Formatu orixinal - Gobierno del principado de Asturias

Lunes, 12 de septiembre de 2016
INTERVENCIÓN
DEL
PRESIDENTE
DEL
PRINCIPÁU D’ASTURIES, JAVIER FERNÁNDEZ
Actu inaugural del cursu 2016-2017 de la Universidá
d’Uviéu
Escelentísimu rector de la Universidá d'Uviéu, profesores, estudiantes,
señores y señores.
Va cuatro meses participé na toma de posesión del rector Santiago
García Granda. Esti discursu empieza nel puntu onde terminé aquella
intervención: nun mensaxe d'ánimu pa él y el so equipu. Van liderar la
Universidá d'Uviéu en momentos complicaos. Si ellos lo saben, los
demás nun tenemos que lo escaecer: tou compromisu con esta
institución va ser poco. Vaya per delantre, por ello, el respaldu del
Gobiernu d'Asturies al so llabor.
L'empiezu del cursu ye'l día d'añu nuevu. Anque'l calendariu afite'l 1 de
xineru como l'entamu, les nuestres vides van al compás escolar: pasen
los rellumos del branu, volvemos al mate de la rutina y asina enllazamos
añu tres d'añu. D'un tiempu acá ta de moda falar de si ye ciertu o non el
síndrome postvacacional, que sería daqué asina como’l desasosegáu
spleen de Baudelaire, una atristada esgana esistencial, nesti casu con
causa conocida: el regresu al trabayu. Verdaderamente, nun soi quien pa
poner en dulda que tal cosa asoceda, pero sí sé que quien gobiernen les
instituciones nun-y la pueden, nun la podemos permitir. Inclusive anque
como nesta casa haya series razones pa la murria: les muertes de dos
figures pernomaes, Gustavo Bueno y José Barluenga, xustificaríenla,
tanto contribuyeron dambos a engrandecer esta Universidá. La mención
ye obligada y recordalos tamién, porque amás del so nome y la so obra
dexen un territoriu, un camín intelectual, científicu y académicu que, al
ser esquizáu y ampliáu, desagua nuna alcordanza suya más fecunda y
cotidiana que la que suponen les efemérides y los aniversarios.
Sicasí los aniversarios hai que los celebrar, anque dacuando la palabra
celebrar nun sía la más afayadiza.
Verán: va unos díes, el 22 d'agostu, cumpliéronse ochenta años de la
muerte de Melquíades Álvarez, una de les figures más destacaes del
panorama políticu del primer terciu del sieglu pasáu.
1
Nun voi falar de la trayectoria pública que, acullá de la so estraordinaria
oratoria y el so altor intelectual ye necesariamente revesosa, nin tampoco
al contestu social y políticu nel que trescurrió, nin tampoco al so
desgraciáu y tráxicu final.
Quiero señalar tan solo dos coses: una que, como ustedes saben, pero
muncha xente non, yera caderalgu d'esta Universidá y, anque la so
trayectoria sía muncho más política qu'académica, convién que se sepa.
Y otra, que lleendo una publicación sobre'l personaxe de fai más d'una
década (refiérome a la publicación, non a la llectura, que ye recién)
l'autor José Girón, profesor d'esta Universidá, describe la estrecha
relación de Melquíades con Sela, Aramburu, Buylla o Clarín y atribuye a
esti postreru un papel protector, impulsando'l pasu de Melquíades a la
esplicación de l'asignatura de Derechu Romanu, cuando Clarín la dexó
pa impartir Natural.
Lo más interesante, pa mi, ye que Melquíades esplicábala non solo nesti
vieyu caserón de Valdés Salas sinón compartiendo colos sos alumnos
peripatéticos paseos poles cais d’Altamirano y Cimavilla, o pel Campu
San Francisco, ensin que, al paecer, la proximidá de la relación influyera
nos niveles d'esixencia y rigor.
Pelo menos eso paecen suxurir unos versos apaecíos na revista
universitaria El Biberón en 1899 adulterando los conocíos de Calderón y
que voi permitime lleer porque son ilustrativos, a pesar del so calter bufo,
nesti solemne actu:
Cuentan que Clarín un día
tan triste y mohíno estaba
que solo se contentaba
de ver los que suspendía
¿Habrá otro para sí decía
que suspenda más que yo?
