Algun punto y ta pidi mayornan y studiantenan pa tuma bon nota di

Algun punto y ta pidi mayornan y studiantenan pa tuma bon nota di esaki. 1. Nos studiantenan di Aruba cu ta goza di un Aruba lening cu ta bay studia na Hulanda ta wordo automaticamente sigura cu un Particulieren Ziektekosten en schadeverzekering. 2. E seguro medico aki ta cubri personanan cu temporalmente ta bay biba na Hulanda. Studiante porfavor tene na cuenta cu pa por keda goza di e cobertura cu e seguro aki ta brindabo, NO MAG TRAHA TAMPOCO HASI NINGUN ‘NEVENWERKZAAMHEDEN’ pa cual ta ricibi pago. Si e studiante sea bay core stage of disidi di bay traha pa cual e ta ricibi pago cu ta wordo declara na Belastingdienst di Hulanda, e studiante ta perde su derecho riba e seguro ariba menciona, y mester sera su mesun seguro na e Basis Ziektekosten verzekering vigente y obligatorio na Hulanda. Si e studiante no hasi esaki e ta core e riesgo di haya un boet/multa astronomico cu forza retroactivo pa aña calendario. Mester na su turno avisa Boogaard Assurantien B.V. tambe di e cambio aki. E momento cu termina e seguro di studiante, no por bin na remarca mas pe. 3. Momento cu e studiante yega Hulanda e mester tuma contacto cu Boogaard Assurantien B.V. pa e por haya su carnet cu ta su prueba di seguro. E seguro aki ta cubri entre otro: • Dentista te na un maximo di 750 Euro pa aña calendario. Control limpieza y prevencion ta wordo completamente cubri; • Fisioterapie maximo 9 biaha pa aña calendario; • Ortondontie te na un maximo di 1365 Euro y te na e momento cu e studiante cumpli 21 aña di edad. E momento cu e studiante cumpli 21 aña ortondontie no ta wordo cubri mas. Si e studiante aki na Aruba ya ta den tratamento ta aconsehabel pa e studiante bay cu e plan di tratamento Hulanda pa entrega esaki na Boogaard Assurantien B.V. pa sigura continuidad y cobertura di e tratamento. • Anticonceptivo te na un maximo di 200 Euro pa aña calendario. Alavez Boogaard kier alerta nos studiante di lo siguiente: Studiantenan cu tin e Particulieren Ziektekostenverzekering aki NO TIN DERECHO pa aplica pa e asina jama ZORGTOESLAG na Hulanda. Esun cu aplica pe y ricibi’e toch, lo por haya su mes den problema financiero grandi pa e multa cu lo sigui cu forza retroactivo. Na e mayornan: no mester preocupa pa paga e prima envista cu Arubahuis ta encarga su mes cu pago directamente na Boogaard Assurantien B.V. cu lo wordo desconta automaticamente for di e studiante su Arubalening. Conseho di Boogaard na nos studiantenan: manera yega Hulanda busca pa inscribi di biaha na un dokter di cas y un dentista en vista cu mayoria nan cuponan ta yen caba. Deseo di Boogaard na nos studiantenan: Hopi exito. Hopi sabiduria y perseverancia. E miho tempo di bo bida ta bay cuminsa. Miro Dabian Director Boogaard Assurantien N.V. Aruba