AWA - Aqualectra
Anuncio
SEA KONSIENTE DI BO KONSUMO DI AWA I KORIENTE Bo kuenta di konsumo di energia pa luna por subi bastante, partikularmente si bo no ta konsiente di bo konsumo di energia. Si bo ta konsiente ku energia, esei no mester nifiká, ku bo ta "entregá" mashá na komodidat i luho na kas. Bo por logra sí un bahada konsiderabel di bo kuenta mensual di energia. Gustosamente Aqualectra ke yuda bo anda mas konsiente ku bo konsumo di energia. Bo ta semper mas ku bon biní na nos ofisina di servisio na Pater Euwensweg, kaminda un di nos kolaboradornan di departamentu di Relashon Públiko por duna bo konseho i informashon riba sparmentu di energia i por demostrá bo tambe vários aparato pa spar energia. Den e foyeto akí tokante sparmentu di energia nos ta duna bo algun tep útil riba sparmentu di energia i un karchi di posishon di meter mashá hèndi. Tin bastante posibilidat pa spar energia, pues tambe pa spar plaka. Repasá e tepnan i kuminsá awe mes ku un konsumo mas konsiente di awa i koriente na kas! Iluminashon na kas Ta un bon idea pa tira anochi un bista den i pafó di bo kas pa nota ki iluminashon bo a skohe. No ta tur kaminda mester di mesun iluminashon. • Den espasio kaminda no tin ningun hende, manera den hanchi na kas ("gang"), kisas no ta na nodi mes pa tin lus sendé. • Un pera pa hasi ambiente agradabel den kas no tin nodi di duna mashá klaridat, kompará ku un pera ku ta usa ora di lesa, skirbi o traha. Kana chèk den kas si tin lampi di demasiado Watt i ku por remplasá pa pera di ménos Watt. Na lugá di 100 Watt, kisas por usa di 75 ó 60 ó 40 Watt, por ehèmpel, òf mihó ainda pera pa spar koriente. • Pera pa spar koriente ta partikularmente interesante ora ta trata di lampi ku ta sende mas di tres ora pa dia. • Den kaso di iluminashon pafó di kas ta rekomendabel usa lampi ku ta sende outomátikamente ora ta skur òf ora un hende pasa na sierto distansia di e lampi. Erko • Trata di limitá tantu posibel pa lus di solo drenta den espasionan ku ta fria ku èrko, usando kos pa tene solo afó (un afdak, tapasolo o mata ku ta duna sombra, òf yalusí, venetian blinds, kortina diki, fòil pegá na bentana di glas). Paga tinu tambe pa e aire friu no por sali fásilmente for di e espasio (parti abou di porta, bentana o porta habrí, habrí na kozein, etc.). • Protehé e unit di èrko kontra solo, por ehèmpel ku un afdak o kapa. Si e unit pafó su temperatura subi, e regulador di temperatura ta start e èrko ku mas frekuensha i asina konsumo di energia ta oumentá. • Limpia e felternan di èrko regularmente. Un kapa diki di stòf na e filter ta opstakulisá e sirkulashon di aire i asina e airco ta konsumí mas energia. • Ora kumpra un èrko, paga tinu riba su kapasidat, esta e kantidat di BTU, i efisiensia di e èrko, ku ta indiká ku Energy Efficiency Rate (E.E.R.). Un E.E.R. di 8 te 9 ta mas o ménos efisiente, di 9 te 10 ta efisiente i di 10 te 12 ta ekselente. E grado di efisiensia, pues e E.E.R., ta dependé di kapasidat di e unit. Un “window-unit” tin un E.E.R. mas abou (pues e ta ménos efisiente) ku un “splet-unit”. • Si bo tin ku sali un ratu di e espasio ku bo ta fria, no ta rekomendabel paga e èrko, pa bolbe send'é un ora despues. Esei ta kosta mas energia ku si