Formatu orixinal

Miércoles, 7 de setiembre del 2016
INTERVENCIÓN
DEL
PRESIDENTE
DEL
PRINCIPÁU D’ASTURIES, JAVIER FERNÁNDEZ
Ceremonia d’entrega de les Medayes d’Asturies
Autoridaes
Gallardonaos
Señoras y señores
Bones tardes a toos:
La noticia del periodista que se convirtió en noticia saltó la mañana del
tres d'agostu, cuando'l Conseyu de Gobiernu decidió conceder la Medaya
d'Oru d'Asturies a José Manuel Vaquero. La hestoria, bona hestoria, que
tenía l'Executivu nes sos manes completábenla seis nomes, gallardonaos
con plata: les cooperatives El Orrio y Campoastur, el pintor Alejandro
Mieres, la Fundación Banco Sabadell, l'Asociación d'Ayuda a Persones
con Parálisis Cerebral y Laureano Víctor García Díez, presidente de
l'Asociación d'Amigos del Camín de Santiago Astur-Galaico del Interior.
Esti ye un discursu d'agradecimientu. Cada branu, el Gobiernu señala a
unes cuantes persones col índiz. Oblíga-yos a endomingase, a guardar
asientu un ratu llargu nun escenariu enfornáu de focos y inclusive al
aforfugón de falar en públicu. Son quien decidimos que merecen les
medayes d'Asturies, la orla institucional qu'ampliamos cada setiembre
coles semeyes de los que consideramos los nuestros meyores. Asina
que les primeres palabres son gracies pol so exemplu; gracies, tamién,
por tar equí.
De l'acción de gracies a la inxusticia. Cada añu perpetramos una,
premeditada. Obligámonos a una elección qu'enxamás va ser plena.
Nunca vamos poder distinguir a tolos homes y muyeres dignos de
protagonizar esti actu. La estadística calcula'l marxe d'erru. El
desconocimientu y los olvidos tamién nos esvien al fallu.
Esa certidume de la inxusticia inevitable impónnos la obligación del
percuru: ser escrupulosos, deliberar ensin echar cuentes a provechu
propiu. Cumplíos esos requisitos, afirmo que quien comparten esti
escenariu ganáronse que los reconozamos como persones y colectivos
exemplares.
1
José Manuel Vaquero, cuntélo de primeres, ye periodista, circunstancia
que quiciabes daquién, alieníxena o non, ignore nesti salón. Nun se rían:
nunca dean un datu por sabío. Y nun ye un detalle menor. Un periodista
tien el deber de cafiar al poder, sía políticu, relixosu, xudicial, militar,
parroquial o, añedo, mediáticu, que tamién manca. Si pregunta, ye
cafiante y si informa, ye cafiante. Vaquero foi, ye, periodista munchos
años y polo tanto fadió enforma. Si val el mio testimoniu, como un tabán
o una mosca, ensin posanos en más partes. Nesti casu, por saludalo
como nun manda la bona educación, el gustu yera de so y la molestia, de
mio.
¿El Gobiernu d'Asturies otorga la medaya d'oru a un periodista
incómodu? Pos non, esi nun ye'l titular, afalagador pal gremiu. Nel
periodismu unu pue ser cafiante y malu, una combinación espantible, o
cafiante y bonu, que ye peligrosísimu pal entrugáu. Vaquero representa
la segunda categoría, la d'altu riesgu. Agora bien, tampoco equí ta la
noticia. Que fuera bon periodista incómodu tampoco ye la noticia d'esta
medaya.
¿Pregúntense ónde ta? Pos la noticia ta en La Nueva España.
La medaya d'oru premia al home qu'atinó convertir a La Nueva España
n'unu de los meyores periódicos nacionales. Que Vaquero nun lo llogró
solo ye obviu; que lideró esi procesu mientres tres décades y que lo
personifica como naide, indiscutible.
Los sentíos afáense rápido a lo bono, regálense la vida muelle y
vuélvense d'un esquisitu insoportable. Los sentíos, unos delicaos, nun
valoren aquello a lo que s'avecen. Por costume d'años, quiciabes nun
cubiquemos el méritu periodístico y empresarial que supón qu'una
Comunidá Autónoma con un millón ralláu de persones cunte cada
amanecer con unu de los diez diarios más importantes d'España (tamién
val la pantalla, pero convengamos en qu'ésta ye, sobre manera, una
hestoria impresa: güel, entinta los deos, quier coldos esplegaos na barra
del chigre p'afincar la posición sobre les páxines enllordiaes de café). El
capitán d'esa aventura empresarial y periodística —¿qué ye una
aventura ensin capitán?— ye quien recibe la Medaya d'Oru d'Asturies.
