Proyecto cama sigur - Fundacion Alzheimer Aruba

Proyecto “Cama Sigur”
di Fundacion Alzheimer Aruba (F.A.A.)
Aruba 21 di september 2009
E proyecto aki su rais ta sali for di e preocupacion cu ta surgi ya ta 7 aña caba serca F.A.A., di mira cu
dolor na nos curason, con nos pashentnan cu ta padesciendo di e malesa di demencia tipo Alzheimer ta
ser mara na cama na man y pia den instancianan di cuido y na cas .
E maramento aki no ta algo cu ta sosode solamente na Aruba, sino tambe na otro paisnan na mundo. E
unico diferencia entre e paisnan aki ta cu na Aruba nos ta usa verband pa mara e personanan aki. Esaki
tin hopi biaha como consequencia cu e material aki no ta flexibel suficiente pa e man y pianan.
Consequentemente e man y pianan di e persona cu ta wordu mara sierto momento ta hincha y hasta tin
casonan cu esakinan ta bira asina urgente cu ta ser pensa pa amputa esakinan. E amputacionnan aki
hopi biaha no ta tuma luga, pa motibo cu “tog” e persona aki lo muri pronto, y “Miho e muri cu su dos
pianan y man cu sin esakinan” . E dolor cu e maramentonan aki ta trece cu ne y e agresion ta ser
maneha cu remedi cu hopi biaha ta haci cu ora e remedi aki sali for di su sitema e ta bira peor. Pa
motibo cu e persona no por comunica su dolor manera nos ta spera di dje e por expresa esaki den
forma inkieto of cu agresion.
Tur e añanan cu a pasa FA.A. a keda haci observacionan pa haya un forma pa alivia e cuido pa e
persona cu demencia tipo Alzheimer. Tabata aña pasa nos a descubri e forma simpel aki. E resultado
di e “Proyecto Cama” aki tabata uno di un buskeda y porfin uno di coïncidencia, manera hopi
inventonan ta ser descubri. Aki na Aruba tin un dicho cu ta bisa “ora bo grawata bo ta haña cos di
hole”...y asina e proyecto aki por a resulta den un proyecto piloto.
Pakico Proyecto Piloto?
Esaki ta pasobra den practica mester bai observa cuanto efecto e metodo aki tin pa por soluciona e
problema di maramento. Nos sa cu e metodo aki a resulta serca un pashent y awo nos ta anhela pa wak
si esaki ta resulta pa mas persona di e indole aki.
Nos di FAA ta spera cu esaki ta un solucion cu nos por amplia y comparti cu otro paisnan na mundo
cu e fin cu e personanan cu demencia tipo Alzheimer y nan cuidadornan no tin mester di mira nan ser
keri sufri di un forma inhumano prome cu e fayece. E ‘proyecto cama’ aki ta uno pa y di comunidad di
e grupo den comunidad (persona cu demencia y su cuidadornan) cu FAA ta para pe. Di parti di F.A.A.
mi ta spera cu e proyecto aki, por duna su fruto y tambe sirbi como alivio pa e persona cu demencia en
particular.
F.A.A. ta sigi traha duro pa yega na otro solucionnan tambe pa personanan cu demencia den nos
comunidad y nan cuidadornan.
Yuda nos cambia e futuro pa e personanan cu demencia tipo Alzheimer y vota riba
http://www.globalcharter.org/film
Fundacion Alzheimer Aruba (F.A.A.)
Savaneta 27-A, Aruba
Phone: +297-592 8416
Email: [email protected]
Website: http://www.alzheimer-aruba.org
Bank acc.: RBTT Bank Aruba N.V., #12.51.511