2 Pedro - Scripture Earth
Anuncio
2 PEDRO 1 ..... 1 Anen en Simón Pedro, en ajsmajmaꞌ rxin Jesucristo, chkaꞌ en apóstol rxin. Anen quentzꞌibaj jawra carta y quentak ela ewqꞌuin ixix jewlon chic yukbal ecꞌuꞌx ruqꞌuin Jesucristo. Jyukbal ecꞌuꞌx ruqꞌuin Jesús ajniꞌla nim rukꞌij, junam ruqꞌuin ajniꞌ kawlon ajoj. Jesucristo arjaꞌ Dios, arjaꞌ Toꞌonel kxin, y rey-on chewa che ewcꞌan rbeyal rxin Dios y rmal cꞌaraꞌ tak ewlon chic yukbal ecꞌuꞌx ruqꞌuin. 2 Xtqꞌuiy ta, xtwachin ta utzil je nsipaj Dios ruqꞌuin je quiꞌil necꞌjeꞌa awanm chwech. Wkꞌij kꞌij newutkij más ajniꞌ rnaꞌoj Dios, wnewutkij más ajniꞌ rnaꞌoj Kajaw Jesús, tzraꞌ cꞌa newil waꞌ jawra utzil ruqꞌuin je quiꞌil necꞌjeꞌa awanm chwech Dios. ..... 3 Njelal achnak prukꞌaꞌ Dios cꞌo waꞌ, arjaꞌ njelal rey-on chka je ncꞌatzina chka che nokocwina nekcꞌaj utzlaj cꞌaslemal jwen nutzꞌet. Caraꞌ nuban Dios chawa tak nawutkij rnaꞌoj. Arjaꞌ xokrsiqꞌuij ch-utz cꞌaraꞌ nok-oca rexbil chpam regloria ch-utz cꞌaraꞌ chkaꞌ che nekcꞌaj jun utzlaj anm ajniꞌ ranm jaꞌ. 4 Caraꞌ rebnon, cꞌola jeꞌ achnak rtzujun chka jeꞌ nmak tak mibil y congan nim rukꞌij. Rmal je rtzujun ta chka tak nokocwina nkatoꞌ kiꞌ chpam rtzilal rxin rwech ruchꞌlew, com je rwech ruchꞌlew xyojtanak rmal itzel tak yarinem jcꞌola ptak canm wnak. Caraꞌ xuban Dios chka ch-utz cꞌaraꞌ nkaqꞌuex knaꞌoj y ne rnaꞌoj Dios chic nekcꞌaj. 5 Rmal cꞌaraꞌ quenbij chewa, tecsaj echukꞌaꞌ che rbanic je xtenbij chewa ra ch-utz cꞌaraꞌ che nqꞌuiya y nwachina rnaꞌoj Dios ptak ewanm. Ixix cꞌola yukbal ecꞌuꞌx ruqꞌuin Jesucristo per tebnaꞌ chkaꞌ je xtenbij chewa ra: cow quixpeꞌa che rbanic nimlaj utzil je rxin Dios, y twutkij nak 603 El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc. 2 PEDRO 1 604 nrajoꞌ ranm Dios, 6 y techꞌboꞌ rij rwech nak neban che mteyaꞌ ewiꞌ prukꞌaꞌ rtzilal che nquixrucꞌom ela, y tecchꞌoꞌ chka bechnak opech npeta chewij, y ne rpensar Dios tecsaj, 7 y lokꞌ queꞌen-aꞌ ewchꞌalal, y tecꞌjeꞌa tesmaja ojben riꞌil rxin Dios ptak ewanm. 8 Njelal jxentzꞌibaj chewa ra we nqꞌuiya we nwachina ptak ewanm, tzraꞌ cꞌa ntzꞌeꞌt waꞌ che bien ewutkin rnaꞌoj Jesucristo, y tzraꞌ nkꞌaljin waꞌ chkaꞌ chcongan xecsaj echukꞌaꞌ che rojtakxic. 9 Per je wnak jmajoꞌn cuqꞌuin jxentzꞌibaj kaja arj-eꞌ e ajniꞌ moyaꞌ, xmajoꞌn nquetzꞌet ta je rtzujun ta Dios com xjaraꞌ nquetzꞌet jcꞌola chenkaj je rxin rwech ruchꞌlew. Mesquier nerkaj chic pquewáꞌ che echꞌachꞌjorsan chic chpam ojer tak quil quemac. 