Nzebwin ne wet xpëëk

Nzebwin ne wet xpëëk
Nzebwin ne wet xpëëk
La niña a la que se le murió su perro
Zapoteco de Santa María Quiegolani
Yautepec, Oaxaca
Lidia Vásquez de Hernández
Segunda edición
(versión electrónica)
Publicado por el
Instituto Lingüístico de Verano, A.C.
Apartado postal 22067
14000 Tlalpan, D.F., México
Tel. 5573-2024
2011
Resumen: Una niña estaba muy triste porque se había
muerto su perro. Así que consiguió otro perro y además
un perico. Pero el perro envidiaba al perico, entonces le
pidió a un gato que se comiera al perico. Después el perro
se arrepintió de haberlo hecho.
© 2010 por Lidia Vásquez de Hernández
Derechos reservados conforme a la ley.
Esta obra puede reproducirse o adaptarse para fines no lucrativos.
http://www.sil.org/mexico/zapoteca/quiegolani/L285-NinaPerro-zpi.htm
Primera edición
Segunda edición
2010
2011
1C
(versión electrónica)
La niña a la que se le murió su perro
Zapoteco de Santa María Quiegolani (zpi)
Tebtir wuu te nzebwin ne wap te mëëk.
Kesentyent ryaan nzeb mëëk guin. Wnesela
nzeb ma Munyek.
Te dxe wgaz nzeb maa; wluzh nga wdee
nzeb ne wu maa. Tebegue wii nzeb le te
kamyon zëëd. Ne wdxiino guex ledne zu
Munyek, wzelo Munyek rxi Munyek, wruu
Munyek loo. Zegne wdxiin Munyek lo
kamyon guin, wdee Munyek lad xyanto.
Orguin noze robtsaa nzeb rkarëz nzeb
Munyek. Nuu lextoo nzeb che wket kamyon
Munyek. Chene le kamyon wdesu, le Munyek
waxeechee wdee Munyek zhiin tebzhaan yag
ne zob nga.
3
Kesentyent rzhiilen nzebwin guin ne wii
nzeb bet wzakdet Munyek, axtegue bat
wruudet ren led Munyek, axtegue bat wraadet
led Munyek. Nga ke zu nzeb rwii nzeb lo
Munyek, rgueeb nzeb xtoo Munyek, rnii nzeb
lo Munyek re nzeb:
―¿Penak rondet de diiz? No rkarëz noo
de, per wbereedet de; gukwii naa, mer mer
nket kamyon de.
Zenga zu nzeb rnii nzeb lo Munyek.
Tebegue wlis lo Munyek wii Munyek lo nzeb.
Wzegaa nii nyatee Munyek, wetgue Munyek.
Orguin wzelo nzebwin guin roon nzeb. Wlis
nzeb Munyek wgugyeer nzeb Munyek.
Wra gyëël guin, zob nzeb rlobleedx nzeb
por Munyek; nuu lextoo nzeb: “¿Penakleg wet
xpëëk noo?” Per zhich guin nuu lextoo nzeb:
“Naal pezee chiid men ne wket xpëëk noo yna
men lo noo: ‘Ycheree noo xpëëk de’, per
chene ycheree men maa, ycheree men te
mëkzhid ne zhaandxee rnaa”.
4
Zenga zob nzeb rlobleedx
nzeb. Tebegue wdxiin
xnazhey nzeb, re men lo nzeb:
―Rnebeey noo te wnaa ne rap
mëkwin ne zhid.
Orguin re nzeb lo xnazhey nzeb:
―Tsaxiiche de te ma yka noo.
Chene che zaw zeg xun gbiz, wdxiin
xnazhey nzeb wdxinneey xnazhey nzeb
mëkwin guin, wdee men ma lo nzeb.
Kesentyent rzhiilen
nzeb wnëëz nzeb maa
porke kesentyent
zhaandxee maa.
5
Zenga wap nzeb
mëkwin guin. Rzoob
nzeb mzhig xtoo maa; lex
rano nzeb ma pasear. No
kesentyent ron ma xdiiz
nzeb. Chene nan nzeb lo
maa: “Gutano bëg ysul noo led de”, no rye ma
bëg rdee ma lo nzeb.
Per te chene wruno nzeb ma pasear, wa
nzeb te txu gyeey. Nga zu nzeb yrup nzeb maa,
tebegue wlen te mdun weeyo mëkwin guin;
nonchee wnitlo ma. Zad kayete nzeb maa; le
chene le ma wzël, le ma nuu te lad yaglu nga.
Orguin wboo nzeb ma lad yaglu. Per chene
wdxiin ma ruyuu, noze rbii xtoo maa; nadetre
ma nyu maa. Nlesche nuu lextoo nzeb ne
nadetre xpëëk nzeb nyu. Nuu lextoo nzeb:
“Texnad guet xpëëk noo”. Xche xchetee wkaa
mëkwin guin zenga. Teke le ma wakngyëël ste.
