y ventanes, muebles, etc. y especialmente nos elementos más emblemáticos: los horros y paneres. apear Quiciabes l'usu más llamativu de la madera nun ye'l propiu de la estructura de les edificaciones sinón el del mueble y la carpintería de les puertes y ventanes de la vivienda. Les puertes yeren primeramente de cuarterón, n'orixe con una canciella (o canciel.la) delantre pa torgar la entrada del ganáu en branu. Dempués van faciéndose más comunes les puertes de paños o casetones, qu'apaecen primero en viviendes de ciertu potencial y finalmente les de paños verticales enmarcaos. En cuantes al mueble presente nes antigües viviendes asturianes, hai que falar d‟armarios exentos tallaos en mayor o menor midida y dalgunos otros verticales empotraos nes muries, que puen recibir dalguna decoración xeométrica. Los más arcaicos d'éstos fórmense a partir d'un troncu vaciáu y llixeramente escuadráu. Tamién yeren bien habituales les alacenes pa guardar o colgar nelles la cacía. Tampoco falten les arques, na sala o en dalgún cuartu, y les maseres na cocina, o los escaños alredor del llar. Finalmente prestaríamos destacar l'usu bien estendíu de la madera na formación de les parés de 4 Conxuntu de tables que formen les cubiertes y cubren los llaterales. 5 N’arquitectura, llámase pie derechu al maderu vertical que sirve pa sofitar otru horizontal o inclináu. El pie derechu suel llevar zapata arriba o abaxo. Puen distinguise los siguientes tipos de pie derechu: Pie derechu de guion. El que nun tabique va d’abaxo arriba y guía la construcción de la fábrica. Pie derechu d’elección de puerta. Nos entramaos o tabiques de carpintería ye’l maderu que sirve de llargueru a una puerta o ventana. 6 munches cases conformando l'interior d'éstes con una estructura bien básica de palos verticales con cañes enxareyaes que finalmente cubríense con una gruesa capa de revoque de dellos materiales. Principalmente trátase de vares de castañal o ablanal entetexíes y revocaes de morteru en tabiques de separación interior o zarramientos parciales de corredor. N'otres ocasiones la estructura ye más complexa formando parés con una trama de pies de madera con enllistonáu de tables, asitiaes horizontalmente y los vanos rellenaos de ripiu, fueya de maíz, paya de centén revocao, etc. Úsense lo mesmo en zarros internos que n'estructures que dan al esterior. c. L'ACABÁU Los acabaos finales de les construcciones tradicionales varien enforma d'unes zones a otres d‟Asturies y tamién de los materiales más próximos y comunes na zona. Principalmente trátase de remates cenciellos y humildes na mayor parte de les viviendes pero hai numberosos detalles arquitectónicos d'especial guapura y singularidá. Nel occidente son bien habituales les viviendes que rematen con grandes lloses de pizarra nos zarros esternos de corredores. N'otres zones los zarros de corredores usen tables verticales, delles veces de distintes llargures. En delles viviendes, los acabaos de madera al esterior adquieren una gran superficie y guapura, con talles y colores de gran riqueza. Les terminaciones de piedra visto son tamién bien habituales en toa Asturies, yá que con anterioridá al sieglu XX namás recibíen revocu les casones, los palacios y les cases de families más pudientes. d. LOS ELEMENTOS VEXETALES Yá citemos l'usu d'elementos vexetales como la vares de castañal o ablanal nes parés o l'usu mui en menor midida de la paya, sobre manera la de centén, pa les cubiertes. Pero nun tenemos d'escaecer l‟usu bien peculiar de la escoba como forma de construcción de los teyaos de les viviendes del suroccidente d‟Asturies. Esti sistema nun ye esclusivu de la nuesa tierra, N'Inglaterra úsase'l triticale6; n'Irlanda, l'avena; n'Escocia, paya de ceberes y xuncos acuáticos; en Gales, amás de la paya, carrizos y xuncos de les buelgues; etc. Nel casu asturianu emplégase principalmente'l matu llamáu escoba o xinesta y l‟argaña o bericiu, qu'abonda nos montes de Somiedu, Teberga, Ozcos, Cangas del Narcea, Ibias y Degaña. e. EL VIDRU Xeneralízase‟l so usu a partir de la segunda metá del sieglu XlX, tres l'entamu de la so producción industrial n'Asturies, popularizándose'l so emplegu tantu en balcones como en galeríes. f. EL BARRU Y EL CAL Usaos solos o entemecíos con sable o otros conglomerantes usábase como revocu y llucíu lo mesmo en parés esteriores qu‟interiores. Sirve tanto pa impermeabilizar como pa saniar y enguapecer. Solíen llucir nes edificaciones más importantes cuando los murios de mampostería yeren de peor calidá. Les construcciones auxiliares de menor importancia solíen dexase cola piedra visto. g. EL FIERRO Ye‟l metal propiu de los ferraxes de picaportes de puertes y portones con gran cantidá de motivos decorativos y relixosos. Son frecuentes les iniciales del propietariu y símbolos protectores como la cruz o'l sagráu corazón. Tamién s'atopen motivos xeométricos variaos y de formes culebriformes. Esta gran variedá esplicase pol raigañu y fuerte tradición de les ferreríes n„Asturies. Otros trabayos menores de forxa yeren bien comunes como elementos de fixación, (clavos, goncios de puertes y ventanes) como de protección (peslleres, pestiellos, rexería) o ornamentación (aldabes, picaportes, etc.). h. CERÁMICA Dase principalmente en forma de teya de cubrición de teyáu, anque tamién en forma de lladriyu macizo o machetón pa la construcción de fornos o recercáu de vanos. Merecen mención especial los teyeros de Llanes, qu'algamaron gran sonadía. Pela primavera, en cuadrielles, espardíense per toa Asturies y fuera de les nueses fronteres fabricando lladriyos y teyes de gran calidá. 6 El triticale ye un cereal sintético, esto ye, que lo fabricaron les persones. Procede del cruciamientu ente trigu y centén. Considérase triticale lo mesmo’l centén cruciao col trigu fariñero (blandio), como lo llograo por cruciamientu col trigu duro; los triticales comercializaos anguaño proceden d'esti últimu cruciamientu. 