Sobre la capacidá de La Nueva España pa compaxinar la información
local y global, que nun ye un par antagónicu, escribióse bien d’ello. La
evidencia nun precisa resalte. Prefiero reparar n’otra traza bien acusada
y que, ye raro, destácase menos. Como l'oficiu del periodismu tien los
sos escolásticos, esclario que nun rivalizo: ufierto una esplicación simple
y parcial del ésitu de La Nueva España. Una empresa periodística suma
publicidá, distribución, impresión y unos cuantos factores concurrentes
más. Cuanto meyor sía caún d'ellos, meyor va ser tamién el resultáu del
conxuntu. Hasta equí, too puede algamase con medios y la recluta de
bonos profesionales. Agora, pa elevase al espardimientu y al altu
númberu de llectores de La Nueva España ye menester daqué más que
namás lo da la intuición, l'olfatu, la maña pa pellizcar el trixéminu de
l'atención pública, nómese como se quiera... Dicho de mou y manera
2
pomposo, una comunión cola sociedá que nun se algama namás con un
productu bien facturáu. Ignoro la fórmula maxistral, pero nuna comunidá
como Asturies, con una sociedá civil trabada y heteroxénea, un principiu
activu básicu ha ser el pluralismu. Nun se trata de la llinia editorial, que
ye cosa distinta. Nun confundamos: la opinión del periódicu ye la del
periódicu, y la de cada llector, la suya. Albidro que'l respetu de La Nueva
España a la pluralidá, la so voracidá, más que capacidá, d'acoyida pa
pidir, fomentar y confrontar paeceres pa reflexar la discrepancia ensin
almenar al periódicu nun búnker del so propiu criteriu ye clave nel so
ésitu. Eso tamién se llama exercer la llibertá d'espresión. Vaquero supo
utilizar esa llibertá xerminal de la democracia en beneficiu de La Nueva
España al nun convertila enxamás en cotu esclusivu. Fai falta habilidá pa
que la orientación del periódicu, por marcada que tea, nunca dexenerara
nuna alambrada pa les demás opiniones, y ende tuvo tamién la bona
maña de José Manuel Vaquero.
El pintor Alejandro Mieres, medaya de plata d'Asturies, ye amuesa de
llibertá d'espresión consciente y decidida, en tolos aspectos. Pal
Gobiernu foi un honor tener la oportunidá de distinguir a esti palentín que
fixo de Xixón el so llar, tamién pictóricu, dende va más de 40 años.
¿Cómo se llama a quien amasa la lluz, construye xeometríes almirables
de color? Nun doi col nome, pero digamos que les manes d'Alejandro
Mieres, catedráticu d'institutu hasta la so xubilación, son artesanes d'esa
maravía espresiva. La so obra, estudiada y reconocida pola crítica
especializada, ta presente en dellos de los museos más importantes
d'España. Estos díes, precisamente, tenemos la fortuna de poder
contemplar parte de la so creación nel Muséu Barjola, en Xixón. Quiero
estima-y de forma bien especial la so presencia nesti actu, un llugar onde
tendría de tar va yá bien d’años.
Laureano Víctor García Díez ye un caminante. Preside l'Asociación
d'Amigos del Camín de Santiago Astur-Galaico del Interior y l'Agrupación
d'Asociaciones d'Amigos del Camín de Santiago del Norte. El
caltenimientu, la meyora y la divulgación de los caminos de Santiago que
crucien Asturies fíxose en munchos casos al ánimu del pasu de Laureano
Víctor García. En xunetu del añu pasáu, la Unesco incluyó los Caminos
de Santiago del Norte Peninsular nel llistáu del Patrimoniu Mundial. Esa
decisión remató un esfuerciu nel que tamién participó quien güei recibe la
medaya de plata. A estes altures, naide discute'l potencial cultural y
turístico de los caminos de Santiago. Toles alministraciones y
instituciones venceyaes col so cuidáu y promoción hemos d'esforcianos
en caltenelo y sacar el mayor provechu, porque, como bien sabe
Laureano Víctor García, si nesta cuestión hai camín percorríu, entá
tenemos bien de etapes pendientes. Si d'Alfonso II rellátase que foi'l
primer pelegrín a Iria Flavia, güei añedimos a esti caminante a la gran
hestoria xacobea d'Asturies. Nesti casu, la compostela nun s'otorga por
rematar una vegada la ruta, sinón por décades de percorríu. Esa
compostela ye la medaya de plata del Principáu.
