Abuso di posicion dominante riba rutanan ABC

Abuso di posicion dominante riba e rutanan ABC
I
E Multilateral Protocol on the Liberalisation of Air Transport within the Kingdom of the
Netherlands di augustus 2011 entre Gobiernonan di Hulanda, Aruba, Curacao y Sint Maarten
ta regla e condicionnan di transporte aereo den Reino.
E ta basa riba un politica masha liberal tanto loke ta concerni e rutanan cu e aerolineanan por
bula, frecuencia, tipo di avion y manera cu ta determina e tarifanan. Tur e Partidonan por
designa cuanto aerolinea cu nan ta desea pa opera e rutanan.
Despues cu Aruba a haya su Status Aparte Hulanda y Antias tabata hiba un politica masha
protecionista pa cu Aruba. Nos a mira un competencia fuerte entre ALM y Air Aruba riba e
rutanan ABC y KLM y Air Aruba riba e ruta pa AMS.
ALM y Air Aruba a sera pa motibo di malaise financiero.
E situacion a keda dificil y aerolineanan cu a bin despues aparentemente a lanta cu e mesun
malesa. No ta pa falta di pasahero o carga; kisas e problema ta e planning y ehecucion di
esaki. Kisas e cantidad di turistanan cu nos ta ricibi ta duna un imagen destorciona y ta lanta e
pregunta di con nos aerolinea mes lo no por transporta un parti grandi di esakinan. Aki ta urgi
e gana pa expande, hopi biaha sin tin e fundeshi solido pa carga e desaroyo.
II
E Protocol pa liberalisacion di e transporte aereo awor ta duna oportunidad na e aerolineanan
di Reino pa competi libremente; interferencia di gobierno ta permiti solamente den cierto
circumstancianan. Pues e prestadonan di servicio tin libertad grandi pa competi den e
mercado. Mirando cu ningun di e aerolinea di West ta bula e ruta pa Hulanda, e mercado
interno ta keda e islanan BES, Aruba, Corsow y Sint Maarten.
Windward Island Airways (WinAir) di Sint Maarten no ta opera pa islanan Aruba, Bonaire,
Corsow (ABC).
EZAir y Divi Divi Air ta opera aki, pero cu un flota chikito y capacidad minimal. InselAir
International y InselAir Aruba ta e unico cu a keda riba e ruta aki despues cu Aruba Airlines a
bula pa corto tempo; Tiara a cay den problemanan financiero y no ta opera mas.
Den e caso aki por constata cu e posibilidad di transporte entre e islanan ta masha limita;
hecho ta cu ta solamente InselAir ta opera e rutanan ABC.
Esaki a crea e peligro grandi cu e aerolinea aki ta tuma un posicion dominante, te hasta di
monopolio. No tin competencia y Gobiernonan ta limita bou cua circumstancianan nan por
interveni. Esaki ta trece cune cu e aerolinea ta adapta su servicio y e tarifanan na e situacion
cu ta mas na su ventaha pa saca major probecho. E derechonan di e publico ta wordo
grandemente neglisha.
1
III
Den mayoria di e acuerdonan liberal di transporte aereo a premira un situacion asina. Esaki ta
principalmente den caso cu ta laga e aerolineanan mes determina e tarifanan y frecuencia cu
nan ta bay opera den e mercado. Ora tin competencia entre diferente aerolinea, por spera cu
nan lo por bin cu diferente tarifa.
Sin competencia e aerolinea mes ta determina/fija su tarifa basa riba su necesidad.
Articulo 13(Pricing) di e Protocol ta concerni e asunto di e prijs cu e pasahero mester paga pa
e wordo transporta.
Segun e definicion (Articulo 1 inciso g.) den e prijs ta inclui tambe e tarifa (suma di placa) pa
transporta e pasahero y su maleta y/o carga (tambe loke e agencianan di e aerolinea ta cobra)
y e condicionnan bou di cua e tarifanan aki ta obtenible.
Inciso 1 di e Articulo 13 ta indica cu e Partidonan (esta e gobiernonan) lo permiti e
aereolineanan individualmente establece e prijsnan pa transporte aereo basa riba
consideracionnan di mercado. Partidonan lo no exigi for di e aerolineanan cu nan mester
consulta cu otro tocante e prijsnan cu nan ta o kier bay cobra riba e rutanan den e caso aki.
Inciso 2 ta stipula cu ningun Partido lo pidi e aerolinanan di e otro Partido pa notifica e
prijsnan cu e kier introduci. Esaki ta inclui tambe prijsnan pa trafico di e otro teritorio pa un
tercer pais.
Inciso 3 ta duna e Partidonan motibonan limita pa interferi:
a. pa proteha e consumidor di prijsnan cu ta excesivo pa motibo di abuso di un posicion
dominante;
b. pa preveni cu aplicacion di prijsnan ta trece un actitud anti- competitivo cu tin o por tin o
cu ta explicitamente intenciona pa tin e efecto di preveni, restringi o destorciona
competencia o exclui un competidor di opera e ruta;
c. pa proteha aerolineanan di prijsnan [di un otro aerolinea] cu ta artificialmente abou pa
motibo di subsidio o sosten directo o indirecto;
d. pa protecion di e aerolinea(nan) di prijsnan cu ta artificialmente abou, unda ta existi e
evidencia cu tin intencion di elimina competencia.