a lag’é èrko sendé na un temperatura un poko ménos friu. Mas friu e tèrmostat ta poné, mas koriente e ta gasta. • Tin biaha ta rekomendabel usa un suich di tempu pa bo èrko. Bo por laga por ehèmpel bo èrko den bo kamber di drumi paga den anochi despues di un par di ora. Hopi biaha bo kamber ta keda basta fresku pa bo por sigui drumi trankil te e siguiente mainta. • Konsiderá e posibilidat pa subi temperatura di bo èrko algun grado i drumi por ehèmpel bou di un laken na lugá di un deken. Bo eiskast • Ora skohe un eiskast, skohe un ku ta pas ku bo nesesidat; un eiskast muchu grandi ta pone ku hopi biaha bo ta stiwa kos aden. Kos ku, bon mirá, no tin nodi di ta den eiskast, manera bòter di limonada yen, bleki será i pòchi di glas ku no a habri ainda. Mas kos hinka den eiskast, mas energia e ta gasta. • Paga tinu pa e eiskast no ta pará den solo òf muchu serka di stof. No pon'é muchu serka di muraya i mira pa e ta waterpas. • Laga e porta lo ménos posibel habrí, i asina evitá entrada di airu kayente i salida di airu friu. Pasobra e eiskast lo mester fria tur e airu kayente ku drenta, loke ta kosta energia èkstra. • Limpia e eiskast regularmente; ora tin kapa diki di eis den e parti di fris, e eiskast ta konsumí mas energia. Kontrolá tambe e rùbernan na banda di porta, e partinan di vinyl o di otro material sintétiko na e porta(nan) si nan no tin sker o ta kibrá i, si ta nesesario, kambia nan. • Un eiskast ta saka kayente parti patras. Ei tin un kòndènser. No mester opstakulisá salida di e kayente. P'esei ta mashá importante pa limpia e kòndènser regularmente. • Si bo ta bai ku fakansi, hasi bo eiskast bashí, saka e stèker for di stòpkontakt i laga e porta na skref. TV i aparatonan di oudio • TV i aparatonan di oudio ku ta pará "standby", pues ku ta paga solamente ku "remote-control", ta konsumí koriente konstantemente! Ta rekomendabel pa realmente paga e aparatonan akí (na e boton na e aparato), ora bo no ta mira/skucha. • Hopi biaha un radio o televishon ta sendé, pa kustumber, sin ku ningun hende ta skucha o mira, segun ta e kaso. Sea konsiente di esei i paga e radio o televishon e or'ei. Mashin di laba paña • Usa bo mashin di laba paña solamente ora bo tin un tobo yen di paña shushi. Labamentu kada be di dos tres pida paña ta konsumí innesesariamente hopi energia i awa. Un tobo medio yen ta kosta mes tantu pa laba ku un tobo yen. Pa paña ku no ta mashá shushi por programá e mashin pa e laba durante un tempu mas kòrtiku. • Kòrda ku nos tin solo i bientu na nos antoho, loke ta ideal pa seka paña muhá rápido. • Fangu e awa di habon i us'é pa laba limpia stupi òf pa muha mata kuné. • Ora bo ke kumpra un mashin di laba paña, paga tinu riba e siguiente karakterístikanan: konsumo abou di awa, karga máksimo ku ta pèrmití, posibilidat pa di antemano stèl nivel di e awa, teniendo kuenta ku e kantidat di paña di laba. Sanitario • Si usa perlators o boka spesial na kranchi pa spar awa, por spar fásilmente 50% di e konsumo di awa. Por pega e boka fásilmente na un kranchi. E drat pa skruf e na kranchi ta kasi universal i na man por skruf e boka na kranchi di labakara o di kushina. E bokanan akí no ta limitá efektividat di e fluho di awa; loke sí nan ta hasi ta: pèrkurá pa repartí e stral di awa mihó i ta manera e awa ta skuma ora e ta kore. • Kontrolá kranchi di ducha i w.c. regularmente si nan ta lèk i (laga) drecha e kranchi asina bo nota ku e ta keda kore. Awa ku ta lèk un gota pa sekònde ta resultá den un deroche di 15.600 liter pa aña o sea 15,6 m3. • Kontrolá si despues ku a hala w.c. awa ta sigui kore den e pòchi di w.c. Por kontrolá esei dor di basha un kantidat chikitu di líkido di koló, por ehèmpel poko blous den e baki di w.c. i no flùsh e w.c. umbé. Si despues di algun ratu koló di e awa den e pòchi di w.c. kambia, anto ta e baki ta lèk awa bai den w.c. • Si bo ta bai kumpra un pòchi di w.c. nobo, skohe un ku ta spar awa. Tin baki di w.c. ku tin un boton ku ta ofresé e posibilidat pa laga poko o hopi awa pasa pa e pòchi, dependiendo di e kantidat di awa ku bo ke laga flùsh. Hardin • Un “dripsystem” pa muha mata ta un bon opshon. • Muha mata mainta tempran; e or'ei e awa ta evaporá ménos lihé, ademas mayoria di mata ta "bebe" mainta ora solo sali. • Skohe mata tropikal lokal; nan ta sobreviví hasta periodo seku ku poko awa. • Pone "mulch", sas o blachi seku rondó di e matanan, pa limitá evaporashon pisá durante di dia. "Mulch" ta limitá evaporashon te un 70%. • Awa ku a laba kos kuné den kushina o ku a usa pa ducha por usa tantu pa mata paden i pafó. • No limpia plenchi i flur di semènt o asfalt ku awa di pipa sino ku un basora. FECHA POSISHON INISIAL POSISHON INISIAL FECHA POSISHON FINAL • Yerba ta rekerí mashá awa, mihó alternativa ta piedra mulá. Karchi pa kontrolá bo posishon di meter Un bon manera pa bo ta mas konsiente di konsumo di energia ta si bo ta na altura di bo konsumo na un base regular. Asina bo sa eksaktamente kiko bo ta konsumí pa siman o pa luna na awa i koriente i bo no ta tolondrá ora bo risibí nos kuenta na fin di luna. Ku e karchi di estado di meter bo tin un sosten hèndi pa di moda simpel tene bo estadonan di meter bei i kalkulá bo konsumo. Parti dilanti di e karchi akí bou bo por nota bo konsumo di koriente i parti patras (siguiente página) bo konsumo di awa. POSISHON FINAL USO DEN kWh USO DEN NAƒL. KORIENTE Karga di tur kunuku ta yena Punda Si bo anda mas konsiente ku awa i koriente den kas i den kurá i mustra bo hendenan di kas riba bentaha di sparmentu di energia, bo por baha di un manera simpel bo kuenta di energia. Si paga tinu riba kustumber diario simpel, bo por spar basta sèn tur aña. Ata algun sugerensha: • Limitá tempu di ducha tantu ku ta posibel i no ducha sin ta na nodi. • Sera kranchi, ora bo ta hunta bo kurpa ku habon, skeiru djente o feita. • Siña mucha kon nan mester sera kranchi despues ku nan a habrié. • Preferibel tuma un ducha na lugá di un baño. • No laga awa kore te ora e bira mas kayente. FECHA POSISHON INISIAL POSISHON INISIAL FECHA POSISHON FINAL • Ora di kushiná, skohe wea segun e grandura ku ta apropiá; mas grandi un wea ta, mas awa e ta rekerí, ora ta kushiná. • Usa un ketel ora tin ku herebé awa i no un wea habrí. Ku un ketel bo ta prevení pèrdida di awa dor di evaporashon i bo ta spar energia. • Laba parti pafó di bentana ku un spòns, gamus i un hèmber di awa, no usa slan pa spùit awa. • Si ta usa slan, pega un boka ku ta pone e awa spùit