7 Índiz 4. LA TIPOLOXÍA DE LES CASES Nel Gran Atlas del Principado de Asturias apaez una refecha clasificación de los distintos tipos de casa tradicional asturiana, pero hai dellos tipos más que detallaren otros autores en distintes obres y estudios etnográficos. De siguío vamos tratar de sintetizar cúalos son y en qué s'estremen: a. LA CASA REDONDA La casa redonda, d‟hacia los diez metros de diámetru. El nome gallegu de palloza o pallaza alude al material de cubierta, la paya. Tamién se la llama casa, corte o payeiru, según la función que desempeña. Anguaño caltiénense bien poques en bon estáu y nenguna d'elles ta habitada. En determinaes zones d‟Asturies usábense puramente como tenada o corte, especialmente nos conceyos d‟Ibias y Cangas del Narcea. Merez la pena lleer dos curties descripciones históriques d'esti tipu de construcciones. La que fai Hans Friedrich Gadow, naturalista alemán que viaxó per Asturies nel 1895, en conceyu de Ll.ena: “La baxada per distintu camín foi preciosa y bien interesante, conducióme a una braña, ye dicir un pacional d'altor que pel branu sirve pa tener ganáu. Esto nun se zarra, sinón que de nueche axúntenlo los pastores, que s’agospien en cabañuques asemeyaes a truébanos con parés circulares que tán formaes por palos verticales con cañes enxareyaes, y cúbrense con una gruesa capa de xinesta y felechu”. Tamién ye bien singular la que fai Fritz Krüger cuando describe nel conceyu de Cangas del Narcea nel 1927 les cases circulares. “Tol cuadru del pobláu ta apoderáu poles cases, con potentes teyaos de paya, qu'arrinquen en forma de punta cónica y que s'inclinen grandemente escontra un llau, y dexen na clarixa tolo demás. Por tanto les viviendes de planta circular o curvillinia tienen gran presencia nel mundu rural asturianu”. b. LA CASA TERRENA Florencio Cobo afirma nel llibru Arquitectura Popular Asturiana (1987) qu'hai un grupu bien habitual de cases que “presenten una planta tendente al rectángulu desenvuelta nun solu pisu, destinada a vivienda y corte, con aprovechamientu del espaciu baxo-cubierta pa desván y tenada”. Foi'l tipu más xeneralizáu de casa llabradora hasta'l sieglu XVIII, anque anguaño desapaició de dellos conceyos. Trátase d'un bloque a ras de suelu d'unos cincuenta metros cuadraos de superficie, nos que s'estremaba la cocina terrera, el portal, el cuartu y l'establu. Los materiales emplegaos son piedra pa les parés, y el teyáu ye d'escoba o piornu o bien de pizarra o teya a dos o trés agües, según les zones. Na so evolución apaecen otres dos variantes: casa terrena con cuartos n‟avance qu'amplía'l númberu de cuartos, y per otru llau, la corripa pa los gochos. Otra forma ye la casa terrena con avance y portal, que consiste n'ampliar el cuerpu de la casa orixinando un ampliu espaciu cubiertu, denomináu'l portalón, con múltiples funciones. c. LA CASA MARIÑANA Constantino Cabal dixo d'ella que yera “la de tola mariña, que tuvo antaño un tipu abundantísimu y que güei va morriendo a toa priesa”. Ye una casa terrena con dos cuartos n‟avance y portal central que suel asitiase al sur y tien un diseñu simétricu: dos murios con vanos pequeños y en mediu l'ampliu portal central que ye un espaciu p'abellugase de les inclemencies del nuesu clima. Esti portalón da accesu a les dos dependencies: a un llau la corte y al opuestu la cocina, dixebraes por una paré maestra. La cubierta ye de teya xeneralmente y a doble aguada. Na parte habitable ta la cocina y otros departamentos que sirven de cuartos. Ye frecuente qu'esta separación sía de tabla denominada boladru. Esta parte pue tar a teyavana o techase, y si ye asina da llugar al desván o solláu. Estes habitaciones suelen tener un suelu d'entabláu de madera, y nel baxo-cubierta ta‟l desván qu‟acueye‟l payar o tenada. P'aportar a él usase una escalera de mano. Los murios facíense en mampostería y taben llucíos. Suelen tar remataos con pieces de cantería nes esquines esteriores. Exemplos d'esta arquitectura estiéndense pelos conceyos de Xixón, Villaviciosa, Carreño, Gozón, Les Regueres, Llanera, Uviéu, Siero y Noreña. 8 d. LA CASA TIPU VIDÍU Denominada asina por Benjamín Menéndez, pa definir un modelu de cases que se distribúin ente El Cabu Vidíu y El Cabu Bustu, anque tamién apaecen dalgunes en parroquies del interior de los conceyos de Valdés y Cuideiru. Trátase d'una evolución más alta de la casa terrena bien particular. La distribución de la casa varia significativamente yá que resérvase‟l pisu cimeru pa los cuartos y la sala y déxase debaxo la corte. Les parés esteriores suelen revocase con morteru, bien en toles fachaes o namás na principal. Suelen ser cases de planta bien reducida. e. LA CASA DE TURRIA Ye la propia de los paisaxes de monte y valles interiores. Daes les difíciles condiciones orográfiques del terrén, esti tipu de solución arquitectónica adáptase a les rimaes en planta rectangular con cubierta xeneralmente a trés agües orixinando una distribución en dos andares: el pisu cimeru destináu a vivienda y l‟inferior a corte y otres dependencies. El pisu baxu ye siempres inferior en superficie por causa‟l desnivel, y n'ocasiones pue tar parcialmente escaváu nel terrén o na piedra. Lo mesmo que la casa terrera trátase d'una casa de families con pocos recursos. Entá güei día puen visitase munchos modelos d'esti tipu nes brañes vaqueres de Somiedu, Salas, Tinéu y Valdés. f. LA CASA DE PATÍN El diccionariu de l'Academia de la Llingua Asturiana define patín como un “pasu o escalera de piedra pa xubir o baxar”. Da nome a una forma propia de construcción tradicional de planta rectangular que permite entrar de forma directa dende l'esterior. Como nel casu anterior, la vivienda atópase nel pisu cimeru y l'inferior destínase a corte y otres dependencies. Tamién s'accede per puertes independientes y nun tien comunicación interna un pisu con otru. La escalera pue zarrase llateralmente con baranda de piedra o madera y pue tar cubierta total o parcialmente pol allongamientu del aleru. Estrémase de la casa de turria en que nun ta condicionada polos desniveles del terrén y, polo tanto, el pisu baxu ye de mayor tamañu. Ye propia de les zones de monte y valles interiores, y ye bien habitual nel conceyu de Somiedu onde hai aldees nes que constitúi'l tipu básicu. Trátase de tipos de cases bien antigües y rudimentaries. La so construcción y diseñu son mui básicos y económicos, lo que favoreció'l so espardimientu a lo llargo de tol territoriu asturianu. g. LA CASA DE BLOQUE Defínese asina pol so gran tamañu, nel que s‟atopen la vivienda, les cortes y los espacios d'almacenamientu. El so nome tamién fai referencia a la so estructura cúbica y zarrada, con pocos vanos, lo que-y confier un aspeutu compautu. Ye propia de caseríes riques y puen vese munchos exemplos nos conceyos d'El Franco, Tapia y Navia, anque tamién apaecen con una serie de variantes en zones más al interior del occidente. Distribúinse en dos plantes y desván, con cubierta de lloses (llábanos de pizarra) de forma piramidal y rematada en cumbrera. La entrada principal asítiase na fachada sur o nel este, onde s'atopa la escalera que