Y cuando el rostro volvió
halló la respuesta viendo
a Melquíades suspendiendo
los pocos que él aprobó
Una cercanía asina, compatible cola esixencia, esa proximidá que
coesiste col rigor, esa combinación d'enfotu y respetu nun sé si sigue
habiéndola nel mundu académicu, pero asegúro-yos que ye yá
impensable nel políticu.
2
Esi modelu cooperativu ente dos suxetos (profesor y alumnu) siempre
sometíos a una tensión natural, resulta bien prestosa pa quien nel
territoriu de la política asumimos modelos de comportamientu que
s'escosen nunos antagonismos cada vez más implacables, estériles y
concretos.
Por eso hai tamién series razones pa la murria.
Pero l'escesu de murria —yá saben, aquella bilis negra que dicía
Hipócrates— ye, como'l mieu, unu de los más eficaces paralizantes que
se puede imaxinar. Y insisto en qu'eso nun nos lo debemos consentir.
Porque si hai daqué realmente capaz d'acaroñar una institución ye la
inutilidá, consecuencia inevitable de la inacción. Antes alvertí de que al
aludir al síndrome postvacacional nun lo cuestionaba. Profesores
eminentes de psicoloxía y de psiquiatría tien esta Universidá pa debatir la
so esistencia. Lo que caltengo ye que ta de moda, como antes lo taba
falar del síndrome metabólicu, de la intelixencia emocional o, por viaxar
a otros ámbitos, de la sinerxa y la entropía. ¿Nunca repararon en cómo
se popularicen hasta l'abusu conceptos y espresiones que depués
aparren y escaécense, igual qu'un estampáu o la corte d'un pantalón?
Pongo otros exemplos. Va unos meses nun había discursu políticu que
nun incluyera la espresión “fueya de ruta” nin que nun zarapicara contra
unes tarrecibles “llinies coloraes” supuestamente infranquiables (como
aquella llinia Maginot concebida pa fortificar Francia tres la Primer Guerra
Mundial y que malapenes aguantó un asaltu). Meses atrás, quien nun
tenía “llinies coloraes” yera un políticu desarrapáu, nun yera naide.
Asina entós, magar que yá nun tea de moda, tendríemos de volver a falar
de la entropía. Pa la física, la repercusión de la fórmula grabada na
tumba de Ludwig Boltzmann nel campusantu central de Viena ta fora de
dulda. Por analoxía, tamién podemos falar d'entropía institucional.
Pensemos si güei n'España nun tamos precisamente viviendo un
procesu obediente a la segunda llei de la termodinámica, nel que la
cantidá d'entropía del sistema s’incrementa de forma continua.
Intuyen que toi aprovechando la intervención pa referime a asuntos que
s'asitien lloñe d'esti caserón.
Almito, faltaría más, que me critiquen por estes escursiones, pero
déxenme ser preveníu y escudame nel diccionariu d'autoridaes. Na so
Misión de la Universidá, Ortega afirmaba qu'esta “precisa tamién un
contactu cola esistencia pública, cola realidá histórica”. El filósofu añedía,
nun sé si nel erial, que la Universidá “tien que tar tamién abierta a la
plena actualidá; entá ye más: tien que tar metanes ella, somorguiada
nella. Y nun digo esto namás porque la escitación animadora del aire
llibre hestóricu convenga a la Universidá, sinón tamién, viceversa, porque
la vida pública precisa urxentemente la intervención nella de la
Universidá como tal”. Fin de la cita.
3
Comparto'l planteamientu d'Ortega. Va muncho que les facultaes
dexaron de ser edificios recluyíos sobre sigo mesmos; güei, que
l'academia sía un compartimientu independiente ye cenciellamente
impensable. Preparémonos pa la cayida de tolos murios, escontra una
sociedá abierta, porosa y interconectada. Por eso atrévome a prosiguir la
reflexón, convencíu de que de nenguna manera puede resultar ayena
nesta aula. ¿Cómo van senos estraños el bloquéu institucional o les
tensiones soberanistes, de les que, llaméntolo, yá-yos falé n'otres
ocasiones? Preciso que toi refiriéndome a asuntos con consecuencies
práctiques, que repercuten sobre esta Universidá y sobre caún de nós.
