Regalitu

Regalitu
Den sektor empresarial (internashonal) no ta inusual pa duna un regalo komo gratitut pa
fabornan demostrá. Hende ta duna un regalo komo gratitut pa fabornan demostrá òf pa
laga e futuro relashon sinti su mes bon òf pa drecha e relashon akí. Sinembargo, awendia
hende ta haña esaki sospechoso mesora. E palabra korupshon ta kai masha lihé e ora ei.
"Kick back". Tòg esaki ta remarkabel. Si hefenan di estado ta duna otro regalo dilanti di
kámara, dikon e mesun kos ei ta sospechoso den sektor empresarial? Por tèst si e
dunamentu di regalo ta sospechoso na un manera masha simpel. E problema di posibel
korupshon ta presentá na momentu ku (1) kambia e funshonario ku e persona, (2)
remplasá e símbolo pa un balor ekonómiko duru i (3) remplasá front di e kámara ku un
kuartu sekreto.
1. Funshonario vs. persona
Ora un hefe di estado regalá un otro hefe di estado un vas antik, esaki e ora ei no ta un
gesto di e persona Barack Obama pa ku e persona Willem-Alexander, pero di Presidente
di Merka pa ku Hefe di Estado di Reino Hulandes. Den sektor empresarial esaki no ta
otro. Un regalo pa direktor di un kompania no ta intenshoná pa e señor òf señora
personalmente, pero pa e kompania. E relashon personal ta importante si, pero e no tin
mag di dominá. E peliger ta bira muchu grandi e ora ei ku desishonnan komersial ta keda
influensiá pa motibunan personal. Esaki no ta na bienestar di e empresa. Ademas, e ta
krea un desigualdat indeseá ku otro proveedónan di e produkto – òf servisionan
konserní: asta si nan ta mihó pa e kompania mes, nan lo ta den desbentaha pa motibu di
e obligashonnan personal pa ku un otro proveedó.
2. Balor simbóliko
Balor di un regalo ta relativo. Esun persona ta kontentu ku un rosa, esun otro
(solamente) ku un Maserati. Den e relashon entre empresanan, e tipo di alegria akí no ta
relevante. Einan ta e funshonalidat ta pará sentral. No ta bai pa hasi hende kontentu. Un
regalo ta un símbolo i mester keda esei. Tin biaha un símbolo por ta balioso, pero esei no
mester. Asina ku, den kaso di un regalo den sektor empresarial, ta bai pa algu di balor
ekonómiko fuerte, alarma mester kuminsá zona.
E ora ei pa definishon no ta trata akí di un regalo mas, sino pa deskuentonan ku mester
benefisiá e empresa.
3. Publisidat
Esensial pa un bon corporate governance ta transparensia. Si ta duna regalo dilanti di
kámara, pues den publisidat, e ora ei tur hende ta mira loke ta sosodé. Tur hende por hasi
pregunta tokante orígen i destino di e regalo. Si niun hende no sa ku tin dunamentu di
regalo, e ora ei no ta posibel pa kontrolá. No por husga orígen ni destino.
Dor di tèst dunamentu di regalo na e kriterionan ariba menshoná, ta evitá (e aparensia di)
korupshon. Esei ta importante, pasó korupshon ta kosta sèn. Resientemente(2014),
OECD a kalkulá e gastunan di korupshon na no ménos ku sinku porshento di Produkto
Nashonal Bruto mundial. E montante akí ta mas ku 2,5 triyar US$. Esaki ta asina tantu
ku mi no tin niun idea kuantu esaki ta.
Bo tin pregunta tokante di corporate governance? Sea asina bon di mand’é na
[email protected] i ken sa, bo pregunta lo por wòrdu trata den nos
próksimo kolumna!
1