Circle of life

Circle of life
Komo studiante mi tabata dunadó di sanger. Un dia na mart mi a mèldu pa mi donashon periódiko.
Tras di lokèt tabatin dos enfermera. Nan tabata okupá ku un dosié. Mi a tende esun bisa e otro: "Bo
ta yuda e hòmber ei un ratu?". Den un refleho m’a drei wak mi tras. Tabatin un hòmber mi tras? Mi
no a realisá ku ta di mi e tabata papia. Mi tabatin 22 aña, pero mi no tabatin e sintimentu ku mi
tabata un 'hòmber' ètòl. Te dia mi a yega den kareda di trinta aña nan ei, ainda mi tabata sintimi un
yònkuman bon mirá. Na e momentunan akí tambe mi ta sintimi sigur binti aña mas yòn ku mi edat
real mes. Esaki ta un fenómeno konosí serka sikólogonan. Práktikamente tur hende tin e. Tòg no tin
awa pa laba, komo hende bo ta bira bieu i finalmente bo no por sigui biba.
Kiko esaki tin keber ku governance? Un empresa tin un siklo di bida, meskos ku un hende. Un
empresa tambe por sinti su mes mas yòn ku e ta, bon mirá. Sinembargo tin un diferensia grandi. Un
empresa por keda rehubenesé su mes. Un hende nò, ni maske kuantu facelift i total make-over bo
lòs riba dje. Un empresa no mester disparsé manera un hende finalmente si lo hasi. En prinsipio un
empresa por biba eternamente. I tòg hopi biaha tin empresa ta muri òf bai fayit. Nan ta ploi, muri
bai. I esaki ta interesante. Kon bin, si esaki no ta nesesario bon mirá?
Nos konosé e famoso ponensia di Darwin ku den naturalesa no ta kestion ku bo mester ta esun di
mas fuerte òf esun di mas sabí si bo ke sobreviví, pero ku si bo ta kapas pa adaptá bo mes. Esaki ta
konta pa empresanan tambe. Mi ta haña e ehèmpel di Lego fasinante. Tur hende konosé e blòkinan
chikí koló fuerte ei. A traha e promé Lego na final di añanan kuarenta di siglo pasá. Den e tempu ei,
miónes di mucha a hunga oranan largu ku Lego. Hopi adulto ta hasi esaki te ainda. Na final di siglo
pasá kos no tabata pintá mashá bon pa Lego. E era di kòmpiuter tabata un echo. Kua mucha ke
hunga ku blòki ainda si bo tin un wega di kòmpiuter? Lego a rehubenesé su mes dor di bai bèk na
nan core business – fabriká blòki – i kombiná esaki ku temanan moderno. Awendia Lego tin su mes
kanal di YouTube ku mas di un bion miradó. Un di e weganan di kòmpiuter di mas popular,
Minecraft, ta basá riba Lego. Entretantu Lego ta un di e empresanan di famia di mas grandi na
mundu. Aña pasá (2015), nan ganashi a subi ku 25% te mas ku un bion euro! Bon trabou.
Pero komo gerensia i supervisor nos tur por hasi esaki. Den realidat e ta nos tarea di mas
importante. E problema ta ku hopi biaha nos no ta sufisientemente konsiente di esaki. E korekore i
nònsèns di tur dia ta apsorbé nos dje tantu ei ku nos no ta realmente wak rondó di nos i realisá kiko
nos mester hasi pa adaptá e empresa na e sirkunstansianan nobo kada bes. I e ora ei, den realidat, ya
e empresa ta kayendo fo’i otro. Den tòp di sektor empresarial nos ta pensa kada bes ku nos refleho- i
reakshonnan ku algun aña pasá tabata perfekto, te ainda ta i den futuro tambe lo ta asina. Nos ta
kere ku e empresa lo no bira mas bieu. Esaki debidamente ta e kaso. Pero bo por hasi algu na esaki
ku ta mas efektivo ku un facelift. Ke men lanta fo’i soño. E empresa ta sigui biba e ora ei.
1