Tengo esti precuru porque hai quien confunde estes reflexones con una
divagación metafísica, dicho con respetu a los doctores na materia. Los
efectos son fáciles d'alvertir: nun ye lo mesmo disponer de presupuestu
que nun tenelo; nun ye igual salvaguardar la caxa única de la Seguridá
Social qu'estazar l'Estáu; nun ye lo mesmo encarar la reforma del
financiamientu autonómicu que dexar pasar les fueyes del calendariu, en
palabres de Maura; nun ye lo mesmo buscar un pactu d'Estáu pola
educación qu'aplicar la LOMCE. Nun ye lo mesmo cuadrar les cuentes
amenorgando más de 20.000 millones d'euros el gastu públicu d'equí al
2018 si empezamos más tarde l'axuste.
Esculpen l’etcétera, pero'l llistáu ye demasiáu llargu, claro qu'ustedes
pueden dicime: pa qué molestase tratando de responder ¿qué faer? si
nun tenemos respuestes pa les otres dos entrugues: ¿Quién lo fadrá? Y
¿cuándo lo fadrá?
Confieso una esmolición, nada alarmista: hai que devolver la estabilidá al
sistema cuanto primero; de lo contrario, l'esfuerciu necesariu pa
recomponelo va ser cada vez mayor. Más qu'esaxeráu, soi descriptivu.
Va unos años, el problema territorial pudo ser correxíu de delles
maneres. Quiciabes (ye una hipótesis, non una afirmación), quiciabes,
digo, bastara con encarar una reforma constitucional que concediera
categoría federal a lo que yá axunta munches de les sos característiques.
Nun sé bien si se refugó por prudencia, mieu, abulia o un alarmante
aislamientu, pero'l casu ye qu'a estes altures, y sigo nel terrén hipotéticu,
seique esa ventana resulte angosta, dáu'l tamañu qu'adquirió l'artefactu
independentista, cebáu nuna fuxida palantre que nun paez tener fin. Por
volver al símil de la física, el gastu d'enerxía necesaria pa reequilibrar el
sistema multiplicóse, y el calor inútil qu'estenemos aumenta cada día la
temperatura política del país.
La hestoria puede tar repitiéndose nel orde institucional. Llevamos nueve
meses ensin gobiernu, bastante ye. Podría dicise que vamos camín de
completar una vuelta al sol: ello ye que yá percorrimos tres cuartes
partes del camín. Dempués de les elecciones d'avientu, hubo delles
alternatives pa poner a funcionar al Gobiernu y a les Cortes Xenerales.
Arruinaes toes, hubo que volver convocar a la ciudadanía y agora
atopamosnos ante'l riesgu evidente de qu'haya una tercer vegada, a ver
si esta ye la vencida. Como naide diz querer otres elecciones tol mundu
da por segura una fase de negociación que tendría de denominase
“agonística”. Pero nun podemos refugar que les terceres elecciones sían
4
parte d'un destín inesorable y fatal. Mentanto, non solo consumimos
tiempu y esfuercios, sinón que probablemente tamién nesti casu'l gastu
d'enerxía necesariu pa recuperar la normalidá, entendida como'l
funcionamientu afayadizu de cada institución —un gobiernu que
gobierne; un parllamentu que llexisle y controle—, tea incrementándose
de forma sustancial. Dicho a la brava, la incapacidá pa superar el desafíu
soberanista y el bloquéu institucional puede llevanos a pagar un preciu
bien altu, en disgregación territorial, en desafección ciudadana y en fadiu.
Créanme, el bloquéu políticu n'España, la incapacidá pa revisar les
mesmes posiciones, inclusive'l mesmu pensamientu debería relativizase,
pelo menos un poco. Seique podríemos recurrir a Borges cuando dicía
que “Quiciabes haya enemigos de les mios opiniones, pero yo mesmu, si
espero un ratu, puedo ser tamién enemigu de les mios opiniones” anque
yá esperemos tanto que vamos tener que recurrir al más cínicu “cuando
digo nunca enxamás quiero dicir pel momentu” de Romanones.