Los cuatro restantes correspuenden a cuatro colectivos. Dos son
cooperatives venceyaes de distinta manera al mundu rural. El sorrayáu
3
lleva intención: los problemes del campu y les dificultaes de la vida nel
mediu rural son obvies; distinguir a quien lluchen por superales ye de
xusticia. Reparemos na cooperativa El Orrio: integrada por muyeres,
lleva 25 años dedicada a l'atención domiciliaria, contribuyendo a la
igualdá de xéneru. Fundada en 1991 en Tapia de Casariego, cunta con
diez socios qu'ufierten servicios a mayores dependientes, con
discapacidaes físiques, sensoriales, cognitives, intelectuales y
enfermedaes mentales.
Lo mesmo que señalé na primer parte d'esta intervención, ye probable
que tamién nesti casu seya difícil que valoremos hasta qué puntu ye
meritoria la llabor d'El Orrio: muyeres que s’acomuñen nel Occidente pa
combatir la desigualdá de xéneru y pa favorecer la equidá na prestación
de servicios nel mediu rural, una de les sos faltes más notables.
La cooperativa Campoastur tamién recibe la medaya de plata. Falamos
de la otra pilastra que sostién al mediu rural. Unu lo argamasen les
infraestructures y equipamientos, el desenvolvimientu de prestaciones
como les de les socies trabayadores d'El Orrio. Otru ye la meyora del
sector primariu: ensin el so afitamientu económicu, el declive diba ser
inevitable. A eso dedícase Campoastur: a ayudar a los llabradores y
ganaderos pa que puedan trabayar y comercializar meyor nun mercáu
global y esixente. Nacida nel 2012 dempués de la integración de seis
cooperatives, cunta con 18 delegaciones n'Asturies, tres fábriques de
piensos pa ganadería convencional, otra pa ganadería ecolóxica y seis
gasolineres. Tresforma y comercializa productos, da servicios de
sustitución pa profesionales y atiende les sos demandes formatives.
Recito esta retahíla porque les característiques del nuestru sector
primariu, caracterizáu pol minifundismu orixinal, faen que la fórmula
cooperativa sía una de les más afayadices pa les sos necesidaes.
La Fundación Banco Sabadell recibe la so medaya de plata pol so
compromisu cola Universidá d'Uviéu. Constituyida en 1994, la so finalidá
ye promover la divulgación, formación y investigación educativa,
científica y cultural. La concesión de beques, les ayudes a la
investigación, la convocatoria anual del Premiu «Fundación Banco
Sabadell» pa investigadores menores de 40 años y la collaboración col
Campus d'Escelencia Internacional de la Universidá formen parte de les
sos actividaes. La medaya reconoz tou esi compromisu que, quiero
resaltar, la Fundación Banco Sabadell llogra faer notar. Eso tamién ye un
méritu: la so collaboración alviértese y, lóxicamente, apréciase, porque
ayudar a la xente mozo, fomentar la investigación y sofitar a la Universidá
d'Uviéu equival a confiar nel futuru d'Asturies.
La medaya de plata concedida a l'Asociación d'Ayuda a Persones con
Parálisis Cerebral nun precisa esplicación. Lleva'l gallardón nel nome.
Falamos d'un trabayu constante dende va más de 50 años a favor d'una
atención integral y de calidá a quien sufren esti problema. Superaes
numberoses dificultaes, l'asociación, constituyida en 1964, xestiona una
unidá d'atención temprana, un centru d'educación especial, otru
d'integración, otru d'empléu y unu más de calter residencial. Aprosimao,
4
güei respuende a les necesidaes de 180 persones y les sos families.
Nesti casu, nun hai qu'añedir un axetivu, la descripción dizlo too. Esti
gallardón ye, más qu'una reconocencia, un deber: la calidá moral de la
nuestra sociedá esixe qu’Aspace reciba la medaya de plata.
Resumí siete medayes. Pido esculpes a los gallardonaos porque ye fácil
que quedaren pendientes méritos notables. Dexen que destaque, amás,
lo distintos que son ustedes, la diversidá de trayectories, d'intereses, de
xuru tamién de criterios. Axúntenlos güei equí dos característiques: son
bien bonos no suyo y, arriendes d'ello, son bonos pa toos, porque les
diferencies y el pluralismu son enriquecedores si coinciden nel bien
común. Nel Día d'Asturies, la celebración que nos convoca, teamos
arguyosos de la nuestra pluralidá, pero sepamos allanar les nuestres
diverxencies a favor del interés colectivu. La diversidá que se fai
sobeyosa y desdeñosa, que s'aislla y confunde alcuerdu con rindición,
conviértese en fragmentación desierta. La entrega d'estes medayes quier
ser un aponderamientu a la nuestra pluralidá enriquecedora, la que suma
a favor d'Asturies. Neso pensábamos la mañana del tres d'agostu,
cuando saltó la noticia del periodista que se convirtió en noticia. A él, a
tolos gallardonaos, a toos ustedes, munches gracies. Feliz Día
d'Asturies.
5