Inciso 4 ta stipula cu cada Partido unilateralmente por nenga un prijs di su propio aerolinea.
Sinembargo un intervencion asina solamente por wordo hasi door di e autoridadnan
aeronautica (ministro) di e Partido si e prijs en cuenstion ta cay bou di e criterianan di inciso 3.
Inciso 5 ta bisa cu ningun Partido lo tuma accion unilateral pa preveni cu un tarifa drenta na
vigor o continua den efecto o proponi door di aerolinea(nan) di e otro Partido. Si un di e
Partidonan ta kere cu un tarifa asina ta inconsistente cu e puntonan menciona ariba [inciso 3],
e Partido por pidi consulta pa notifica e otro Partido e motibonan di su dessatisfaccion. E
consultanan aki mester tuma lugar dentro di 14 dia cu a ricibi e peticion. Sin un acuerdo
mutuo e tarifa lo bira efectivo o keda den efecto.
Esaki ta e articulo cu ta pidi pa doble desaprobacion di un prijs/tarifa: si e tarifa no wordo
2
desaproba door di tur dos gobierno e ta drenta o keda na vigor manera e aerolinea ta
propone.
IV
Den e Preambulo, Partidonan ta expresa cu e Protocol ta entre otro expresa nan deseo di hasi
posible cu e aerolineanan ta ofrece e publico viahero y cu ta manda carga, un variedad di
opcion den servicio aereo na e prijsnan mas abou y cu no ta discriminatorio, cu tampoco ta
representa un abuso di un posicion dominante y cu e deseo di encurasha aerolineanan
individual pa desaroya y implementa prijsnan innovativo y competitivo.
Tambe den e Verklaring bij de ondertekening van het multilateraal luchtvaart Protocol door
de landen van het Koninkrijk Partidonan a declara cu e paisnan y islanan den e parti caribeño
di Reino Hulandes lo beneficia di comunicacion aereo cu ta pagable, sostenible, confiable,
eficiente y sigur [safe].
V
Riba e rutanan ABC ta solamente InselAir ta operando. Legalmente ta dos compania, InselAir
Aruba y InselAir Internacional, sinembargo e maneho real ta den man di e compania InselAir
na Corsow. Pues ta un compania ta determina e tarifanan riba e rutanan menciona. InselAir
pues tin un posicion di monopolio riba e rutanan aki. InselAir mes ta determina e tarifanan y
esakinan, a base di e Articulo 13, no mester wordo aproba door di e Partidonan (den e
casonan aki NLD (pa BON), CUR y AUA).
Masha hopi viahero ta keha di e tarifanan halto y mes tanto ta keha di e servicio cu no ta
confiable.
VI
Recientemente (Amigoe 1 di juni, 2016) por a lesa cu ministro di CUR di Desaroyo Economico
ta bisa cu Korpodeko a fia placa na Insel Air. Ya den 2010 (23 mrt 2010 Luchtvaartnieuws.nl)
Korpodeko a fia placa na InselAir hasta cu Dutch Antillean Express (DAE) a protesta na
Gobernador contra esaki. Atrobe ta sali den prensa (Amigoe18 juli, 2016 pag. 7) cu ministro di
Asuntonan Economico di Corsow ta informa cu Insel Air, indirectamente via Korpodeko, awor
ta haya su di tres monto di placa.
Esaki ta subsidio, aunke ki nomber InselAir o Gobierno kier dune.
Korpodeko ta un instituto semi gubernamental; e motibo cu InselAir a haya e prestamo pa ta
keda opera. Pues InselAir ta keda opera cu subsidio, aunke no sigui competi, pero aplicando
tarifanan halto. Aparentmente e compania no ta opera eficientemente.
Si InselAir tabata competi cu un otro aerolinea, esaki lo ta motibo pa e autoridadnan di Aruba
y Hulanda interferi den e introduccion o aplicacion di e tarifanan ya cu e acceptacion di
subsidio o sosten financiero indirectamente door di Gobierno di Corsow, ta contra e Articulo
13 (Pricing).
3
VII
Autoridadnan sigur por hasi bon di institui un organo pa salvaguardia interesnan di e
consumidor, e publico viajero. Na Hulanda tin un sistema cu ta funciona bon, cu tin un
instancia di supervision, tin un bon sistema di sanccion y un comision cu ta atende
conflictonan den transporte aero. Aki tambe nos por tin un sistema asina probablemente un
instancia pa proteccion di derechonan di consumidor di servicio aereo.
Un autoridad asina por pidi e aerolinea di entrega e tarifanan cu den ultimo aña a wordo
cobra y por determina si e aumentonan ta justifica mirando e desaroyonan den mercado.
Mientrastanto Gobiernonan por actua cu loke e Protocol ta bisa den Articulo 13.
VIII
Resumiendo por bisa cu InselAir ta abusa di su posicion dominante y ta aplica tarifanan halto
riba e rutanan ABC. E tarifanan aki ta halto en relacion y comparacion cu distancianan mas
largo for di e puntonan menciona.
Gobiernonan di Aruba y Hulanda tin instrumento den man pa investiga e tarifanan
exorbitante cu InselAir ta cobra riba e rutanan ABC.
Agustin Vrolijk
260716
5