Les instituciones, al cabu y al fin, respuenden a les persones que les
dirixen. Los bonos sistemes son edificaciones complexes, capaces de
correxir o compensar los fallos de quien los gobiernen: los controles
mutuos y los engranaxes de pesos y contrapesos llinden los marxes
d'erru, sirven de cortafueos. Pero los meyores son los que, amás d'una
arquitectura sólida, cunten con una ciudadanía implicada. Una
ciudadanía que nun tolere la corrupción, talmente que la faga
incompatible dafechu cola vida pública; una ciudadanía que tampoco
consienta la ineficacia nin la incapacidá, que torgue la degradación de les
instituciones que son, en sí mesmes, el fundamentu de la democracia.
Fadríamos toos un gran favor si contribuyéramos, caún nel so ámbitu, a
formar esa ciudadanía activa, participativa y esixente, que sería la meyor
manera de contener la pendiente entrópica pola que se tán espeñando
les instituciones. Dende llueu, el papel de la Universidá nesti asuntu ye
imprescindible, porque los problemes de la democracia dependen, ensin
dulda, de la clarencia de les mases, pero tamién de la ceguera de les
élites. Que nun vaigan volver los tiempos nos que —por exemplu—
Schelling y Hegel (que morrió diez años antes) llibraben la batalla de la
opinión pública nel aula númberu seis de la Universidá de Berlín, con
partidarios y adversarios engarraos ensin remisión, nun significa que
pueda arrenunciase a liderar un cambéu cultural, que siempre preciede al
políticu y al social, cuando tolos sismógrafos, tolos observatorios y tolos
sistemes d'alerta, detecten evidentes señales de mutación.
Señor Rector, créame qu'ente los deberes prioritarios del Gobiernu
d'Asturies inclúyese'l sofitu a la Universidá pa que pueda exercer esa y
otres xeres más tanxibles y más inmediates nesta fase doliente de la
crisis económica.
Precisamente, los deberes del Gobiernu d'Asturies incluyen el sofitu a la
Universidá pa que pueda exercer esa y otres xeres. Por eso volvimos
conxelar per quintu añu consecutivu les tases de la primer matrícula. Si
nun m’engaño, somos la única comunidá, con Galicia, que realiza un
esfuerciu asemeyáu pa favorecer l'accesu a los estudios superiores a tol
5
alumnáu, sía como quier el so nivel de renta. Tomar midíes como esta
respuende a la iniciativa política, non a la xestión burocrática. La
propaganda y la iniciativa son coses distintes.
Tampoco respuende a la xestión burocrática'l trabayu pola estabilización
y la promoción de la plantiya docente, que dexe dir dotando
progresivamente a la institución de los recursos humanos necesarios.
Con esi fin facilitemos el financiamientu, p'ameyorar la situación de los
profesores acreitaos pa la docencia y la investigación. Prométo-yos que
vamos aprovechar al máximu los nuestros recursos pa cumplir lo
alcordao nel marcu estable de financiación 2015-2018, soscritu ente
dambes instituciones. Con esa referencia, la Conseyería d'Educación yá
empecipió col rectoráu la negociación d'un contratu programa. Insisto:
nun vamos regatiar. De la nuestra parte vamos poner tolos recursos
disponibles. Espero que l'aprobación d'un presupuestu autonómicu
permita dexar atrás la prórroga y encarar esti y otros compromisos.
Tamién quiero dar les gracies a los equipos de gobiernu de la Universidá:
estimo de verdá'l llabor que fixeron pa implantar les titulaciones del
Espaciu Européu d'Educación Superior y, yá mientres el recién procesu
d'evaluación, les de grau y máster. La sociedá asturiana tien de sentise
arguyosa de los escelentes resultaos llograos, que respuenden al
rigorosu trabayu del profesoráu y del personal d'alministración y
servicios.
Rector, asegúro-y llealtá, collaboración y compromisu. Son los oxetivos
pa esti cursu qu'empieza. Güei empecipiamos un ciclu nuevu. Tea
seguro de que’l mio gobiernu quier percorrelo al so llau.
Munches gracies.
6