Formatu orixinal

Miércoles, 1 de xunu del 2016
El Principáu promueve una Llei d'Asturianía
adaptada a la realidá de la emigración nueva
−
El Conseyu de Gobiernu aprueba l'anteproyectu llegal, que
pretende sustituyir a la normativa vixente dende 1984, amplía los
derechos de la población retornada y da soporte a los asturianos
nel esterior
−
La norma asegura l'asistencia sanitaria a los emigrantes con
más necesidá mientres les sos estancies na comunidá autónoma
−
L'Executivu autonómicu destina 8,3 millones p'ayudes a la
industria agroalimentaria y forestal
−
Eugenio García Rodríguez, nuevu xerente
d'Emerxencies del Principáu d'Asturies (SEPA)
del
Serviciu
El Conseyu de Gobiernu aprobó güei l'anteproyectu de Llei d'Asturianía y
de les comunidaes asitiaes nel esterior, que va sustituyir a la Llei de
Reconocencia de l'Asturianía, de 1984, p'adaptar la normativa
autonómica a les necesidaes nueves de la población emigrante y de les
colectividaes que nun viven nel Principáu. Anguaño, unos 126.000
asturianos residen n'otros llugares del mundu.
L'ámbitu d'aplicación de la reforma llegal, que consta de 23 artículos, va
estendese a los asturianos nel esterior, a los retornaos, a les comunidaes
con reconocencia d'asturianía (los más del centenar de centros y cases
d'Asturies) y a asociaciones que, ensin tener esa reconocencia,
promuevan el sofitu a estes persones.
L'anteproyectu complementa l'estatutu de la ciudadanía española nel
esterior y establez el marcu xurídicu y los preseos básicos que
garanticen l'exerciciu de los sos derechos a los asturianos que residen
nel estranxeru y a los emigrantes retornaos.
Ente les principales novedaes de la normativa destaquen l'ampliación del
marcu llegal a la población retornada o'l desenvolvimientu de programes
d'ayuda económica a persones en situación d'emerxencia, garantizando
l'atención sanitaria mientres les sos estancies n'Asturies.
1
Coles mesmes, van promovese alcuerdos colos centros asturianos
n'acciones de promoción turística y empresarial y va avanzase nel usu de
les tecnoloxíes nueves pa fomentar les relaciones, sobre manera, colos
colectivos más nuevos.
L'anteproyectu tamién recueye la celebración, cada cuatro años, d'un
Congresu Mundial d'Asturianía y la ellaboración d'un plan integral
d'emigración, amás de la regulación específica de la Escuela d'Asturianía
como espaciu d'alcuentru y formación.
El diseñu d'esta reforma cuntó con un procesu de participación
importante nel que collaboraron tolos colectivos y asociaciones vinculaes
a la emigración.
El conseyeru de Presidencia y Participación Ciudadana, Guillermo
Martínez, va pidir nos díes próximos una comparecencia na Xunta
Xeneral del Principáu pa esplicar l'anteproyectu a tolos grupos
parllamentarios y solicitar el so respaldu al testu llegal.
68 millones en siete años pa la industria forestal y agroalimentaria
La Conseyería de Desenvolvimientu Rural y Recursos Naturales va
dedicar 8.303.402 euros a financiar la convocatoria d'ayudes pa
inversiones en tresformación, comercialización y desenvolvimientu de
productos agrícoles, mesmo que pa tecnoloxíes forestales.
Estes subvenciones, que l'Executivu autonómicu considera d’importancia
vital pal afitamientu d'un sector agroalimentariu potente y d’una industria
forestal local eficiente, van tener calter plurianual y van distribuyise en
tres exercicios presupuestarios: 2.942.402 euros p'anguaño, 2.861.000
pal 2017 y 2.500.000 pal 2018.
La subvención máxima ye del 40 % de la inversión y los beneficiarios son
persones físiques o xurídiques titulares d'industries agroalimentaries o
forestales.
Les ayudes tán previstes nel Programa de Desenvolvimientu Rural (PDR)
2014-2020, en dos midíes específicamente rellacionaes col sofitu a la
industria agroalimentaria y forestal. La dotación nel so conxuntu ye de 68
millones mientres los siete años de programación, lo que supón cerca del
20 % del total del PDR.