10 Rmal cꞌaraꞌ wchꞌalal, tucsaj más echukꞌaꞌ che rbanic jxentzꞌibaj ra ch-utz cꞌaraꞌ cꞌola eseguro che xixsiqꞌuisa y xixchaꞌa che xixoca prukꞌaꞌ Dios. Wcaraꞌ neban jaraꞌ majoꞌn nquixkaj ta chpam il mac 11 y congan quiꞌil ecꞌulic xtbaꞌna chpam rgobierno Kajaw Jesucristo, arjaꞌ Toꞌonel kxin, y je rgobierno necꞌjeꞌa rxin junlic. 12 Rmal cꞌaraꞌ tak quennataj waꞌ chewa njelal jxentzꞌibaj ra. Caraꞌ quenban mesque ewutkin chic y mesque cwernak chic ewanm chpam utzlaj tzij jeniman jrecꞌmon ta Jesucristo. 13 Jquenchꞌob anen nrubey waꞌ quenban che quennataj chewa. Tak xquencoma, tzraꞌ cꞌaraꞌ xtentenbaꞌ waꞌ rnatxic chewa. 14 Anen wutkin xyamer quenyaꞌ cana rwech ruchꞌlew, jaraꞌ kꞌalsan chic chenwech rmal Kajaw Jesucristo. 15 Anen quenchumsaj cana je ncꞌatzina chewa ch-utz cꞌaraꞌ nenataj waꞌ mesque encomnak chic. ..... 16 Ajoj xkachꞌob chewech nak rbanic tak xtpet chic jmul Kajaw Jesucristo, congan chic kꞌaxnak rchukꞌaꞌ tzraꞌ. Ja ocnak kbase tak xekbij chewa, jaraꞌ tak xyataja chka che xkatzꞌet ruqꞌuin kkꞌawech Jesucristo tak rcꞌan ruchꞌaꞌ Dios. Mjaraꞌ ta xkacsaj kbase jleꞌ ojer tak tzij xwankersan cmal wnak y quebnon rbanic. 17 Ajoj xkatzꞌet Jesús tak xkꞌalsasa rmal Ttixel chcongan nim rukꞌij y tak rcꞌan regloria Dios. Jaraꞌ xbantaja tak xekcꞌaxaj rukul nimlaj Dios tak cawra xbij tzra Jesús ra: —Ja cꞌa waꞌ Wlecꞌwal, congan quenwajoꞌ y congan quenquicota tzrij, caraꞌ xbij. 18 Ajoj okcꞌola ruqꞌuin Jesús pe rwáꞌ jyuꞌ jyonan rmal Dios y rmal cꞌaraꞌ tak xekcꞌaxaj jkul jpenak chcaj. 19 Chkaꞌ cꞌo chic jun nkacsaj kbase jmás chna seguro, jaraꞌ rtzojbal Dios je cbin cana y ctzꞌiban cana jeꞌ profeta rxin Dios. Jaraꞌ je ctzꞌiban cana yatanak chewa che neyaꞌ rukꞌij. Je ctzꞌiban cana jaraꞌ ajniꞌ jun kꞌakꞌ je nsakersaj abey chakꞌaꞌ, ncatrutoꞌ chpam keꞌjkuꞌm. Y tak npeta rsakric jaraꞌ majoꞌn chic kꞌejkumal, y tak nel ta kꞌij nsakersaj bien njelal. Y caraꞌ cꞌa rbanic chkaꞌ tak xtpet chic jmul Jesucristo, arjaꞌ nsakersaj bien ewanm. El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc. 605 2 PEDRO 1, 2 20 Je ctzꞌiban cana profeta chpam rtzojbal Dios congan ncꞌatzina chewa che nchꞌobtaja ewmal che mjun ta wnak xkꞌalsana nak rbanic, per je xkꞌalsana chquewech jaraꞌ Espíritu Santo. 21 Mjun wnak ta xcꞌana cxin e santlaj tak profeta ojer che rbixic jtzꞌibtanak cana, com arj-eꞌ xeyonaxa rmal Dios y Espíritu Santo xcꞌana cxin che rbixic. 2 ..... 