pelicula `bidanan marca`

COMUNICADO DI PRENSA
PELICULA ‘BIDANAN MARCA’
Un produccion local di Fundacion Respeta Mi tocante Abuso di Mucha
Fundacion Respeta Mi cu su meta pa preveni abuso di mucha kier introduci su pelicula
nobo ‘Bidanan Marca’, un produccion local tocante abuso di mucha. Abuso di mucha ta
un problema serio, grandi y complica pa tanto esun abusa como pa comunidad en
general. E victima di abuso di mucha hopi biaha ta keda cu un cantidad di problema
fisico, mental y social den su bida. Tin indicacion cu e cantidad di caso di abuso di
mucha na Aruba ta substancialmente mas hopi cu tin pensa. Door di esaki ta surgi un
presion grandi riba ayudo medico, ayudo sicosocial y riba husticia. Por pensa por
ehempel riba Departamento di Asunto Social, Directie Voogdijraad, Cuerpo Policial, KIA,
medico y tambe docente.
Pa combati abuso di mucha den nos comunidad ta necesario pa inverti den prevencion.
Nos mester evita pa yega asina leu cu hende ta bay abusa di e muchanan. Y nos
mester evita pa e mucha, cu a ser abusa den su infancia, bay den mal caminda den nos
comunidad y posiblemente por bira un abusador pasobra e no a siña otro.
Mundialmente na November ta pone extra atencion na prevencion di abuso di mucha.
Mirando esaki a dicidi di lanza e pelicula informativo y educativo ‘Bidanan Marca’ e luna
aki. E pelicula aki ta ser subsidia door di Departamento di Asunto Social y co-financia cu
donacion di Fundacion Lotto pa Deporte y Valero Refinery Aruba.
‘Bidanan Marca’ a ser realiza cu cooperacion di hendenan local y produci den nos
propio idioma Papiamento. E pelicula di 30 minuut ta splica kico exactamente abuso di
mucha ta y kico e consecuencianan ta. Cu e pelicula Fundacion Respeta Mi kier
concientiza tur hende cu na Aruba tampoco no mester acepta abuso di mucha. E
pelicula ademas ta duna informacion con pa trata y preveni abuso di mucha.
Riba 10 di November a presenta e pelicula na profesionalnan riba tereno social y na
prensa. Siguientemente lo pasa e pelicula na Telearuba dia 18 di November pa
9’or di anochi y na ATV dia 25 di November pa 9’or di anochi.
Abuso di mucha ta bruto, mahos y shocking. E pelicula ‘Bidanan Marca’ ta trece e
realidad aki dilanti. Pesey mes e pelicula no ta apto pa mucha bao di 12 aña y ta pidi
mayor y educador pa tene cuenta cu esaki.
Si despues di mira e pelicula tin persona cu kier mas informacion tocante abuso di
mucha, por bishita e website www.respetami.aw of por yama Fundacion Respeta Mi na
582-4433 entre 8:30 a.m. y 12:30 p.m.