Les subvenciones son cofinanciaes pol Fondu Européu Agrícola de
Desenvolvimientu Rural (Feader), el Principáu d'Asturies y
l'Alministración Xeneral del Estáu. El so oxetivu ye ameyorar la capacidá
productiva del sector industrial agroalimentariu y forestal, esto ye, aquel
2
que partiendo d'una materia prima básica (agrícola, ganadera, o forestal)
realiza una tresformación qu'aporta valor añedíu y favorez la
comercialización del productu. Les industries que tresformen los
productos agrícoles y forestal tienen gran importancia nel
desenvolvimientu de los recursos propios del Principáu y na
diversificación de la producción primaria.
Estes ayudes van contribuyir a ameyorar los sistemes de tresformación,
comercialización y desenvolvimientu de productos agrarios por aciu el
fomentu de la producción local, la venta directa, les víes curties de
comercialización, asina como la inversión n'industria agraria y
agroalimentaria. Van dirixíes a subvencionar inversiones qu'ameyoren el
rendimientu global de la esplotación o'l caltenimientu del empléu,
qu'incorporen tecnoloxíes y procedimientos pal desenvolvimientu de
productos nuevos de mayor calidá o de mercaos nuevos, que dexen
crear redes locales de recoyida, recepción, almacenamientu o
clasificación y qu'impulsen sistemes de calidá y seguridá alimentaria.
Nel casu de les industries forestales, l'Executivu autonómicu pretende
ameyorar el potencial forestal y la so tresformación, la mecanización de
procesos y la optimización de procedimientos nel marcu de la medría de
la capacidá económica de los montes.
Tamién son subvencionables, por exemplu, gastos d'alquisición de
bienes inmuebles vinculaos al procesu de tresformación, maquinaria y
equipos, honorarios técnicos asociaos a los proyectos y ellaboración de
planes, alquisición de patentes o paquetes informáticos, implantación de
procedimientos de certificación y actuaciones que supongan una meyora
xeneral del productu final.
L'Executivu asturianu xulga imprescindible llograr una mayor
participación de llabradores, ganaderos y silvicultores nos procesos de
tresformación y comercialización de los productos. Tamién considera
necesario fomentar les iniciatives de los empresarios pa establecer,
modernizar y diversificar les sos instalaciones industriales y acceder a
inversiones tecnolóxiques pa faeles más competitives.
La producción agroalimentaria tresformada d'Asturies asitia nel 15 % del
PIB rexonal, mentes que la producción primaria directa ensin tresformar
supón el 1,5 %. Por ello, la tresformación agroalimentaria multiplica por
diez el valor de les producciones primaries asturianes. Globalmente, la
producción agroalimentaria suma unos 1.800 millones al añu, de los que
cerca de 1.200 tán venceyaos al sector lácteo y el 90 % véndese fora
d'Asturies.
3
450.00 euros pa meyorar la calidá de la lleche
Per otra parte, el Conseyu de Gobiernu autorizó un gastu de 450.000
euros pa la convocatoria de subvenciones destinaes a servicios
d'asesoramientu y participación en réximes de certificación
d'esplotaciones ganaderes productores de lleche pa caltener y meyorar
la calidá.
Esta ye una de les llinies d’apoyu al sector lacteu, nun momentu de crisis
de precios de mercáu, que tien como oxetivu contribuyir a la meyora de
la competitividá de les esplotaciones del Principáu.
1,7 millones pa once fundaciones rellacionaes cola Cultura
La Conseyería d'Educación y Cultura va soscribir convenios de
collaboración con once fundaciones a les que va destinar anguaño un
total de 1.716.137 euros. El Principáu, cola mira de tutelar, fomentar y
divulgar la cultura, amás de garantizar el caltenimientu y arriquecer el
patrimoniu históricu, renueva'l so sofitu económicu a los proyectos que
desenvuelven estes entidaes, cola siguiente distribución:
— Fundación Princesa d'Asturies: 60.000 euros.
— Fundación Llaboral Centru d'Arte y Creación Industrial:
600.000 euros.