comunica col pisu cimeru. Nel pisu de riba hai un elementu distribuidor que ye'l pasillu, per un sitiu da entrada a la sala que ye una estancia usada p'actos sociales y tamién pa secar la collecha, etc. Per otru llau tán los cuartos y el desván, que s'usaba como almacén de productos y como trasteru. h. AS CASÍAS Esti términu ye'l diminutivu de la palabra casa usada na zona noroccidental d‟Asturies, principalmente na área costera. Tien una planta rectangular y ta distribuyida en dos pisos y baxo-cubierta o desván, con ún o dos ventanos nel vértiz de los espigos (hastiales) y dos ventanines o fornelos nes fachaes llaterales. Los murios construyíense de pizarra y/o cuarcita y pa la cubrición usábase la pizarra o llábanos a dos agües. La planta baxa distribuyíase en cocina, bodega y espaciu distribuidor que da accesu al pisu cimeru onde hai una zona d'usu común o sala y dende ella pue pasase a los cuartos y al desván. Como'l so propiu nome indica les sos dimensiones son pequeñes y ye propia de families de baxos recursos económicos. N'ocasiones compleméntase con pequeños anexos y rares vegaes con horru o cabazu o con corte exenta. 9 i. LA CASA DE CORREDOR El corredor ye un elementu presente en toles variantes de la nuesa arquitectura popular dende'l sieglu XVIII. Ta construyíu íntegramente en madera y consta de: basa, zarru de tabla o baranda y pies derechos que soporten el vuelu del aleru que lu protexe. Ta asitiáu na planta alta con una orientación Sur o Este, y permite l'ampliación de la sala. Estructuralmente danse dellos tipos de cases de corredor: • Cases con corredor ente murios. • Cases con corredor y cuerpu llateral. • Cases con corredor ente dos cuerpos llaterales. Ye un elementu bien versátil de la vivienda y da lluz y calor si nun ta zarráu. A finales del sieglu XIX empezó a ser habitual la instalación d'un retrete nun llateral del corredor, pa nun tener que salir albentestate a metá del día o de la nueche. El corredor sirvía y sirve pa secar el maíz, pa ventilar y dexar maurecer les colleches y pa secar la ropa. Al acabu del sieglu XIX una moda fai que los corredores se zarren con cristales formando galeríes, principalmente nes villes marineres y darréu per tol nuesu territoriu, una reforma que da una imaxe nueva a les nueses villes y pueblos, y que permite siguir aprovechando al máximu la lluz y el calor del sol. Estos nun son los únicos modelos de cases populares na nuesa tierra. Amás de les anteriores descrites nel Gran Atlas del Principado de Asturias tamién apaecen otros modelos descritos por distintos autores, ente los que destacaríamos: k. LA CASA DE PORTAL Nel portal llévense a cabu numberoses xeres con más lluz y nun espaciu más ampliu que l'interior de la vivienda. Ye tamién sitiu onde abellugase del agua y del sol, polo que pasa a ser un elementu fundamental y definitoriu de munches viviendes populares. Les cases con portal son bien frecuentes en toa Asturies, principalmente nel interior. Presenten planta rectangular con mampostería de pizarra, arenisca o caliar. El teyáu ye a dos o trés agües; el portal queda nel centru de la fachada y ye l'elementu distribuidor de la vivienda. L'allugamientu del portal resulta bien singular porque si se ta nel centru, la disposición interior ye asemeyada a la descrita na casa mariñana, pero si s‟atopa nun ángulu, la distribución interna ye similar a la casa terrena. l. LA CASA DEL PASTOR Trátase de construcciones bien cencielles y sobries que s‟integren nel terrén aprovechando les sos característiques propies. Suelen ser siempres rectangulares y nun tienen más vanu que‟l de la mesma puerta. Son siempres de piedra con cubierta de teya curvo a dos agües. L'interior, que n'ocasiones tamién se comparte col ganáu, ye tan sobriu como la mesma edificación na qu'apenes s'atopen un llar, una cama y los preselbes adosaos a la paré. m. LA CASA DEL PESCADOR / MARINERA Trátase de les cases propies de los pueblos marineros nes cercaníes del puertu o llugar d'atraque protexíu, arrexuntaes nun terrén bien restrinxíu y n'ocasiones mui pindiu. Son viviendes pequeñes con fachaes de colores vivos, yá que solíen pintase colos restos de pintura de les barques marineres. Presenten una planta rectangular y con mínimos anexos, que solíen asitiase nel nivel inferior. Dau l'habitual desnivel de los pueblos marineros, la cocina y el comedor queden asitiaos nel nivel cimeru y pue accedese a ellos dende la cai. N'ocasiones hai un segundu y tercer pisu onde s'atopen la sala y los cuartos, asina como un desván, que fai les vegaes d'almacén de productos, secaderu y tendal. Esta organización interna vertical caltiénse na gran mayoría de los núcleos marineros, que presenten de normal un calter bien urbanu inesistente nel restu d'aldees y pueblos d‟Asturies. Les cubiertes son normalmente a dos agües y la fachada ye de normal llisa y encalada. A finales del sieglu XVIII apaecen balcones verticales que nun sobresalen de la fachada y cases con corredor na mariña centro- 10 oriental. Lo mesmo que na zona interior dalgunos d‟estos corredores conviértense en galeríes acristalaes, como ye'l casu perconocíu de la villa d'Avilés. n. LA CASA TIPU CANGAS Atópense nes zones altes del conceyu de Cangas del Narcea, nes cabeceres de los valles d‟El Ríu Cibea, El Ríu Naviegu y El Riu‟l Coutu. Una de les sos característiques más distintives ye la so adaptación a lo mui empruno del terrén, combinándola cola forma básica de casa redonda nes sos diverses variantes. El so interior suel presentar suelos escalonaos, con cuartos semiescavaos, o pisos nos que la superficie del terrén nun se modifica, calteniendo un enclín pronunciáu, como ye'l casu de les cortes asitiaes nel espaciu de cota inferior. Enriba de la corte ta'l payar (o parreiru), con un suelu que s‟adapta igualmente a la rimada, diendo en paralelu al planu d'esta. Nel interior ta‟l zagual o trescañu, un pasillu ampliu que crucia la casa, conectando la vivienda y la tenada. ñ LA CASA D'INDIANOS Esta arquitectura ta lligada a la vuelta a casa de persones adineraes tres el desastre de 1898 y que va faer llegar el cosmopolitismu arquitectónicu a tolos puntos de la nuesa xeografía. L'indianu solía ser fíu de families llabradores que lu mandaben a América a bien curtia edá pa faer fortuna y qu‟en llogrando faer dineru empieza a esmolecese por ameyorar, enguapecer y dignificar la so redolada natal cola construcción d'ilesies, escueles, cais, y sobremanera, na so propia vivienda. L'arquitectura indiana alcuéntrase con mayor densidá nos conceyos orientales y occidentales d'Asturies. Como conxuntos d'interés destaquen: L.luarca, Navia y Ayande al oeste; Cuideiru y Muros, escontra'l centru, y Llanes nel este. Anque haya munches peculiaridaes y elementos singulares en caúna d'estes construcciones, toes elles van desenvolver característiques comunes y, de manera especial, les viviendes unifamiliares o palacetes d'indianos. Toos ellos presenten un gran coloríu, elegantes escalinates d'accesu, una torre nún de los llaos y una redolada de xardinos presidíos pola omnipresente palmera que-yos recuerda'l tiempu vivíu n‟ultramar. 