1 Per ecꞌola profeta ojer chkaꞌ chquecjol tnamet Israel jme Dios ta takyon pa cxin, y caraꞌ chewa ixix chkaꞌ nquewanker na checjol jleꞌ maestro per me ktzij ta che tijonem rxin Dios nqueyaꞌ. Arj-eꞌ pnalakꞌ xtquecsaj itzel tak tijonem checjol rtzojbal Dios, y jtijonem xtqueyaꞌ xe nyojtaja acꞌaslemal rmal. J-eraꞌ wnak majoꞌn chic necnimaj ta Jesucristo che xutoj quil quemac. Jaraꞌ jun nimlaj juicio necsiqꞌuij chquij per majoꞌn cnaben tak xtekaja chquij. 2 Chkaꞌ e qꞌuiy na wnak xqueniman na cxin y nquequexbilaj chpam rtzilal je xtqueban. Xe rmal itzel cꞌaslemal je ccꞌan j-eraꞌ maestro tak itzel xttzꞌeꞌta utzlaj bey je cꞌtun chkawech rmal Dios. 3 Arj-eꞌ xpak necyarij y rmal cꞌaraꞌ nquixqueban engañar, xtecbij wen tak tzij chewa che necwesbej pak chewa. Per Dios ojer rchumin ta jun juicio cxin y nerlaꞌ na jun kꞌij tak xqueꞌekaja chwech lowloꞌ. 4 Ajniꞌ xuban Dios ojer chca jeꞌ ángel jxemajcuna chwech, majoꞌn xpoknaj ta quewech y xerutak el chpam lowloꞌ pjun kꞌejkumlaj lwar, ebcꞌon pcadena che reybxic nimlaj kꞌij rxin juicio. 5 Chkaꞌ pretiemp Noé ojer Dios xutak ta jun juicio pquewáꞌ itzel tak wnak. Jaꞌ Noé xuyaꞌ rbixic chquewech rbeyal rxin Dios, per majoꞌn xecnimaj ta y Dios xutak jun nimlaj kꞌjaljab chquij. Xruyon Noé xtotaja ruqꞌuin ewkuꞌ rexbil. 6 Chkaꞌ jaꞌ Dios ojer xutak ta jun juicio pe rwáꞌ c-eꞌ tnamet Sodoma y Gomorra. Congan lowloꞌ xbaꞌna tzra jawra c-eꞌ tnamet, xcꞌata y chaj xbaꞌna tzra. Caraꞌ xuban Dios jaraꞌ xucsaj rbeyal chquewech ja jleꞌ chic itzel tak wnak jqꞌuemjana queꞌalexa. 7 Per Dios cꞌola jun acha xutoꞌ chpam cꞌatic je xbantaja, jaraꞌ Lot rubiꞌ, y arjaꞌ rbeyal rxin Dios rcꞌan y congan itzel xutzuꞌ rtzilal je xqueban wnak. 8 Jaꞌ Lot jaraꞌ rbeyal rxin Dios rcꞌan. Njelal kꞌij tak nutzꞌet rtzilal je nqueban wnak y tak ncꞌaxaj itzel tak tzij jnecbij, y com jaꞌ rbeyal rxin Dios rcꞌan rmal cꞌaraꞌ congan ntiꞌona ranm je nqueban. 9 Tzraꞌ cꞌa nkatzꞌet waꞌ che Dios arjaꞌ bien rutkin nquerutoꞌ je nquebnowa respetar rxin, per chca wnak jmajoꞌn nqueban ta rbeyal, bien rutkin chkaꞌ nqueruyaꞌ chpam lowloꞌ che reybxic nimlaj juicio. 10 Y más chna lowloꞌ nuban chca wnak je nqueyaꞌ quiꞌ prukꞌaꞌ itzel tak yarinem jcꞌola ptak canm. Arj-eꞌ xitzel nquenaꞌ tak nquebaꞌna mandar rmal Kajaw Jesucristo. Arj-eꞌ majoꞌn necxibej ta quiꞌ nqueban rtzilal y nqueban jeꞌ achnak jcꞌola El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc. 2 PEDRO 2 606 cgan nqueban. Caraꞌ cbanic y majoꞌn necxibej ta quiꞌ necbij itzel tak tzij chca je nmak quekꞌij. 