— Fundación Ópera d'Uviéu: 110.000 euros.
— Fundación Centru Cultural Internacional Oscar NiemeyerPrincipáu d'Asturies: 750.000 euros.
— Fundación de la Sidra: 8.640 euros.
— Fundación Muséu de la Siderurxa: 6.000 euros.
— Fundación de Nueves Tecnoloxíes y Cultura: 90.000 euros.
— Fundación Muséu Marítimu d'Asturies: 20.000 euros.
— Fundación Archivu d'Indianos: 60.000 euros.
— Fundación Muséu Etnográficu del Oriente d'Asturies: 6.000
euros.
— Fundación Miguel Ángel Lombardía d'Arte Contemporaneu:
5.497 euros.
Ampliación de los fondos pa impulsar la inserción llaboral
El Principáu va dedicar 800.000 euros más a la convocatoria d'ayudes pa
impulsar la inserción o reinserción llaboral de trabayadores
desemplegaos. Esta cantidá súmase a los 800.000 euros autorizaos el
pasáu mes d'avientu pol Conseyu de Gobiernu, en trámite antemanáu,
pa la convocatoria de subvenciones 2016-2017 destinaes a acciones de
formación pal empléu con compromisu de contratación.
4
La Conseyería d'Empléu, Industria y Turismu decidió ampliar la partida
de la convocatoria ante l'interés amosáu por empreses y agrupaciones
empresariales nestes ayudes. Van poder beneficiase de les
subvenciones les compañíes allugaes nel Principáu que al formalizar
estes contrataciones incrementen la so plantiya.
Les acciones que se desenvuelvan tienen de figurar nel catálogu
d'especialidaes formatives del Serviciu Públicu d'Empléu estatal (SEPE)
y van tar dirixíes, prioritariamente, a trabayadores desemplegaos
inscritos como demandantes d'empléu. Desque concluyan los cursos, les
empreses tendrán de contratar, a lo menos, al 60 % de los participantes,
mientres un periodu de pelo menos seis meses a xornada completa o
l'equivalente si la xornada ye parcial.
Desque s'aprobó la convocatoria, n'avientu del 2015, autorizóse la
formación de 25 trabayadores con un compromisu de contratación del
100 %.
Cambéu de la estructura de la Conseyería d'Empléu
La Dirección Xeneral d'Industria va asumir dende agora les competencies
en materia d'infraestructures de telecomunicaciones y sociedá de la
información. El Conseyu de Gobiernu aprobó güei esti cambéu de la
estructura de la Conseyería d'Empléu, Industria y Turismu.
El Principáu pretende, d'esta miente, impulsar la tresformación dixital de
la industria asturiana y estender la sociedá de la información. La
reactivación del sector industrial ye unu de los principales retos
d'Asturies, sobre manera too lo rellacionao coles tecnoloxíes nueves y la
denominada industria 4.0 o cuarta revolución industrial. Por esa razón,
resulta conveniente que les competencies rellacionaes coles actividaes
industriales y de telecomunicaciones sían xestionaes pol mesmu centru
directivu.
Por ello, la Dirección Xeneral nueva d'Industria va asumir les funciones
de dirección, coordinación, supervisión y impulsu de les competencies en
materia de planificación, promoción, ordenación y control del sector.
Coles mesmes, va ser responsable del fomentu, la evaluación y el
siguimientu de la sociedá de la información, mesmo que del impulsu y
control de les infraestructures de telecomunicaciones y la so esplotación.
Hasta'l momentu, el serviciu de Telecomunicaciones dependía de la
Dirección Xeneral d'Innovación y Emprendimientu.
2,2 millones pal serviciu de tresporte a los centros de día
5
L'Executivu autonómicu autorizó un gastu plurianual de 2.251.322 euros
pa contratar mientres 24 meses el serviciu de tresporte de los centros de
día adscritos al organismu autónomu Establecimientos Residenciales
p’Ancianos d'Asturies (ERA). Trátase de 17 centros repartíos por toa
Asturies, con capacidá pa 436 usuarios.
El serviciu incluye la ida y vuelta a los equipamientos dende'l llugar más
próximu posible a les cases, según el control y apoyu que rica cada
persona mientres el trayectu.