5. PATRIMONIU ARQUITECTÓNICU AGROPECUARIU Índiz A la d‟estudiar el patrimoniu arquitectónicu d‟Asturies nun solo tenemos de paranos a analizar la vivienda habitual de los nuesos antepasaos porque alredor d'ésta hai tou un patrimoniu singular d'enorme importancia y guapura. Pa ello pensamos que yera importante incluyir un apartáu con diversos elementos y construcciones que sirven tanto de sofitu a la casa como a les actividaes sociales y económiques de la redolada rural. Trátase de distintos elementos arquitectónicos y patrimoniales que sofiten la identidá rural del territoriu, tanto o más que la mesma vivienda. a. LES BRAÑES Adolfo García Martínez, doctor n'Antropoloxía, catedráticu d‟E. S. y director del Ecomuséu del Parque Natural de Somiedu afirma que les brañes son sistemes más o menos complexos p'aprovechar los recursos naturales d'una manera mui eficaz. Consisten, principalmente, nuna área de pastu n‟abertal onde'l ganáu anda y pastia en grupu y llibremente, pero per otru llau son un exemplu determinante de construcción popular. Trátase d'un conxuntu con unes característiques bien determinaes y úniques: El primitivismu, pues respuenden a una necesidá perentoria (abellugu, almacenamientu), acomódense al mediu polos sos materiales y harmonicen cola redolada, La funcionalidá, yá qu‟apodera lo empírico sobre la teorización, El naturalismu, porque s'usen materiales naturales, con escasísima ellaboración, La baratura, la simplicidá y la elementalidá, el mimetismu, al ser un allongamientu del mediu y nun lu deteriorar. Estes brañes, de construcciones multifuncionales, güertos, tierres de llabor, praos y estenses árees de pastu y monte, son propiedá pro indiviso (ensin partir) de tolos vecinos de la braña o de la parroquia. Nelles cultiven tolo que'l suelu y el clima-yos permite: pataques, trigu, centén, cebada y otros cultivos menores que los sos moradores llamen los cucinaus. Esti autor propón tamién la siguiente clasificación de les brañes: 11 1. Brañes estivales o de primer tipu. Pertenecen a esti primer grupu les brañes de construcciones circulares, allugaes a bastante altitú y distancia respecto al pueblu o pueblos a que pertenecen, tolo cual, xunío al fechu de que nestos llugares nun se recoyía yerba curao, determina qu'estos espacios namás puen esplotase nos meses centrales del estivu y con aquellos animales que nun precisen nin alimentu subsidiario nin cuidaos especiales. 2. Brañes equinocciales o de segundu tipu. Estes brañes caracterícense poles sos construcciones a ras de suelu, de planta rectangular y cubiertes, na so mayoría, d'escoba y el restu de teya o de pizarra. Les dimensiones son bien diverses, pero considerables, cola corte embaxo y tenada nel desván. 3. Braña-pueblu o de tercer tipu. Pertenecen a esti grupu aquelles brañes con construcciones multifuncionales, con güertos, tierres de llabor, praos de gadaña de secanu y de regadíu y con estenses zones de pastu y monte propiedá pro indiviso de los vecinos. Los sos habitantes moren nelles per cuasi nueve meses, con tola familia, animales y tarecos, talmente que puen conceptuase, y de fechu asina ye, como pueblos: son los pueblos de branu de los vaqueiros d'alzada. b. L'HORRU Dende l'entamu mesmu de l'agricultura buscáronse siempres soluciones bien distintes pal caltenimientu de les colleches y los alimentos, y la so preservación de los depredadores. Fueron munches les soluciones dependiendo de los sitios y asina apaicieron soluciones arquitectóniques distintes. Nel casu específicu d‟Asturies desarrollóse un modelu qu‟aportó a la construcción más significativa del nuesu paisaxe. L'horru ye una construcción de madera, llevantada del suelu sobre cuatro pegollos, que dexa les colleches al abellugu del mugor, del sol, del fríu, de les alimañes y de los royedores; sirve pa guardar cuasi tolo imprescindible na vida llabradora: alimentos (granu, fruta, quesu, miel, carne salao y embutíu), ropa, ferramientes, apareyos del ganáu, etc., escepcionalmente inclusive pue faer de cuartu- dormitoriu. La revolución que supunxo l'espardimientu del maíz nel sieglu XVII, traxo consigo una renovación considerable de les caseríes nes tierres vecines d‟Euskadi y Cantabria, onde les cases engrandáronse considerablemente y los horros empezaron a ser inútiles, sumiendo en pocu tiempu. N‟Asturies, los pocos recursos del llabrador nun dexaron nesa dómina un cambéu tan radical na arquitectura, y la mayor novedá foi l'apaición de la panera, ye dicir l'ampliación del horru, asina como la incorporación del corredor a estes construcciones. José Luis García Grinda, nel artículu “La casa popular asturiana”, publicáu nel tomu II de la Enciclopedia de la Asturias Popular, defínelos como “la construcción por escelencia de la tecnoloxía de la madera y a naide se-y escapa que les persones que constrúin estes edificaciones son verdaderos maestros en conocencies de carpintería y tamién d'arquitectura”. Dende la elección de los carbayos o castañales, colos que se va a construyir, hasta l'allugamientu de les diverses pieces, too implica un nivel de previsión, axuste y ellaboración, xunto con una sabiduría que se tresmite solamente al traviés del oficiu. A manera de resume trescribimos de siguío la descripción de Fermín Canella y Octavio Bellmunt sobre los distintos tipos d'horros d'Asturies (Tomu III: 22 d' Asturias): “Fuera de la casa, na antoxana frente a la vivienda, llevántase'l clásicu horru, típica construcción de madera caltenida por cuatro pilastres de piedra o madera, los pegollos, asitiaos nos ángulos sobre otres tantes bases de cantería, los pilpayos, y coronaos por cuadraes pegolleres o mueles d'igual materia pa evitar la xubida de mures. Sobre elles descansen les cuatro vigues o trabes, onde s'asitien les tables de castañal o carbayu de los frentes colondres que, xuníos unos a otros formen les cuatro cares o colondrames. La cubrición ye de teya y la independiente