11 Xmajoꞌn naraꞌ nquetzijon ta jeꞌ ángel caraꞌ mesque más chna kꞌaxnak cchukꞌaꞌ y más nmak quekꞌij chquewech wnak. Jeꞌ ángel tak nqueꞌekaja chwech Dios arj-eꞌ majoꞌn itzel tak tzij necbij je nkꞌatbexa tzij chquij je nmak quekꞌij. 12 Per j-eraꞌ wnak je nqueyaꞌ quiꞌ prukꞌaꞌ rtzilal j-eraꞌ xe e ajniꞌ e chcop, xmajoꞌn cpensar. Jeꞌ chcop chkabar nquemin waꞌ quiꞌ, xe nquechaꞌpa y nquecomsasa com njaraꞌ waꞌ yatanak chquij. J-eraꞌ wnak tak cꞌola nbixa chca mesquier nchꞌobtaja cmal, congan cowlaj tak tzij necbij y xe nqueywara. Je rtzilal nqueban jaraꞌ necsicꞌbej cmic chquij, 13 jaraꞌ rtojbalil rtzilal je nqueban. Arj-eꞌ majoꞌn qꞌuixbal ta nquenaꞌ, congan nquequicota neckꞌalsaj rtzilal mesque ne pkꞌij. J-eraꞌ tak nquixquexbilaj tzra w-im xruqꞌuix Dios nqueyaꞌ, nquequicota nqueban rtzilal checjol y xe engaño recꞌmon ta je nqueban. 14 Majoꞌn ra mquita necyarij rwech jun ixak, majoꞌn nquecos ta che rbanic rtzilal. Jeꞌ wnak jmajoꞌn cwernak ta canm chpam rtzojbal Dios nquecsiqꞌuij chpam rtzilal. Kas necꞌchoja y nbantaja cmal che rqꞌuiyersic cmibil. Caraꞌ cbanic, y etzelan chic rmal Dios. 15 Quey-on cana utzlaj bey, xe etzaknak. Jbey ccꞌan jaraꞌ je xcꞌaj ja ojer profeta rbin-an Balaam rlecꞌwal Beor, com arjaꞌ congan xel ta rucꞌuꞌx tzrij chꞌcoj pak mesque m-utz ta rchꞌaquic nuban. 16 Per cꞌola jun chꞌit bur xyataja tzra rmal Dios che ntzijona y xchꞌojquij tzra Balaam jitzel naꞌoj jrechꞌbon. Y xkꞌiꞌla Balaam rmal bur tzrij itzel naꞌoj jrechꞌbon. 17 J-eraꞌ wnak xe e junam ruqꞌuin jun tzꞌucnel yaꞌ je chkij chic y majoꞌn chic rcꞌatzil, xe e ajniꞌ jleꞌ sutzꞌ xnecꞌmar ela rmal kꞌekꞌ. Arj-eꞌ chumin chic jun quelwar congan kꞌejkuꞌm y tzraꞌ nquecꞌjeꞌ waꞌ rxin junlic. 18 Necbij nmak tak tzij per xmajoꞌn achnak recꞌmon ta. Ja itzel tak yarinem jcꞌola ptak canm jaraꞌ nquecsicꞌbej wnak jmajruꞌ ta tiemp equey-on cana jeꞌ quexbil je xe rtzilal cꞌayona cxin. 19 Cawra nectzujuj chca ra: —Ixix ix libre, majoꞌn jun cꞌola rukꞌaꞌ chewa, caraꞌ necbij chca. Per nexte j-eꞌ ta e libre com xe echpon rmal rtzilal. Chka bechnak opech rtzilal atchapyona, wmesquier ncatecwina tzrij jaraꞌ me at libre ta, atcꞌol cꞌaraꞌ prukꞌaꞌ jchapyona awxin. 20 J-eraꞌ wnak xquetoꞌ quiꞌ chpam rtzilal rxin rwech ruchꞌlew tak xcutkij nak rbanic Kajaw Jesucristo je Toꞌonel kxin. Per wxectzꞌapij chic jmul quiꞌ chpam rtzilal y nquechaꞌp chic jmul rmal, jaraꞌ más chna lowloꞌ nela ccꞌaslemal que chwech ajniꞌ quebnon nabey. 