Los centros de día adscritos al ERA son los siguientes: Los Canapés y El
Nodo (Avilés). Clara Ferrer y la residencia Mista (Xixón), El Cristo, Santa
Teresa, y La Tenderina (Uviéu), Valentín Palacio (La Pola Siero) La Vega
(Mieres), Riañu (Llangréu), Santa Bárbara (Sotrondio), Llaviana, Pravia,
Balmonte (Miranda), Palaciu del Villar (Castrillón) El Mirador (Tinéu) y
Les Arriondes.
Eugenio García Rodríguez, xerente nuevu del SEPA
Eugenio García Rodríguez (Casu, 1956) va asumir la xerencia del
Serviciu d'Emerxencies del Principáu d'Asturies (SEPA). El nomamientu
foi autorizáu güei pol Conseyu de Gobiernu.
Llicenciáu en Filosofía y Lletres (división Xeografía y Hestoria) pola
Universidá d'Uviéu, ye espertu en protección civil, coordinación
d'emerxencies y n'estinción de quemes. Dende’l 2006 trabayaba como
técnicu de coordinación del 112 Asturies. Foi bomberu del Serviciu
d'Estinción de Quemes y Salvamentu d'Uviéu (periodos 1981-1985,
1992-2001, 2003-2006), responsable de l'Agrupación Municipal de
Voluntarios de Protección Civil (1985-1992), técnicu d'intervención y xefe
del Área d'Intervención de Bomberos del Principáu d'Asturies (20022003).
Tamién desenvolvió un llabor intensu de voluntariáu en protección civil y
ye especialista en rescates con perros de salvamentu, polo que llegó a
presidir la Unidá Canina de Rescate d'Asturies. Participó en bien de
congresos, conferencies y foros rellacionaos con emerxencies y rescates
y collaboró con publicaciones especializaes en materia de protección civil
y xestión d'emerxencies.
Subvenciones pa los colexos d'abogaos y procuradores
Los colexos profesionales d'abogaos y procuradores d'Uviéu y Xixón van
recibir 1.321.977 euros pa faer frente al pagu de l'asistencia xurídica
gratuita mientres el primer trimestre d'anguaño. Estes subvenciones,
aprobaes pol Conseyu de Gobiernu, distribúyense de la manera
siguiente:
6
—
—
—
—
Colexu d'Abogaos d'Uviéu: 738.974 euros.
Colexu d'Abogaos de Xixón: 486.255 euros.
Colexu de Procuradores d'Uviéu: 63.498 euros.
Colexu de Procuradores de Xixón: 33.248 euros.
El Gobiernu d'Asturies realizó nos años últimos un firme apueste pol
fortalecimientu d'esti serviciu, tanto nes partíes presupuestaries como na
axilización de los pagos a los profesionales. Asina, el presupuestu nel
periodu 2012-2015 xube un 63,7 %, mentes que'l tiempu p'abonar les
prestaciones reduzse a tres meses, tres un alcuerdu soscritu en febreru
del pasáu añu pola Conseyería de Presidencia y Participación Ciudadana
y los colexos d'abogaos de Xixón y Uviéu.
El Principáu ye la cuarta comunidá que destina más fondos per habitante
a l'asistencia xurídica gratuita, con una media de 5,15 euros, namás
superada por Cataluña, Canaries y País Vascu. La media nacional ta en
4,81 euros.
Alredor de 3.000 profesionales de l'abogacía encárguense d'emprestar
estos servicios n'Asturies. El más demandáu ye’l turnu d'oficiu, siguíu de
l'asistencia lletrada y los casos rellacionaos cola violencia contra les
muyeres.
Prórroga de la cesión de la parcela de l'antigua escuela de peritos
El Conseyu de Gobiernu aprobó la prórroga de la cesión al Conceyu de
Xixón, mientres cuatro años, de la parcela de l'antigua Escuela de
Peritos, allugada na cai Manuel Llaneza, qu'anguaño destínase a
aparcamientu públicu de vehículos. El Conceyu xestiónala dende’l 2012,
cuando s'alcordó la cesión per primer vegada.
7