ascensión a la escalera de piedra que, pa defender más de royedores y alimañes al edificiu, nun llega a ésti, siendo precisa una reblagada dende la escalera a la talandoria o tabla horizontal a onde llega'l llabrador, garrándose a una aldaba pa entrar nel horru, pela puerta principal enfrente de la estrencha y posterior portuca, que s’abre n'hores de ventilación. L'interior d'aquel nun ta xeneralmente estremáu en compartimientos, como les paneres o horros de seis o más pegollos, propies de caseríes de más importancia. En caprichosu desorde distribúyense per aquel interior el maíz en granu, en panoyes o en riestres, el trigu y la escanda, les fabes, castañes y más frutos, ellí bien calteníos y protexíos del mugor. De les vigues o cruces, que sostienen la cubrición, escuelguen de cuerdes y garfios ropa, macones, paxos, cestos de toes clases, ferramientes y preseos, etc. Non poques vegaes tamién l'horru o panera pertenez o llévenlu una o delles families, según tamién sirve de cuartu o suplementu sanu y ventiláu a les cases. 12 Son siempres construcciones interesantes, y non poques lluxoses con singulares adornos de talla, pintures vistoses nos llenzos y nos corredores alredor, con un espaciu que tamién se dedica a oriar y ensugar producciones de determinaes dómines. Nel solhorru asítiase tamién el carru como n'ocasiones ciertos preseos y artefactos, bien que tamién agora se zarra dacuando dichu espaciu por más debaxo de les pegolleres, llográndose un departamentu d'aplicación varia.” i. ORÍXENES Y EVOLUCIÓN Los horros asturianos más antiguos puen datase nel sieglu XIV, a tenor de les decoraciones y feches de dellos exemplares del conceyu de Villaviciosa, anque de xuru hebo otros horros anteriores con estructura más cenciella. Los primeros horros asturianos son de tamañu mediu y siempres ensin corredor, anque tienen ente los trabes un tablón llargu denomináu la talambera que sirve pa xubir al interior. Hasta'l sieglu XVII nun paez que se construyan horros en tol terciu occidental asturianu, mientres que nel centru y oriente son centenares los que se llevanten en poco más de doscientos años. Anguaño los horros y paneres sufrieron una fuerte regresión, especialmente nos últimos cuarenta años, por cuenta de la desapaición de la economía agraria y la falta d'usu de los mesmos. Les dificultaes nel caltenimientu d'esti patrimoniu apréciense na degradación creciente que se ve en dellos núcleos, por causa l‟emplegu de técniques de conservación inadecuaes y a la descontestualización. ii. EL SOFITU L'horru o panera llevántase del suelu per mediu de cuatro o más sofitos de madera o piedra de metro y mediu a dos metros d'altu con forma troncocónica llamaos pegollos aisllaos de la tierra por una llábana denominada pilpayu. Dacuando so los pegollos hai un cuartu a manera d‟almacén. Sobre'l pegollu céntrase la muela, pieza cuadrada o circular de piedra con forma de rueda de molín o plana, que torga que los royedores xuban hasta l'horru. iii.EL CUADRU Puestos los pegollos y les sos mueles, hai qu‟asitiar el cuadru, que ta formáu por cuatro vigues, los trabes. Éstes suelen ser de madera de carbayu y d'igual llargor cuando se constrúi un horru (ente 4 y 6 metros) o un par mayor si ye una panera (de 7 a 9 metros). Ente les mueles y el cuadru va una pieza de madera, el tacu de pose, que corrixe posibles diferencies d'altor ente les mueles y que sirve d'articulación ente l'horru y los pegollos. Nesti sistema básase la gran estabilidá de los horros. Amás, el tacu amortigua‟l contactu ente la piedra y la madera. Los trabes engarcen ente sigo a doble encaxe, asitiándose en primer llugar el par más llargu si ye una panera, y enriba l'otru par. Nes paneres y en dellos horros dispónse d'otra viga de refuerzu, la viga carcelera, que s'amarra per debaxo a los trabes. iv. LA COLONDRA : Sobre'l cuadru y encaxada nél, llevántase la colondra, el cuerpu central del horru o panera fecha de tables de castañal. Cada esquina de la colondra ta formada por una pieza enteriza, n‟engüelgu o esquinal, llograda d'una rolla tallada n'ángulu rectu. P'armar la colondra asítiense primero los cuatro engüelgos y aplómense pa que queden perfectamente verticales. Pónense entós les restantes tables de la colondra (llamaes tamién colondres) que van engarzaes nos trabes. Cada banda de la colondra empieza a cerrase partiendo del engüelgu de cada esquina, de manera que la última tabla n'asitiase, la central, métese a presión dende enriba, con cuenta de que tola paré quede afecha perfectamente y nun se muevan les tables. v. EL CUADRU CIMERU : Completada la colondra, dispónse sobre ella'l cuadru cimeru, que ye asemeyáu al inferior pero con vigues de menor escuadría: los lliños. Nes paneres, el par más llargu ponse primero, y enriba l'otru engarzáu a media madera. La cara inferior de los lliños tien una regadura continua na qu'encaxen los cantos superiores de la colondra, que pa eso acaben en bisel o cortaos d'uña. Con esta disposición, el pesu de la cubrición cai sobre tola colondra y al traviés d'ella pasa a los trabes, ensin qu'haya puntos de sofitu concretos. vi. LA CUBRICIÓN: Pa completar la cubierta, asítiense los perros, que son vigues paecíes a los lliños y que sirven de tirantes que xunen dos lliños opuestos. La so unión colos lliños ye a media madera. Sobre éstos y zarrando les uniones de los lliños y los perros, ponse'l sobrelliñu (o touca), que ye una tabla clavada al lliniu. Sobre los perros y sofitando nel sobrelliñu dispónense les armadures, compuestes poles tisories, y los aguilones que se crucien na so parte cimera. Les cuatro agües formaes asina tápense con tables (los cabrios) y sobre éstos dispónense yá los elementos de cubrición (teyes curves o lloses de pizarra). 13 Nos horros, sobre la unión de les cuatro agües asítiase una llosa plana y enriba d'ella una piedra de forma más o menos piramidal qu'evita la entrada d'agua. vii. LA DECORACIÓN: En rellación a la ornamentación d'estes construcciones hai que dicir qu'hai motivos grabaos, pintaos y tallaos qu'en dellos casos tienen los sos oríxenes a finales de la Edá del Bronce y la Edá del Fierro europees. Dalgunos son de tipu astral como trisqueles, tetrasqueles, motivos florales hexapétalos (flor del agua), o círculos. Otros presenten formes zoomórfiques como caballos, culiebres, aves, y otros son tamién antropomórficos (cabeces humanes, guerreros) o bien vexetales, ente los que destaca'l texu. Otros ornamentos son los propios de la relixón cristiana, principalmente les cruces. 