21 Más na utz mquita xcutkij nak rbanic rbeyal rxin Dios que chwech je xqueban, com arj-eꞌ xcutkij nak rbanic rbeyal y xeccꞌaxaj jsantlaj mandamiento rxin Dios per jaraꞌ xe xqueyaꞌ cana. 22 Je xqueban ajniꞌ nbij jun cꞌambal tzij jcawra nbij ra: —Jtzꞌeꞌ nemloj chic jmul y neretjaꞌ rex-ab, caraꞌ nbij. Jun chic cawra nbij: —Tak nchꞌajtaj ela rij jun aꞌk nba chic jmul chpam chꞌbak, caraꞌ nbij. El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc. 607 3 2 PEDRO 3 ..... 1 Quilaj tak wchꞌalal, jawra rucab carta quentak ela ewqꞌuin junam rsamaj ruqꞌuin nabey carta jnetkon chic ewqꞌuin. Cawra rsamaj ra che nnataj jeꞌ chewa jchꞌobtanak chic ewmal, com anen wutkin chmajoꞌn eniman ta itzel tak tijonem. 2 Rmal cꞌaraꞌ quenbij chewa, terkaja pnewáꞌ je cbin cana e santlaj tak profeta rxin Dios. Terkaja pnewáꞌ chkaꞌ jmandamiento je y-on cana rmal Kajaw Jesucristo je Toꞌonel kxin, jaraꞌ kbin chic chewa ja ok apóstol. 3 Congan ncꞌatzina che nchꞌobtaja ewmal che pe rqꞌuisbal kꞌij ecꞌola wnak nquepe na jxe ykꞌonem necrebnaꞌ y xe nqueyaꞌ quiꞌ prukꞌaꞌ itzel tak yarinem jcꞌola ptak canm. 4 Arj-eꞌ cawra xtecbij chca jleꞌ chic wnak ra: —Bin cana che npeta Cristo per ¿le npeta nechꞌob ixix? Per rwech ruchꞌlew majoꞌn nqꞌuextaj ta y majoꞌn nqꞌuis ta. Ajniꞌ pquetiemp e ktiꞌt kawmaꞌ chkaꞌ tak xwanker ta rwech ruchꞌlew ncaraꞌ waꞌ rebnon camic, caraꞌ xtecbij. 5 Per arj-eꞌ majoꞌn ncajoꞌ ta necnataj che caj ruqꞌuin rwech ruchꞌlew mchek tcꞌola, per rmal rtzojbal Dios tak xwankera. Je rwech ruchꞌlew pyaꞌ xwankersas waꞌ y xel ta pe rwáꞌ yaꞌ. 6 Y jaꞌ yaꞌ chkaꞌ xeyjowa rwech ruchꞌlew ojer, jaraꞌ tak xuban nimlaj kꞌjaljab y xba chic jmul chpam yaꞌ y xqꞌuisa. 7 Y rmal rtzojbal Dios chkaꞌ tak caj ruqꞌuin rwech ruchꞌlew jcꞌola camic xcꞌatic y xporxic reyben. Tzra cꞌaraꞌ xtcꞌat waꞌ tak xterlaꞌ nimlaj kꞌij rxin juicio y conjelal wnak jmajoꞌn ncajoꞌ ta Dios nqueba chpam lowloꞌ. 8 Quilaj tak wchꞌalal, mtemestaj ta je xtenbij chewa ra, jun mil junaꞌ mesque congan nim nekcꞌaxaj ajoj per chwech Dios xjunam ruqꞌuin jun kꞌij. 9 Caraꞌ quenbij chewa com ecꞌola wnak nquebina che Kajaw Dios cꞌam-an nuban cumplir je rbin cana, per jaraꞌ mcaraꞌ ta. Dios congan rpaciencia kuqꞌuin ja ok wnak com arjaꞌ majoꞌn nrajoꞌ ta chcꞌo ta jun xtba ta chpam jnimlaj lowloꞌ. Je nrajoꞌ ranm jaꞌ che conjelal wnak nqueqꞌuex cnaꞌoj y nqueyaꞌ cana rtzilal. 