L´OMBRE DE MATAIRE.

L´OMBRE DE MATAIRE.
Yerase una bez un hombre alto y granizo, granizo como un tricallón, yera tot tapau
de pels marroniscos, bibiba per las esplugas, penas y zillos de Punta Llerga,
escondendose de la chen del luga que le deciban l’ombre salbache de Mataire.
Bibiba n’es bosques y comeba lo que trobaba...
chordons, martuels,
bellanas y asta cualque camparol se foteba. Feba pacha con es onsos, que bebiban en
liberta per la bal; pocos ixarrallons feban es onsos y si belún en feba yera que teneban
fambre u teneban que come ta engarcholar-se en bela espluga ta pasar l’ibierno.
L’ombre
nunca feba mal al bistiar, si alcaso bela bez y si sabeba que no’l biyeban
cogeba y muyiba bela craba u bela güella ta zorruspar la leche.
Encá que yera gran no’l podeban apercazar, malas que biyeba a belún...
...fuyiba espipando como la ixufrina y jopaba ta la selba, ta es zillos u ta las esplugas.
Como teneba el pel marronisco se abragonaba a cualque árbol u s’acochaba entre
penotas y no’l podeban biyer ni an que pasasen bien zerca, si nunca el trobasen qui sabe
que podrían fer-le ixa chen tan espantada. Le feba goi d’esbolotar-se per la molsa
pompuda y laputiar es foraus anque las abellas gosaban fer-ie miel.
Dizen que cuan un zagal se cazegaba u cayeba per bel forau siempre l’aduyaba
l’ombre salbache de Mataire...
...qui gandaniaba per la bal de Chistau, sin fer mal a dengún.