1. ESTILU VILLAVICIOSA : El primeru y más antiguu ye'l llamáu Villaviciosa. N'horros con esti tipu de decoración foi onde s'atoparon les feches más antigües que se remonten a principios del sieglu XVI. La so concentración mayor dase en Villaviciosa, Piloña y Cabranes, anque se caltienen exemplos espardíos per cuasi tolos conceyos del centru y este d'Asturies. La parte que recibe mayor curiáu son los lliños, qu'apaecen fondamente tallaos a bisel. Hai una variante d'esti estilu formada por horros que nun se tallen sinón que se pinten imitando los modelos llabraos y de los que se piensa que sedríen daqué más modernos. Dacuando convive la talla y la pintura, anque en pocos horros. La representación básase n'escenes cencielles, en cuélebres, aves, soles, o guerreros, etc. que nos apurre información enforma pa conocer el mundu simbólicu ya ideolóxicu de los llabradores asturianos del sieglu XVI. 2. ESTILU AYANDE : Anque munchos horros y paneres d'Asturies decórense con motivos aisllaos, ye nel conceyu d'Ayande y polo xeneral nel Occidente onde apaecen en mayor númberu y d‟ehí la so denominación. Féchense dende mediaos del XVIII y en tol XIX, mayoritariamente en forma de paneres. La parte decorada ye la paré de la cámara que s'adorna con motivos circulares dacuando bien complexos. Apaecen dende la simple roseta de seis pétalos y los clásicos tetrasqueles de comes a entellazos ellaboraos, pasando per gracioses cares humanes y hasta relós. Ye un estilu fuertemente popular estremáu de toa influencia del arte oficial. 3. ESTILU CARREÑO : L'últimu estilu dio en llamase Carreño por ser nesti conceyu onde s'alcuentra una de les concentraciones más importante d'horros y paneres decoraos d‟esta manera, anque les feches más antigües, pel momentu, alcontráronse en Gozón. Trátase principalmente de paneres, apaez a mediaos del sieglu XVIII y perdura hasta los años cincuenta del sieglu XX. Los conceyos nos que más abonden son Carreño, Gozón, Corvera y Castrillón, anque tamién hai munchos exemplos n'otres zones cercanes a éstes como Illas, Avilés, Candamo, Les Regueres, Uviéu ya inclusive Grau, Siero y La Ribera. Ye l'estilu más espectacular y decora frecuentemente una o dos puertes principales y hasta nueve o más de les sos colondres. c. LA PANERA: Les paneres empiecen a construyise nel sieglu XVII y apaecen col desenvolvimientu agrícola impulsáu pola producción de cereales n'Asturies, en concreto'l maíz, y tamién la pataca. Por ello tienen unes dimensiones mayores que les de los horros. Trátase de la evolución natural del horru; nella tamién apaecen compartimientos interiores y en dellos casos desvanes pal almacenamientu, xunto colos corredores pal secáu del maíz. Pa favorecer la mayor dimensión añadíense más pegollos. La xeneralización de la panera nun foi inmediata, por exemplu en munchos conceyos del occidente d'Asturies nun va llegar hasta'l postreru terciu del sieglu XVIII, ya inclusive en dellos pueblos de monte nunca va llegar. Les teoríes más aceptaes consideren el teyáu como pieza referente a la de clasificar esti tipu de construcciones. Asina, denomínase horru cuando la cubierta a cuatro agües remata nun únicu vértiz, y al contrario ye una panera si hai llinia de cume nel teyáu. d. LOS CABAZOS: Horru, panera y cabazu vienen a tener utilidaes asemeyaes, pero esti postreru constrúyese sobre dos sólides muries de piedra nos estremos de la construcción o bien sobre una plataforma continua. En dambos casos hai mueles, que nel occidente llámense tornarratos. En tol occidente atopamos dos clases de cabazos: El cabazu d'estilu Mondoñedo, con frontal realizáu con llistones de madera, convenientemente separaos pa que pueda pasar l'aire al interior de la construcción. 14 El cabazu d'estilu Ribadeo, con frontal de piedra y onde l'aire pasa al traviés de les munches saeteres que furen el muriu. Hai cabazos con cubierta de pizarra, cubierta de paya, y unos pocos exemplos que combinen dambos materiales. e. LOS ZARROS, PORTIELLOS, SEBES…: Constitúin elementos de gran riqueza y variedá que tradicionalmente utilizábense como llendes ente finques: Les sebes: Les sebes son agrupaciones d'árboles y matos representativos del paisaxe rural d'Asturies y d'otres rexones del occidente d'Europa. Teníen otros múltiples beneficios: cortavientos, solombra pal ganáu, barrera frente a la erosión hídrica, reguladores del mugor del suelu y del aire, fonte de lleña, bayes, plantes melecinales y arumoses, setes, etc. Los zarros: Los zarros realizaos con madera enxareyao o diverses especies vexetales, altérnense nel espaciu con otros de piedra, en forma de murios de mampostería o grandes llábanos de piedra fincaos nel terrén. Los zarros de piedra más numberosos realizábense con pizarra, regodones o cuarcita asentaos en secu, con un altor polo xeneral superior al metru. Estos zarros rematábense dacuando con una filada cimera de lloses de pizarra colocaes de cantu en vertical. Los finxos, fiensos, marcos, mochones…: Trátase d'elementos bien frecuentes como zarros simbólicos y xurídicos, con usu acreitáu dende la Edá Media. Suelen formase con un gran monolitu fincáu en vertical. Según la tradición, na parte inferior dexábase dalgún elementu como símbolu de propiedá, dacuando unos fragmentos de teya. Tamién podíen recibir la talla de dalgún signu col valor de propiedá, lo mesmo qu'asocede coles marques de los árboles qu'identifiquen cada árbol cola casa correspondiente. Les cancielles y portielles: Lus más frecuentes usen grandes postes, provistos d‟entalladures en forma de L pa recibir los rollizos horizontales móviles que queden aseguraos por pasadores. Otru sistema bien usáu emplega dos grandes postes engarraos en posición oblicua, de tal manera que los polos horizontales van quedando encaxaos nel carril a distintos altores según la llongura que tengan. Esta solución dase tamién con dos grandes llastres o lloses enfrentaes nes que se talla la carril central. f. LOS CALECHOS: Son construcciones de tamañu diversu realizaes en piedra utilizaes como trampa pa la captura de llobos. Son construcciones de planta ovalada o poligonal construyíos con mampostería en secu. Consta d'una serie d'elementos emplegaos pa conducir al llobu hasta un llugar onde se-y pueda dar caza. Nel so vértiz hai una rede o un furacu escaváu en suelu, el fosu, nel que se prindaben o mataben los llobos. Les muries podíen ser de piedra o madera, dacuando de mampostería y otres de lloses fincaes. Solíen tener un llargor total de dellos cientos de metros. Otra variedá consiste nun recintu zarráu con muroa asitiáu en terrén altu nun sitiu de camín obligáu. Nél ye fácil entrar pero imposible salir. Tamién fai posible prindar al animal con vida. g. LOS PALOMBARES: Son construcciones de planta circular con murios de mampostería y un solu vanu pa la puerta. L‟interior distribúise en pequeños nichos onde s‟alluguen los palombos. De normal atopábense rellacionaos con cases de ciertu poder económicu. Otru tipu más cenciellu yeren pequeños palombares incluyíos nes fachaes de les viviendes. Usábense pa esplotar la carne de los pichones y los escrementos como cuchu. Yera una construcción mui venceyada al prestixu social de la casa, que foi decayendo nel primer terciu del sieglu XX. h. EL TENDEYÓN: El tendeyón tien diverses funciones como edificación auxiliar de la vivienda. Cuasi siempres ye un almacén ocasional de productos agrícoles y coles mesmes protexe del agua los preseos de llabranza, la lleña, los carros o más apocayá los tractores. 