10 Per ne npet waꞌ nimlaj kꞌij je rchumin Kajaw Dios, jaraꞌ ajniꞌ tzra jun elkꞌom majoꞌn nnabexa tak nerebnaꞌ alakꞌ. Jaraꞌ kꞌij ncꞌata njelal. Jcaj nerkowa y nqꞌuisa, njelal jocnak rwech ruchꞌlew nqꞌuis na rmal nimlaj cꞌatic, ncꞌat na rwech ruchꞌlew y chkaꞌ njelal jcꞌola chwech, majoꞌn achnak nutoꞌ riꞌ. 11 Com jcaj ruqꞌuin rwech ruchꞌlew xe ncꞌata y nqꞌuisa, rmal cꞌaraꞌ tak quenbij chewa, congan ncꞌatzina che nekcꞌaj jun chꞌajchꞌoj anm y nkaban jeꞌ achnak je nrajoꞌ ranm Dios. 12 Koquicota che reybxic jnimlaj kꞌij jchumsan rmal Dios, kabnaꞌ je nrajoꞌ chka che nkaban ch-utz cꞌaraꞌ npeta alnak. Mesque jaraꞌ kꞌij je xtcꞌata caj y xtqꞌuisa y El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc. 2 PEDRO 3 608 mesque njelal jocnak rwech ruchꞌlew nqꞌuisa rmal kꞌakꞌ, 13 per ajoj nokquicota che reybxic jun cꞌacꞌ caj y jun cꞌacꞌ ruchꞌlew ajniꞌ rtzujun cana Dios, y tzraꞌ nbantaj waꞌ xruyon rbeyal rxin Dios. 14 Rmal cꞌaraꞌ quenbij chewa quilaj tak wchꞌalal, com ajoj keyben jun cꞌacꞌlaj caj y cꞌacꞌ ruchꞌlew kacsaj kchukꞌaꞌ che rbanic je nrajoꞌ ranm Dios ch-utz cꞌaraꞌ xjun kabnon ruqꞌuin tak xkoꞌekaja chwech, y kas ta chꞌajchꞌoj kanm y majoꞌn nak nokchapbexa. 15 Kas bien ta xtchꞌobtaja ewmal che Kajaw Dios mchek tcꞌola rpaciencia kuqꞌuin ja ok wnak, arjaꞌ nrajoꞌ chka che noktotaja konjelal. Caraꞌ bin chewa rmal quilaj kchꞌalal Pablo. Jaraꞌ xbij chewa tak xutak carta ewqꞌuin y Dios yoyona rnaꞌoj che rbixic. 16 Arjaꞌ xbij chewa jnemjon rbixic chewa camic. Njawaraꞌ ntzꞌibaj jaꞌ chpam njelal carta jnuban. Cꞌola ntzꞌibaj Pablo chpam carta jcongan pen rchꞌobic y ecꞌola jmajoꞌn ctijon ta bien quiꞌ y majoꞌn cwernak ta quecꞌuꞌx chpam rtzojbal Dios, j-eraꞌ xe nqueqꞌuex rbixic je rtzꞌiban cana Pablo ajniꞌ nqueban chic tzra jleꞌ chic rtzojbal Dios. Jaraꞌ necsicꞌbej nimlaj lowloꞌ chquij. 17 Rmal cꞌaraꞌ quilaj tak wchꞌalal, com ixix ewutkin chic tebnaꞌ cwent, me tquixkaj ta chpam itzel tak tijonem je nqueyaꞌ itzel tak wnak. Ixix cwernak ecꞌuꞌx chpam rtzojbal Dios, mtquixyojtaj ta. 18 Per jneban ne tqꞌuiy waꞌ más ptak ewanm utzil je nsipaj Dios, nte xtewutkij waꞌ más ajniꞌ rnaꞌoj Kajaw Jesucristo je Toꞌonel kxin. Arjaꞌ nte xtyaꞌ waꞌ rukꞌij camic y rxin junlic. Amén. El Nuevo Testamento en Tzutujil (Santiago Atitlán) de Guatemala, 2da ed. ©2010, Wycliffe Bible Translators Inc.
![[Libro] "El marxismo y la justicia social. La idea de... en Ernesto Che Guevara"](http://s2.studylib.es/store/data/003536401_1-0ffe0dcd9ebcd44131a00eac1da28c4f-300x300.png)
