Bo t`aden

Bo t’aden
Mayoria atministradó den fundashonnan ta hasi nan trabou di forma boluntario. Di mas tantu ku
nan por haña ta un pago pa kubri gastu. Hopi biaha ni sikiera esei. Sierto atministradó ta haña algu
pagá si, pero e kantidat no ta di kompará ku nan esfuerso. Esaki ta hasi un diferensia pa nan posibel
responsabilidat den kaso di daño? Tin chèns ku ta pone bo responsabel menos lihé si e trabou ku bo
tabata hasi (robes), tabata sosodé sin pago? Bo mester paga menos daño i perhuisio e ora ei tambe?
Lastimamente pa boluntarionan, kontesta riba e tres preguntanan akí ta tres biaha 'nò'. No ta hasi
ningun diferensia.
Kada atministradó di un fundashon tin un akuerdo di enkargo legal ku e fundashon. Esaki ta nifiká
ku e akuerdo t’ei, maske bo no a palabrá nèt nada tokante esaki. Na momentu ku bo aseptá e
nombramentu komo atministradó, e akuerdo di enkargo ta un echo den realidat hurídiko. Tambe ora
bo no a aseptá e nombramentu eksplísitamente. Bai e reunion di direktiva i partisipá na tumamentu
di desishon ya ta enserá un aseptashon kaba.
For di e momentu ei tin derechi-i obligashonnan. Un di e obligashonnan di mas importante di un
atministradó ta aktua na e mihó interes di e fundashon. Si bo no hasi esaki komo atministradó, e ora
ei en prinsipio por ponebo responsabel pa daño ku a keda okashoná dor di bo aktuashon defisiente
òf dor ku bo a keda sin hasi algu. Algun ehèmpel ta keda sin entregá impuesto i primanan sosial na
tempu, retiro ilegal di un empleado (ku ta kousa daño pa e fundashon) konsientemente laga
resibunan keda no-pagá (hinkando e fundashon den problema) kumpra kos riba nòmber di e
fundashon, miéntras bo sa òf mester por sa ku e fundashon no por paga, etc.
Lastimamente, den un kaso asina, e defensa ku bo tabata hasi e trabou komo boluntario, lo no yuda.
Bo ta traha sin risibí pago i bo mester paga tambe aserka. Esaki ta rasonabel? Segun mi si. Si bo ta
obligá bo mes pa traha pasó bo bon kurason ta inspirá bo pa hasi esei, e ora ei bo mester hasi e
trabou bon si. Si bo no por òf ke hasi esei, e ora ei bo no mester bira boluntario i sigur no
atministradó. Noblesse oblige. Den esaki hurisprudensia ta bai basta leu. Famoso ta e ehèmpel di e
notario ku, den wikènt na un fiestin, lat den anochi ku un par di glas di biña den su sistema, a keda
aserká pa un amigu pa konseho hurídiko. E amigu a haña e konseho, pero e konseho a resultá di ta
robes. Korte a dikta ku e notario mester a paga pa e daño ku e konseho akí a kousa. A konsiderá
komo no-relevante, e echo ku el a duna e konseho komo fabor di amigu pafó di ora di trabou na un
fiestin. Asina ku bo, sea na un fiesta òf nò, bisti pèchi di konsehero hurídiko òf asina ku bo duna
asistensia médiko no-obligatorio komo dòkter den bo tempu liber, bo mester mantené e normanan
ku ta konta pa kualke profeshonal normal. Si bo no hasi esei, e ora ei bo ta responsabel pa kualke
posibel daño. Pues si bo disidí komo boluntario pa sirbi un bon kousa dor di bai sinta den direktiva
di un fundashon, e ora ei esaki ta algu hopi noble. Pero bo mester hasié bon si, sinó bo t’aden.
Esaki ta konta pa boluntarionan ku no ta den direktiva di e fundashon, pero ku sí ta hasi trabou nopagá pa e fundashon? Nò, alomenos den un grado ménos severo. T’asina si ku nan ta responsabel si
nan kometé erornan den ehersementu di nan trabou (boluntario), pero generalmente den kaso di
erornan ku ta ménos pisá, ta e fundashon mester paga pa e daño i no por buska moda di haña esaki
for di e boluntario. Pues e boluntario lo sali liber.
1