Le chene le ma che wakzhoo, nuu lextoo
nzeb: “Che nzhoo xpëëk noo, che rkyiindenre
6
ma ne gapkwent noo ma demas. Naaree naa
yka noo te perik gap noo, chen gak ma
kompanyer xpëëk noo”. Lex wka nzeb te perik.
Te dxe zob nzeb kayaan
nzeb perik. Rnii nzeb lo
perik porke rlaan nzeb ne
yseed perik ynii perik. Le
mëëk guin zobchee lo nzeb,
per nyaan nuu lextoo ma ne
rukasdetre nzeb ma zegne rukas nzeb ma
chekwlo. Nuu lextoo maa: “¿Pezee ylaaleg noo
chen tsukas xpexwaan noo noo zegne rukas
men noo chekwlo?”
Zhich guin wzuli ma
wyeky ma zhich yuu; laatee
zob te bich nga. Kom
rlayaa mëëk guin, lex re ma
lo bich:
7
―¿Kox rlaa de nee?
Wke bich re bich:
―Ne zob noo zobmbë́z noo yruu te mzin
yket noo gu noo.
Lex re mëëk guin lo bich:
―Noo yniiz ne gu de belne ylaa de zegne
yzëët noo lo de.
―Zaw ―re bich―. ¿Kox rlaan de ylaa
noo?
Wke mëëk guin re ma lo bich:
―Naap or ne gaguees xpexwaan noo, list
sob de zhiin yaglaa or ne yxal noo yuu, teegue
de gu de xperik men, porke ntozdee ryaan men
perik ke lo noo.
―Zaw ―re bich ste.
Wberee mëëk guin wdxiin ke ma lo nzeb,
rgool xgoz maa. Orguin wnëëz nzeb ma wlen
nzeb maa, re nzeb lo maa:
8
―Kesentyent ryaan noo de. Por neguin
wye noo te perik gak xmig de porke tendxee
de. Yët gan txu yrup de gyit. Por laa de wka
noo perik. Gugun xyudar noo gapkwent be
perik chen yroo maa.
Ne won mëëk guin ne ryaan nzeb maa no
ne por laa ma wka nzeb perik, wangwzhoon
ma zhich yuu ste gan pe nga benak zob bich
chen gue ma lo bich ne ylaadet bich zegne re
ma lo bich; per wzëldetre bich.
Zhich guin wberee maa, nuu lextoo maa:
“¿Pezee ylaaleg noo? Naap chiid bich yket
bich perik. Mazdee bet nyedeto noo lo bich”.
Orguin wzob ma wlobleedx ma re maa:
“Logne ylaa noo, yxaldet noo yuu or ne le
bich ylenza”. Zhich guin wdee ma waguees
maa, le nzebwin guin wdee ke waguees.
9
Tebegue wnexgyëëlen nzeb: wdee bich
lenyuu wu bich xperik nzeb. Nonchee xog ma
wrukaa ruu bich.
Zegne waxee nzeb, zad ryete nzeb perik;
rzëldet perik. Le chene wyeep nzeb xtoo yuu,
le yrup xpaan perik
zhoobtee xtoo yuu.
Orguin nleschee nuu
lextoo nzeb, wyët nzeb,
re nzeb lo xpëëk nzeb:
―Nandet de gon,
wu bich xperik be.
Orguin wyeky ma
zhich yuu ste. Wzob ma
ronbeedx maa; nuu
lextoo maa: “¿Penakleg wlaa noo xpexwaan
noo zeree? no kesentyent ryaan men noo.
Nunkre ybereedet noo ylaa noo neree ne wlaa
noo”.
Chene wyen nzeb ne ronbeedx xpëëk
nzeb, wa nzeb waxii nzeb maa. Nuu lextoo
10
nzeb: “Pazer por ne wu bich perik, por neguin
ronbeedx maa”.
Txunan naa laa ma wkyeen bich ne wu
bich perik. Ne wlaase mëëk guin zenga, che
ngyidetre nuu lextoo maa. Te te chene rbig
nzeb ne ynii nzeb lo maa, raxeegue ma ra ma
tebkoo. Lex nuu lextoo nzeb: “¿Penak rlaa
xpëëk noo zeree? Segur por ne wu bich perik,
neguin rlaa ma zeree”.
Zhich guin wye nzeb ste perik. Cheguin
si kesentyent wyaan mëëk guin perik.
Wtsowxmig ma perik. Lex wuu ma diiz lo
perik neguin ne wlaa maa. Zegne won perik
yra ne re mëëk guin, kom run perik guin gan
rnii, wa perik re perik lo nzaap guin neguin ne
wlaa mëëk guin, per mase zenga, ni wlaadet
11
nzeb lo mëëk guin, porke kesentyent ryaan
nzeb maa. Noze re nzeb lo maa:
―Ybereedetre de ylaa de negwa ne wlaa
de, porke ngyideto.
Ngategue wluzh xkwent nzaap guin.
12