15 16 i. LOS CORTINOS y LOS TALAMEIROS: Los cortinos son un elementu bien característicu de la zona occidental asturiana con planta circular y muries de mampostería de non más de dos metros d'altor; nel so interior dispónense los truébanos (o trobos). La so función yera protexer la producción de miel, sobre manera del ataque d'animales como l'osu. Interiormente presenten rellanos pa disponer los truébanos y davezu carecen de puerta; accédese al interior per una escalera de mano. Los talameiros son menos frecuentes que los anteriores pero cola mesma función. Trátase d'una pequena estructura cuadrangular de mampostería en forma de pilastra, que sostién na parte cimera un treme de madera capaz pa unos pocos caxellos. Dacuando tenía un zarru perimetral na parte inferior. La so área de distribución taba acutada al sur del Valledor, Los Montes y El Coutu en Cangas y la parte colindante d‟Ibias. Güei consérvense dellos exemplos mal conservaos. k. LES CORRIPES o CORRIPOS: Son construcciones de piedra de forma circular feches nos castañeos p'almacenar, maurecer y protexer les castañes. Les corripes son construcciones de planta circular o semicircular si s‟atopen adosaes a una turria; taben construyíes con piedra irregular y altor mediu. Nel interior tapábense les castañes con foyarasca y cañes hasta que se recoyíen p'almacenales na casa. Taben en monte nos mesmos castañeos. l. LA CUADRA o CORTE : La construcción d‟una cuadra-tenada yera ún de los elementos más comunes nes aldees antes de la escayencia de la vida rural y agraria a lo llargo de tol sieglu XX. L'esquema constructivu ye'l mesmu de les cases arcaiques adaptáu a les necesidaes d'usu pal ganáu, con un desarrollu en planta llonxitudinal. m. LA CORRIPA o CUBIL: Na redolada de la casa solía haber una corripa o corte na que se criaben los gochos que se sacrificaben na seronda na matanza” o samartín. La carne consumíase n'embutíu o en salazón. Yeren construcciones de tamañu pequeñu y mui rústiques adosaes normalmente a la mesma casa o a la corte con suelu de llábanes o piedra pa meyor llimpieza. n. LES TENAES, PAYARES O PAYEIROS: Na parte cimera yera bien habitual la esistencia d'una zona pal almacenaxe de la yerba que recibe'l nome de tená o tenada na zona centro. Caracterizábase pol so fácil accesu p'alimentar al ganáu estabuláu. Amás de forma d'almacenar la yerba curao sirvía d'aislamientu pa la mesma vivienda. ñ. LES ERES: Nel occidente llamábense eiras a espacios xeneralmente pavimentaos con grandes lloses de pizarra destinaos a mayar el cereal panificable, trigu o centén. Suelen disponer d'accesu pal carru y un zarru de mampostería o lloses de pizarra fincaes en vertical. El mayáu realizábase de forma colectiva, polo que yeren tamién espacios importantes pa tol pueblu, usándose n'ocasiones pa bailles y fiestes. 6. PATRIMONIU ARQUITECTÓNICU CIVIL Índiz Asturies nun solo tien un enorme patrimoniu arquitectónicu popular sinón que tamién son bien destacables los munchos palacios, casones, cases blasonaes y edificios de calter civil (casa conceyu, xulgaos, etc.) que se caltienen nos sos pueblos y villes. Trátase d'una arquitectura más trabayada, alloñada de los modelos populares que nos ocupen, con plantes regulares y xeométriques, de mayores proporciones y amplies volumetríes con trabayos de cantería y llabra de piedra más ellaboraos. Sicasí, sí tenemos que considerar que los palacios rurales han d‟encuadrase na arquitectura tradicional. Estrémense de les viviendes comunes na so escala pero les característiques estructurales y los materiales son los propios de les viviendes tradicionales anque con una mayor influencia de los estilos consideraos cultos. A éstos suelen venir asociaos capiyes, palombares y molinos, cuasi siempres de forma independiente. 17 7. PATRIMONIU ARQUITECTÓNICU RELIXOSU Índiz Hai un gran cantidá d'ilesies d'orixe medieval, de dómina prerrománica y románica, munches d'elles tresformaes por cambeos y modes de dómines posteriores (góticu, renacencia, barrocu, dómina actual). Nos pueblos y aldees suelen ser de pequeñu tamañu, una sola nave y ábside semicircular. Son numberoses tamién les capiyes rurales, de pequeñes dimensiones, planta rectangular y cubierta a dos agües. Los campos d'ilesia: Son de gran valor simbólicu pa la comunidá, centru de les celebraciones colectives relixoses y tradicionales que n'ocasiones cunten con pequeños podios pa la los músicos y les actividaes de les fiestes. Los cruceros: Apaecen preferentemente n‟encruces de caminos nos itinerarios que xunen les distintes aldees cola ilesia parroquial. La so presencia enmárcase tanto nes tradiciones y creencies populares qu'otorgaben un gran valor simbólicu a los encruces, como al fechu relixosu qu'integra estos puntos nes paraes pa realizar rezos cuando se conducíen los cuerpos al campusantu parroquial, dacuando per grandes distancies. Tamién se depositen delles ufriendes y cruces de madera. 