ku un stral. • Laga produkto di dipfris deskongelá di nan mes. Ta kosta mas plaka pa deskongelá produkto di dipfris den un microwave. • Ora ta kushiná ku un stof eléktriko, ta importante pa bòm di e panchi o wea ta mas o ménos mes grandi ku e plachi di stof ku ta pon'é ariba. P'esei POSISHON FINAL USO DEN kWh AWA USO DEN NAƒL. no pone panchi o wea grandi riba un plachi chikí, pió ainda, sigur no pone un panchi o wea chikí riba un plachi grandi. • Si awa tin mashá preshon, laga un paipfeter instalá un vèntil pa regulá e preshon. Kon bo ta tene bo konsumo bei? 1. Bo meternan di koriente i awa ta mustra kuantu respektivamente elektrisidat i awa bo a konsumí. 2. Nota na kolòm unu e fecha riba kua bo ta kohe estado di e meter e promé biaha (fecha estado inisial). 3. Nota e estado di meter korespondiente na kolòm dos (estado inisial). 4. Despues di sierto tempu (por ehèmpel despues di un luna), bo ta nota e fecha nobo den di tres kolòm (fecha estado final) i nota na kolòm kuater e estado di meter korespondiente (estado final). 5. Bo por kalkulá bo konsumo di e periodo en kuestion (den kaso di e ehèmpel: konsumo di último luna) deskontando e estado inisial (di 2 kolòm) di esun final (di 4 kolòm). Nota e konsumo en kuestion na di sinku kolòm (konsumo di kWh o di m3). Esei ta bo konsumo durante e periodo en kuestion na kWh (pa loke ta koriente) òf na m3 (pa awa). 6. Por kalkulá e konsumo na florin multiplikando e montante na kWh (koriente) i esun na m3 (awa) ku e tarifa korespondiente. Na tur momento por optené e tarifanan aktual na Aqualectra. Pagatinu Pa kliente ku ke tin mas kontrol riba nan konsumo di energia, Aqualectra ta orguyoso di por ofresé: e sistema di Pagatinu. Pagatinu ta un sistema di pago adelantá di awa i koriente, via kua bo ta kumpra koriente i awa adelantá. Ku e aparato di Pagatinu na bo kas bo por kontrolá fásilmente bo konsumo na tur momentu. Djis primi un boton i bo ta mira kuantu energia bo ta konsumiendo na e momento ei. Asina bo ta bira mas konsiente di bo propio konsumo i asina bo por traha un presupuesto mas realista. Pagatinu ta e sistema pa e konsumidó konsiente ku ke anda di un forma responsabel ku su konsumo di energia. Pa mas informashon yama telefòn 462-2000. Ofisina prinsipal i ofisina di servisio • Aqualectra Distribution Otrabanda Pater Euwensweg 1 P.O. Box 230 Telefòn: 463-2000 Faks: 463-2228 Ora di servisio na bali: djaluna te ku djabièrnè: 7.45 - 14.30 or Ora di kaha: djaluna te ku djaweps: 7.45 - 18.00 or djabièrnè: 7.45 - 19.00 or Ofisinanan di servisio • Aqualectra Distribution Sta. Rosa Sta. Rosaweg 94 (edifisio di Paseata) Telefòn: 767-8851 Faks: 767-8859 Ora di servisio: djaluna te ku djabièrnè: 7.45 - 15.00 or • Aqualectra Distribution Sta. Maria Jan Noorduynweg (sentro komersial) Telefòn: 869-3523 Faks: 869-3512 Ora di servisio: djaluna te ku djabièrnè: 7.45 - 15.00 or • Aqualectra Distribution Barber Barber 106 Telefòn: 864-1308 Faks: 864-1305 Ora di servisio: djaluna te ku djabièrnè: 7.45 - 12.00 or 12.30 - 15.00 or Numbernan importante • Number pa interupshon telefòn: 135 (24 ora pa dia na warda) • Informashon riba kuenta: telefòn: 463-2328 òf 463-2329 • Departamento Relashonnan Públiko telefòn: 462-5968