8. PATRIMONIU ARQUITECTÓNICU VITIVINÍCOLA Índiz El vinu y la so tradición tan bien lligaos a la hestoria de la contorna occidental asturiana, con una orografía y condiciones climátiques favorables que permitieron el desenvolvimientu y caltenimientu de les viñes. Son munchos los elementos asociaos a la vitivinicultura: bodegues, llagares, bancales o cabanos de trabayu, etc. a. LOS EMPARRAOS Formábense con armazones de madera a base de grandes pies derechos de remate aforcáu, en rellación directa coles estructures verticales de les construcciones arcaiques de la contorna. Sobre ellos dispónse un treme de madera y cañes pa dexar la crecedera de les vides. b. LOS BANCALES Y CABANES La producción de viñéu concentráse nes viñes de les fasteres de los montes que s‟adapten al terrén, xeneralmente con técniques d‟abancalamientu que confieren un matiz distintivu al paisaxe de la contorna. Cada prediu de viñéu dispón de cabanes pa preseos de trabayu, que tradicionalmente siguíen formes constructives cencielles con materiales de la redolada. c. LES BODEGUES Son construcciones cencielles, de planta cuadrada o rectangular, con esquines arredondiaes o formes ovalaes. Tán semienterraes pa llograr les condiciones óptimes de temperatura y mugor. Destaquen los gruesos murios de piedra y les cubiertes con estructura de madera a dos o delles agües y cubrición de teya o pizarra. Pa facilitar la so ventilación suel abrise un ventanu orientáu al norte llamáu “gatera”. La tradición de les bodegues ta bien documentada dende la Edá Media y ye bien conocíu'l papel de la Ilesia na espansión de la cultura vitícola nel suroccidente d'Asturies. Amás de les bodegues doméstiques, hai otres bodegues de gran tamañu asociaes a palacios rurales y monesterios como'l de Courias. 9. PATRIMONIU ARQUITECTÓNICU INDUSTRIAL Índiz L'arquitectura del mundu rural tamién presenta instalaciones ya infraestructures mui singulares rellacionaes con distintes actividaes agro-ganaderes. i. LES FERRERÍES, MAZOS Y FRAGÜES Trátase de los espacios de trabayu de la industria tradicional del fierro y son principalmente los siguientes: LES FERRERÍES son un inventu medieval que ta documentáu n'Asturies dende finales del sieglu XV. Estes infraestructures precisaben pa funcionar una corriente d'agua, mineral de fierro y gran cantidá de madera pa quemar el mineral y pa fabricar carbón vexetal. Los edificios de les ferreríes que llegaron a los nuesos díes daten de los sieglos XVIII y XIX, tán mayoritariamente nel occidente d'Asturies y son bien asemeyaos ente sigo. Les ferreríes asturianes tán asitiaes al pie de ríos pequeños, de pendiente acusada y caudal variable. Pa llevar agua hasta la ferrería llevantábase un importante sistema hidráulicu formáu polos siguientes componentes: la presa, que garraba l'agua ríu arriba; la canal, y el banzáu, onde se represaba l'agua pa vertelo sobre les ruedes. LOS MAZOS, conocíos también como machucos o ferreríes menores, son inxenios que tienen los mesmos elementos que les ferreríes pero de tamañu más pequeñu. La localización de los mazos va tar bien determinada pol allugamientu de les ferreríes, polo que cuasi la so totalidá van tar asitiaos nel occidente d'Asturies. LES FRAGÜES son l'espaciu de trabayu más pequeñu de la industria tradicional del fierro, y nelles fabricábense, acabábense o iguábense los preseos fechos con esti metal. Les fragües yeren imprescindibles pa fabricar ya iguar les ferramientes de trabayu de la tierra. L'allugamientu de les fragües yera bien variable: nel pisu baxu de la vivienda del ferreru; nel solhorru; o nun edificiu aislláu, dedicáu n'esclusiva a la fragua. ii. LOS MOLINOS y BATANES N'Asturies, dada la so marcada configuración xeográfica, desenvolvióse una importante industria molinera. Los molinos ocuparon sitios bien pintorescos al llau de los numberosos regatos que cuerren pelos valles y que favorecíen l'aprovechamientu de los caudales necesarios, ensin menester de grandes obres d'infraestructura. Esta industria garró gran puxu col cultivu del maíz, procedente d'América, a partir del sieglu XVII. No que se refier a batanes, la primer referencia sobre'l so emplegu na península data del sieglu XII. A mediaos del sieglu XVIII había n'Asturies cerca de 200 batanes en funcionamientu. Na actualidá namás queden dellos restos tremaos pela xeografía asturiana. Hasta l'añu 1965 funcionó ún en Parada (Navelgas, Tinéu), que tuvo como últimos veceros los vaqueiros que vivíen nes brañes cercanes. En Parada dedicábase un batán a la llana negro, de lo que se sacaba la sarga pa faer escarpinos, y otru a la llana blanco, usao pa ellaborar cobertores, sayes y pantalones. Los últimos batanes que tuvieron funcionando n'Asturies fueron: ún nel conceyu d'Ayer, en Santibañes de Murias; ún nel conceyu de Cabrales, n'Arenas; dellos nel conceyu d'Ayande: Noceda, Fonteta, Arbeyales y Freisnéu; y nel conceyu de Cangas del Narcea: en L‟Outriel.lu y Bisuyu. N'Asturies, la sustitución de la fuercia humana pola hidráulica nun se produz hasta la Edá Media, nos sieglos XI y XII, momentu en que los molinos y los batanes empiecen a cubrir la xeografía asturiana. D'últimes cabe mentar los molinos de marees; l‟últimu exemplu n‟Asturies ta na ría de Villaviciosa onde se caltién, en bastante bon estáu, la infraestructura del dique, compuerta, y banzáu. iii. LES FONTES Y LLAVADEROS Son infraestructures colectives al serviciu de la comunidá; de tipoloxíes variaes dependiendo de la so fecha de construcción. Van dende fontes bien elementales con una simple piedra con desagüe en forma de bocín o n'ocasiones una teya y dalgún pasu o llosa. Otres vegaes son simples cortes en turria con una cubeta inferior y delles veces cunten con un bebederu llateral. Dempués van desarrollándose y rellaciónense con llavaderos, realizaos polos vecinos con materiales y formes tradicionales cola ayuda de les distintes alministraciones. El so cuerpu evoluciona, añadiéndose adornos y remates ya inclusive cúbriense, sobre manera a partir de les últimes décades del sieglu XIX; construyéronse hasta los años 50 del sieglu XX. 18 Suelen presentar planta rectangular con muries y una sola aguada sobre la fachada con cubierta de madera y llosa. iv. LES PONTES Abondoses pola so necesidá como vía de comunicación nuna zona con tantos cursos fluviales. Tradicionalmente yeren de madera, conformaos por dos tueros sobre los que se disponíen una serie de tables; progresivamente foron sustituyéndose por pontes de piedra, de normal con un solu arcu (apuntáu o de mediu puntu) de meyor factura y resistencia. v. LES INSTALACIONES MINERES Esta forma non popular d'arquitectura ta presente en toa Asturies dende dómina romana, de la que yá esistía la esplotación del oru que desarrolló galeríes de prospección, carcavones y canales d'agua qu'entá se conserven anguaño. A mediaos del S.XX desarróllase la esplotación mineral del carbón asociada a una serie de construcciones con una base d'inxeniería, como llavaderos, castilletes, bocamines, etc. Éstes formen parte de l'arquitectura y patrimoniu industrial entá n'usu nes distintes cuenques mineres del centru y suroccidente asturianu. 19
